အာဖဂနစ္စတန်ကို အီရန်၏ အာဏာရှင်နိုင်ငံရေးစနစ်အတိုင်း အုပ်ချုပ်ရန် တာလီဘန်စီစဉ်နေ

စက်တင်ဘာ ၂၊ ၂၀၂၁
M-Media

-အဖွဲ့ရဲ့ခေါင်းဆောင် ဟီဘာသွလ္လာ အက်ခွန်ဇာဒါဟာ တိုင်းပြည်ကို စိုးမိုးအုပ်ချုပ်သူ ဖြစ်မှာဖြစ်ပြီး မကြာခင်ပေါ်ထွက်လာမယ့် အာဖဂန်အစိုးရသစ်ဟာ သူ့လက်အောက်မှာပဲ ရှိလိမ့်မယ်လို့ တာလီဘန်အဖွဲ့က အာဖဂန်သတင်းဌာနက ToloNews ကို မနေ့က အတည်ပြု ပြောဆိုပါတယ်။

အာဖဂနစ္စတန် တစ်နိုင်ငံလုံးကို သိမ်းပိုက်ထားနိုင်တဲ့ တာလီဘန်အဖွဲ့ဟာ အစိုးရဖွဲ့စည်းဖို့ သူတို့နဲ့ ပူးပေါင်းထားတဲ့ အဖွဲ့တွေအကြားမှာ ဆွေးနွေးမှု လုပ်ဆောင်နေပြီး လာမယ့်ရက်ပိုင်းအတွင်း ထုတ်ပြန်ကြေငြာဖို့ ရှိနေပါတယ်။

တာလီဘန် ယဉ်ကျေးမှုကော်မရှင်ရဲ့ အဖွဲ့ဝင်တစ်ဦးဖြစ်သူ အနာမူလာ ဆာမန်ဂါနီက သူတို့ရဲ့ခေါင်းဆောင် ဟီဘာသွလ္လာ အစိုးရအဖွဲ့ထဲမှာပါဝင်ပြီး အစိုးရအဖွဲ့ ခေါင်းဆောင်ဖြစ်မယ်ဆိုတဲ့ကိစ္စဟာ သံသယဖြစ်စရာမလိုတဲ့ကိစ္စ၊ မေးခွန်းထုတ်စရာမလိုတဲ့ကိစ္စ ဖြစ်တယ်လို့ ToloNews သတင်းဌာနကို ဖြေကြားခဲ့ပါတယ်။

တိုင်းပြည်ရဲ့ ဝန်ကြီးချုပ်၊ ဒါမှမဟုတ် သမ္မတတို့ဟာ ဟီဘာသွလ္လာလက်အောက်မှာပဲ ရှိမယ်လို့လည်း သူက ဆိုပါတယ်။

တာလီဘန်ဟာ အီရန်နိုင်ငံရဲ့ နိုင်ငံရေးစနစ်လို ပုံစံမျိုးနဲ့ တိုင်းပြည်ကို အုပ်ချုပ်ဖို့ စီစဉ်နေတယ်လို့ ကျွမ်းကျင်သူတွေက သုံးသပ်ပါတယ်။ ဘာသာရေးခေါင်းဆောင်ဆိုသူက တိုင်းပြည်ရဲ့ အချုပ်အခြာအာဏာကို ချုပ်ကိုင်ထားပြီး တိုင်းပြည်ရဲ့ အုပ်ချုပ်ရေး၊ ဥပဒေပြုရေး၊ တရားစီရင်ရေးကိစ္စတွေကို သူ့ရဲ့ခွင့်ပြုချက်နဲ့သာ လုပ်ဆောင်ရတဲ့ အာဏာရှင် စနစ်မျိုးဖြစ်ပါတယ်။