နျူလက်နက်ကဲ့သို့ ဖျက်အားပြင်းသည့် ပစ်ဒုံးကျည်မျိုး ဖန်တီးနေကြောင်း တောင်ကိုရီးယား ကြောငြာ

စက်တင်ဘာ ၃၊ ၂၀၂၁
M-Media

-ဗျူဟာမြောက် နျူဒုံးကျည်လောက် အစွမ်းထက်ဖျက်အားပြင်းမယ့် မြေပြင်ကမြေပြင်ပစ် ဒုံးကျည်တစ်မျိုးကို ဖန်တီးထုတ်လုပ်နေတာ နောက်ဆုံးအဆင့် ရောက်နေပြီလို့ တောင်ကိုရီးယားက ပြောကြားလိုက်ပါတယ်။

တောင်ကိုရီးယားဟာ မြောက်ကိုရီးယားရဲ့ ခြိမ်းခြောက်မှုအန္တရာယ် အမြဲမပြတ်ရှိနေတဲ့ နိုင်ငံတစ်ခုဖြစ်ပါတယ်။ မြောက်ကိုရီးယားရဲ့ အဓိကနျူစက်ရုံ ပုံမှန်လည်ပတ်နေတယ်ဆိုတဲ့ သတင်းတွေ ထွက်ပေါ်ပြီးနောက်ပိုင်း တောင်ကိုရီးယားက ဒုံးကျည်သစ်စီမံကိန်းကို လူသိရှင်ကြား ထုတ်ပြန်လာတာပါ။

အခု တီထွင်နေတဲ့ တိုက်ချင်းပစ် ဒုံးကျည်အသစ်ဟာ ၃ တန်လောက်ရှိတဲ့ ဒုံးကျည်ထိပ်ဖူးကို သယ်ဆောင်ကာ ၂၁၇ မိုင်ကနေ ၂၄၈ မိုင်အထိ ရောက်ရှိနိုင်ပါတယ်။ မြေအောက်မှာရှိတဲ့ ဒုံးကျည်အခြေစိုက်စခန်းတွေထဲအထိ ထိုးဖောက်ဝင်ရောက် ဖျက်ဆီးနိုင်ဖို့ ဒီဇိုင်းထုတ်တာဖြစ်ပြီး၊ နျူတိုက်ခိုက်မှု ဒါမှမဟုတ် ဒုံးကျည်နဲ့တိုက်ခိုက်မှု မဖြစ်ခင်မှာ ကြိုတင်လက်ဦးမှု ရယူကာ ဖျက်ဆီးနိုင်ဖို့ ရည်ရွယ်ပါတယ်။

ဒုံးကျည်စမ်းသပ်ထုတ်လုပ်မှု ကန့်သတ်ချက်ကို အမေရိကန်က ဖယ်ရှားပေးပြီးတဲ့နောက်ပိုင်း တောင်ကိုရီးယားက ဒီစီမံကိန်းကို စတင်ခဲ့တာဖြစ်ပါတယ်။ အခုဒုံးကျည်သစ်ဟာ ကိုရီးယားနှစ်နိုင်ငံ နယ်စပ်ကနေ ပစ်လွှတ်ရင် မြောက်ကိုရီးယားနိုင်ငံရဲ့ ဘယ်နေရာမဆို ရောက်ရှိနိုင်မှာ ဖြစ်ပါတယ်။

တောင်ကိုရီးယးအစိုးရရဲ့ ထုတ်ပြန်ချက်မှာတော့ မိမိကိုယ်ကို ကာကွယ်ရေးနဲ့ ကိုရီးယားကျွန်းဆွယ် ​လုံခြုံ၊ အေးချမ်းရေး ရည်မှန်းချက် အောင်မြင်အထမြောက်ဖို့အတွက် ပိုမိုကောင်းမွန်တိကျတဲ့ တာတိုပစ်၊ တာဝေးပစ်ဒုံးကျည်တွေ ထုတ်လုပ်သွားမှာ ဖြစ်တယ်လို့ ဖော်ပြထားပါတယ်။

၂၀၂၂ ခုနှစ်ကနေ ၂၀၂၆ ခုနှစ်အထိ ရည်ရွယ်တဲ့ တောင်ကိုရီးယားရဲ့ ကာကွယ်ရေးဘက်ဂျက်မှာ ဖျက်အားပြင်း ဒုံးကျည်အသစ်တွေ ဖန်တီးထုတ်လုပ်ဖို့၊ ဒုံးကျည်ကာကွယ်ရေးစနစ်ကို ပိုမိုအားကောင်းအောင်လုပ်ဖို့ စတဲ့ ရည်မှန်းချက်တွေ ပါဝင်ပါတယ်။

Ref: Reuters