အထောက်အထားလိမ်၍ ကာကွယ်ဆေးထိုးသည့် မြန်မာနိုင်ငံသားတစ်ဦးကို မလေးရှားဖမ်းဆီး

စက်တင်ဘာ ၁၀၊ ၂၀၂၁
M-Media

-ပီနန်မြို့မှာ တစ်ခြားလူတစ်ယောက်ရဲ့ အထောက်အထားတွေနဲ့ ကိုဗစ်ကာကွယ်ဆေးလာထိုးတဲ့ မြန်မာနိုင်ငံသားတစ်ဦးကို ဖမ်းဆီးလိုက်တယ်လို့ မလေးရှားရဲတပ်ဖွဲ့က ထုတ်ပြန်ပါတယ်။

အသက် ၄၄ နှစ်အရွယ် မြန်မာနိုင်ငံသားတစ်ဦးဟာ ပီနန်မြို့ ဂျော့တောင်းမြို့နယ်က ကိုဗစ်ကာကွယ်ဆေးစင်တာတစ်ခုမှာ ကာကွယ်ဆေးသွားထိုးစဉ်အတွင်း သူ့ရဲ့ အမည်၊ နိုင်ငံကူးလက်မှတ် အမှတ်တွေ ပထမတစ်ကြိမ် ထိုးထားတဲ့ စာရင်းထဲမှာ ရှိနေတာကို တွေ့ခဲ့ရတာပါ။

အဲဒီနောက် စက်တင်ဘာ ၆ ရက်နေ့မှာ ဒီကိစ္စကို ရဲတပ်ဖွဲ့ထံ တိုင်ကြားခဲ့ပြီး ၉ ရက်နေ့ ဂျော့တောင်းမြို့က Gurney Paragon ရှော့ပင်းမောလ်မှာ ဒုတိယအကြိမ် ကာကွယ်ဆေးလာထိုးတဲ့ အသက် ၄၅ နှစ်အရွယ် မြန်မာနိုင်ငံသား အမျိုးသားကို ရဲတပ်ဖွဲ့က ဖမ်းဆီးနိုင်ခဲ့ပါတယ်။

ဖမ်းဆီးသူကို ရှာဖွေမှုအတွင်း တိုင်ကြားသူရဲ့ အထောက်အထားတွေအပြင် အခြားစာရွက်စာတမ်းတွေကို သိမ်းဆည်းနိုင်ခဲ့တယ်လို့ ရဲတပ်ဖွဲ့က ဆိုပါတယ်။

လက်ရှိမှာ အဲဒီမြန်မာနိုင်ငံသားကို လိမ်လည်မှု၊ နေထိုင်ခွင့်အထောက်အထားမရှိ စတဲ့ စွဲချက်တွေနဲ့ တရားစွဲဆိုထားပါတယ်။

Ref: The Star