အစ္စရေးသမ္မတနှင့် ဂျော်ဒန်ဘုရင်တို့ လျှို့ဝှက် တွေ့ဆုံဆွေးနွေးခဲ့

စက်တင်ဘာ ၅၊ ၂၀၂၁
M-Media

-အစ္စရေးသမ္မတ အိုက်ဇက် ဟာဇွဂ်နဲ့ ဂျော်ဒန်ဘုရင် အဘ်ဒူလာ ၂ တို့ ပြီးခဲ့တဲ့တစ်ပတ်မှာ လျှို့ဝှက် တွေ့ဆုံခဲ့ပြီး အရှေ့အလယ်ပိုင်းအရေး ဆွေးနွေးခဲ့ကြတယ်လို့ သိရပါတယ်။

ဒီတွေ့ဆုံမှုကို အစ္စရေးသမ္မတက ပြည်တွင်းရုပ်သံတစ်ခုကို စနေနေ့အင်တာဗျူးမှာ ဖွင့်ဟပြောကြားလိုက်တာပါ။

“ပြီးခဲ့တဲ့တစ်ပတ် ဂျော်ဒန်ဘုရင်နဲ့ ကျွန်တော် တွေ့ဆုံခဲ့ပြီး စကားတွေလည်း အကြာကြီး ပြောခဲ့ပါတယ်။ သူ့ရဲ့နန်းတော်မှာ တစ်​ညနေလုံး ကျွန်တော် ရှိခဲ့ပါတယ်။ သိပ်ကိုထူးခြားတဲ့ တွေ့ဆုံမှုပါပဲ”

အစ္စရေးသမ္မတရုံးက ထုတ်ပြန်တဲ့ ကြေငြာချက်မှာတော့ ဂျော်ဒန်ဟာ အလွန်အရေးပါတဲ့ တိုင်းပြည်တစ်ခုဖြစ်ပြီး ဘုရင်အဘ်ဒူလာဟာ လေးစားဖို့အကောင်းဆုံးခေါင်းဆောင်၊ ဒေသတွင်း အရေးပါတဲ့ပုဂ္ဂိုလ်ဖြစ်တယ်လို့ ဟာဇွဂ်က ပြောပါတယ်။

တွေ့ဆုံမှုအတွင်း နိုင်ငံရေ၊ စီးပွားရေး နှစ်နိုင်ငံ ပူးပေါင်းဆောင်ရွက်ရေး၊ ဒေသတွင်း မဟာဗျူဟာကျတဲ့ ကိစ္စတွေအကြောင်း ဆွေးနွေးခဲ့ကြတယ်လို့လည်း ကြေငြာချက်ကဆိုပါတယ်။

အစ္စရေးနဲ့ နယ်စပ်ချင်းကပ်နေတဲ့ နိုင်ငံတွေထဲမှာ ဂျော်ဒန်နဲ့ အီဂျစ်တို့သာ ငြိမ်းချမ်းရေးစာချုပ် ချုပ်ဆိုထားတာပါ။

အစ္စရေးဝန်ကြီးချုပ်ဟောင်း နေတန်ယာဟုလက်ထက်မှာ ဂျေရုစလင်က အလ်အက်ဆွာဗလီဝတ်ကျောင်းတော်ကို အစ္စရေးတပ်ဖွဲ့တွေ ဝင်ရောက်အကြမ်းဖက်မှု၊ အနောက်ဖက်ကမ်းက ပါလက်စတိုင်းရွာတွေကို အစ္စရေးက ကျူးကျော်သိမ်းပိုက်မှု၊ တရားမဝင် အိမ်ယာတွေကို အစ္စရေးက တိုးချဲ့ဆောက်လုက်မှု စတဲ့ ကိစ္စတွေကြောင့် ဂျော်ဒန်နဲ့ ဆက်ဆံရေး ဆိုးရွားခဲ့ပါတယ်။

ဇွန်လမှာ အစ္စရေးဝန်ကြီးချုပ်ဖြစ်လာတဲ့ နက်ဖ်တာလီ ဘန်နက်ဟာ အာဏာရပြီး နောက်တစ်ပတ်မှာပဲ ဂျော်ဒန်ကိုသွားကာ ဘုရင်အဘ်ဒူလာနဲ့ တွေ့ဆုံခဲ့ပြီး အဲဒီနောက် ရေအရင်းမြစ်နဲ့ ကုန်သွယ်ရေးဆိုင်ရာ သဘောတူညီစာချုပ်တွေ ချုပ်ဆိုနိုင်ခဲ့ပါတယ်။

Ref: Aljazeera