တရုတ်၏ ငွေကြေးထောက်ပံ့မှုကို မှီခိုမည်ဟု တာလီဘန်ပြောရေးဆိုခွင့်ရှိသူ အတည်ပြု

စက်တင်ဘာ ၃၊ ၂၀၂၁
M-Media

-အာဖဂန်နစ္စတန်ကို ပြန်လည်သိမ်းပိုက်နိုင်ခဲ့တဲ့ သူတို့အဖွဲ့ဟာ အနာဂတ်မှာ တရုတ်ရဲ့ ငွေကြေးထောက်ပံ့မှုကို အဓိက မှီခိုသွားရလိမ့်မယ်လို့ တာလီဘန် ပြောရေးဆိုခွင့်ရှိသူ ဇဘီဟွလ္လာ မူဂျာဟစ်က အီတလီသတင်းစာ La Repubblica နဲ့ အင်တာဗျူမှာ ဖြေကြားလိုက်ပါတယ်။

တာလီဘန်အဖွဲ့ဟာ ဩဂုတ်လအလယ်ပိုင်းမှာ အာဖဂန်တစ်နိုင်ငံလုံးကို သိမ်းပိုက်နိုင်ခဲ့တာပါ။ တာလီဘန် အာဏာပြန်ရလာမှုနဲ့အတူ အနောက်နိုင်ငံတွေကလည်း အာဖဂန်နစ္စတန်အပေါ် အကူအညီပေးနေမှုကို ရပ်ဆိုင်းဖို့ ဆောင်ရွက်လာကြပါတယ်။

ပြောရေးဆိုခွင့်ရှိသူ မူဂျာဟစ်က တရုတ်ရဲ့ အကူအညီနဲ့ တိုင်းပြည်စီးပွားရေးကောင်းအောင် လုပ်ဆောင်သွားမယ်လို့ ဆိုပါတယ်။

“တရုတ်ဟာ ကျွန်တော်တို့ရဲ့ အရေးပါဆုံး မိတ်ဖက်ပါ။ တိုင်းပြည်မှာ ရင်းနှီးမြှုပ်နှံဖို့၊ တိုင်းပြည်တည်ဆောက်ရေးမှာ ပါဝင်ဖို့ သူတို့ အဆင်သင့်ဖြစ်နေတဲ့အတွက် တရုတ်ဟာ ကျွန်တော်တို့ရဲ့ တစ်မူထူးခြားတဲ့ အခွင့်အလမ်းလို့လည်း ပြောလို့ရပါတယ်”

တစ်ကမ္ဘာလုံးကို လွှမ်းမိုးချုပ်ကိုင်ဖို့ ရည်ရွယ်ထားတဲ့ တရုတ်ရဲ့ ခါးပတ်တစ်ကွင်း လမ်းတစ်စင်း (Belt and Road) စီမံကိန်းကို တာလီဘန်က အလွန်အလေးထားတယ်လို့လည်း မူဂျာဟစ်က ထည့်သွင်းပြောဆိုခဲ့ပါတယ်။

“တိုင်းပြည်မှာ ကော့ပါးသတ္ထုတွင်းတွေ အများကြီးရှိတယ် တရုတ်ကျေးဇူးကြောင့် ပြန်လည်ပတ်ပြီး အဆင့်မြှင့်တာတွေ လုပ်နိုင်ပါလိမ့်မယ်။ ကမ္ဘာ့စျေးကွက်ကို ဝင်ရောက်ဖို့ တရုတ်ဟာ ကျွန်တော်တို့အတွက် တံခါးပေါက်လည်း ဖြစ်ပါတယ်”

Ref: Aljazeera