မြန်မာဒုက္ခသည်ကလေးများကို အိန္ဒိယ မီဇိုရမ်ပြည်နယ်က ကျောင်းတက်ခွင့်ပေးမည်

စက်တင်ဘာ ၃၊ ၂၀၂၁
M-Media

-မြန်မာနိုင်ငံက လာရောက်ခိုလှုံတဲ့ ဒုက္ခသည်တွေရဲ့ ကလေးတွေကို အစိုးရကျောင်းတွေမှာ လက်ခံသင်ကြားပေးဖို့ အိန္ဒိယနိုင်ငံ မီဇိုရမ်ပြည်နယ်အစိုးရက ပြည်နယ်ပညာရေးဆိုင်ရာ တာဝန်ရှိသူတွေကို ညွှန်ကြားလိုက်ပါတယ်။

ဩဂုတ်လ ၃၁ ရက်နေ့က ထုတ်ပြန်တဲ့ အဲဒီညွှန်ကြားစာမှာ ၂၀၀၉ ခုနှစ် ကလေးသူငယ်များ အခမဲ့ပညာသင်ကြားနိုင်ရေး အက်ဥပဒေကို ရည်ညွှန်းပြီး ချို့တဲ့တဲ့ အသိုင်းအ၀ိုင်းက အသက် ၆ နှစ်ကနေ ၁၄ နှစ်အကြား ကလေးငယ်တွေဟာ အစိုးရကျောင်းတွေမှာ ပညာသင်ကြားခွင့်ရှိကြောင်း ထပ်လောင်းအတည်ပြုလိုက်တယ်လို့ ဖော်ပြထားပါတယ်။

ဒီညွှန်ကြားစာကို ပြည်နယ်အဆင့်၊ ခရိုင်အဆင့်၊ မြို့နယ်၊ ကျေးရွာအဆင့် ပညာရေးဆိုင်ရာ တာဝန်ရှိသူတွေထံ မီဇိုရမ်ပြည်နယ်အစိုးရက ပေးပို့ခဲ့ပြီး ပြည်နယ်အတွင်းရှိနေတဲ့ ဒုက္ခသည်တွေရဲ့ ကလေးတွေ ပညာသင်နိုင်ရေး ထောက်ပံ့ကူညီကြဖို့လည်း တိုက်တွန်းထားပါတယ်။

ညွှန်ကြားစာမှာ မြန်မာဒုက္ခသည်တွေရဲ့ ကလေးတွေလို့ ရည်ညွှန်းဖော်ပြထားခြင်းမရှိပေမယ့် ဒီအမိန့်ဟာ စစ်အာဏာသိမ်းပြီးနောက် မြန်မာနိုင်ငံက ထွက်ပြေးလာရတဲ့ ဒုက္ခသည်တွေအတွက် အဓိကရည်ရွယ်ပြီး၊ အိန္ဒိယမြေပေါ်ကိုရောက်နေတဲ့ အခြားနိုင်ငံက ဒုက္ခသည်တွေအတွက်လည်း အကျုံးဝင်တယ်လို့ ပြည်နယ် ပညာရေးဝန်ကြီး Lalchhandama Ralte က ပြောပါတယ်။ ကလေးငယ်တွေဟာ စက်တင်ဘာလကစပြီး ကျောင်းစတက်ခွင့်ရမှာပါ။

“အိန္ဒိယမြေမှာ သူတို့ ရှိနေသမျှ သူတို့ကို စောင့်ရှောက်ပေးဖို့ဟာ ကျွန်တော်တို့ရဲ့တာဝန်ပါ။ သူတို့လေးတွေ ဖွံ့ဖြိုးတိုးတက်မှုအတွက် အလွန်အရေးပါတဲ့ ပညာရေးကို လက်လွတ်လို့ မဖြစ်ပါဘူး”

မီဇိုရမ်ပြည်နယ်မှာ မြန်မာနိုင်ငံကဒုက္ခသည် စုစုပေါင်း ၉၄၅၀ လောက် ရှိတယ်လို့ ပြည်နယ်အစိုးရ မှတ်တမ်းတွေက ဆိုပါတယ်။ အများစုဟာ မြန်မာနိုင်ငံ ချင်းပြည်နယ်က စစ်ကောင်စီတပ်တွေရဲ့ ဖိနှိပ်ညှင်းပမ်းမှုကြောင့် ထွက်ပြေးလာရသူတွေ ဖြစ်ပါတယ်။

Ref: Hindustan Times