မြန်မာနိုင်ငံကို ကန့်လန့်ဖြတ်ထားသည့် ကုန်သွယ်ရေးလမ်းကြောင်းသစ်ကို တရုတ်က အောင်မြင်စွာ စမ်းသပ်

စက်တင်ဘာ ၅၊ ၂၀၂၁
M-Media

-မြန်မာနိုင်ငံကို ကန့်လတ်ဖြတ်သွားတဲ့ ကုန်းတွင်း သယ်ယူပို့ဆောင်ရေး လမ်းကြောင်းတစ်ခုကို တရုတ်က ဩဂုတ်လအတွင်းမှာ အောင်မြင်စွာ စမ်းသပ်ပြေးဆွဲနိုင်ခဲ့တယ်လို့ သိရပါတယ်။

ရန်ကုန်ဆိပ်ကမ်းကနေ ချင်းရွှေဟော်နယ်စပ်ကိုဖြတ်ကာ တရုတ်နိုင်ငံ ယူနန်ပြည်နယ် လင်ကျန်းမြို့အထိ ကားနဲ့သွားပြီး အဲဒီကနေတစ်ဆင့် တရုတ်နိုင်ငံ အနောက်တောင်ပိုင်း ဆီချွမ်ပြည်နယ်မြို့တော် ချန်ဒူးကို ရထားနဲသယ်တဲ့ လမ်းကြောင်းပါ။ တရုတ်-မြန်မာ စီးပွားရေးစင်္ကြန်လမ်းကြောင်းလည်း ဖြစ်ပါတယ်။

ဒီလမ်းကြောင်းကို ဩဂုတ်လက စမ်းသပ်ပြေးဆွဲမှုအတွင်း ကွန်တိန်နာအလုံးရေ ၆၀ လောက် ပို့ဆောင်ခဲ့ပါတယ်။ လင်ကျန်း-ချန်ဒူးရထားလိုင်း ပြီးစီးသွားတာနဲ့ ချက်ခြင်းပြုလုပ်တဲ့ ဒီစမ်းသပ်ပြေးဆွဲမှုဟာ အာဏာသိမ်းစစ်ကောင်စီကို ထောက်ခံအားပေးတယ်ဆိုတာ ပြသတဲ့ လက္ခဏာတစ်ခု ဖြစ်တယ်လို့ ကျွမ်းကျင်သူတွေက သုံးသပ်ပါတယ်။

ဩဂုတ်လအတွင်း အာရှဆိုင်ရာ တရုတ်ရဲ့ အထူးကိုယ်စားလှယ် ဆွန်ကော့ရှန်လည်း မြန်မာနိုင်ငံကို ၈ ရက်ကြာ လျှို့ဝှက်ခရီးလာရောက်ခဲ့ပါတယ်။

မြန်မာနိုင်ငံကိုဖြတ်ပြီး ရေနံ၊ ဓာတ်ငွေနဲ့ ကုန်စည်တွေသယ်တဲ့ တရုတ်ရဲ့လမ်းကြောင်း နှစ်ခုရှိပြီး တစ်ခုက ကျောက်ဖြူ-ကူမင်းလမ်းကြောင်း၊ နောက်တစ်ခုက ရန်ကုန်-ချန်ဒူးလမ်းကြောင်းဖြစ်ပါတယ်။ ဒီလမ်းကြောင်းနှစ်ခုစလုံးဟာ တရုတ်ရဲ့ အဓိကကျတဲ့ အိန္ဒိယသမုဒ္ဒရာ ထွက်ပေါက်လည်း ဖြစ်ပါတယ်။

Ref: Bloomberg