၉/၁၁ တိုက်ခိုက်မှုတွင် ပါဝင်သူနှစ်ဦးနှင့်ပတ်သက်သည့် ထိပ်တန်းလျှို့ဝှက်ချက်ကို အမေရိကန် ထုတ်ပြန်

စက်တင်ဘာ ၁၂၊ ၂၀၂၁
M-Media

-၂၀၀၁ ခုနှစ် ၉/၁၁ တိုက်ခိုက်မှုမှာ ပါဝင်ခဲ့တဲ့ လေယာဉ်ပြန်ပေးဆွဲသူနှစ်ဦး အကူအညီရရှိခဲ့မှုနဲ့သက်ဆိုင်တဲ့ FBI ရဲ့ စုံစမ်းတွေ့ရှိချက်တွေကို အမေရိကန်အစိုးရက တိုက်ခိုက်မှု နှစ် ၂၀ ပြည့်တဲ့ စနေနေ့မှာ အများပြည်သူထံ ချပြလိုက်ပါတယ်။

သမ္မတ ဂျိုးဘိုင်ဒန်က ၉/၁၁ တိုက်ခိုက်မှုနဲ့ ပတ်သက်တဲ့ FBI ရဲ့ တွေ့ရှိချက်တွေကို ပြည်သူထံချပြဖို့ တရားရေးဌာနကို ညွှန်ကြားပြီး တစ်ပတ်အကြာမှာ စာမျက်နှာ ၁၆ မျက်နှာပါတဲ့ ဒီထိပ်တန်းလျှို့ဝှက်ချက် ပထမဆုံး ထွက်လာတာပါ။

လေယာဉ်တွေကို ပြန်ပေးဆွဲပြီး တိုက်ခိုက်မှုလုပ်သူ ၁၉ ဦးမှာ ၁၅ ဦးက ဆော်ဒီနိုင်ငံသားတွေဖြစ်ပြီး၊ တိုက်ခိုက်မှုကို ဆော်ဒီအစိုးရက ပူးပေါင်းကြံစည်တယ်ဆိုတဲ့ စွပ်စွဲချက်တွေ အရင်ကတည်းက ထွက်ပေါ်နေခဲ့တာ ဖြစ်ပါတယ်။

မနေ့က ထုတ်ပြန်မှုမှာ လေယာဉ်ပြန်ပေးဆွဲသူတွေထဲက နှစ်ဦးကို ​ထောက်ပံ့ကူညီပေးခဲ့တဲ့ ဆော်ဒီနိုင်ငံသား နှစ်ဦးအကြောင်း ပါဝင်ပါတယ်။ တစ်ဦးက အိုမာ အလ် ဘေယိုမီဆိုသူဖြစ်ပြီး နောက်တစ်ဦးက လော့စ်အိန်ဂျလိစ် ဆော်ဒီကောင်စစ်ဝန်ရုံးက တာဝန်ရှိသူ ဖာဟဒ် အလ် သူမိုင်ရီ ဖြစ်ပါတယ်။

အလ် ဘေယိုမီဟာ ဆော်ဒီအစိုးရနဲ့ အဆက်အသွယ်ရှိသူပါ။ လေယာဉ်ပြန်ပေးဆွဲသူတွေဖြစ်တဲ့ နာဝက်ဖ် အလ် ဟဇ်မီ၊ ခါလစ် အလ် မစ်ဒ်ဟာရ်တို့ကို ဆန်ဒီယေဂိုမြို့မှာ သူကတိုက်ခန်းငှားပေးခဲ့ပါတယ်။ ဒီလူနှစ်ဦးကို ၂၀၀၀ ခုနှစ် ဖေဖော်ဝါရီလက သူ့ရဲ့စားသောက်ဆိုင်မှာ တွေ့ဆုံမှုဟာ အမှတ်မထင် တွေ့ဆုံမှုဖြစ်တယ်လို့ အလ် ဘေယိုမီက ပြောခဲ့ကြောင်း FBI ရဲ့ စုံစမ်းစစ်ဆေးမှုမှာ တွေ့ရပါတယ်။

ဟဇ်မီနဲ့ မစ်ဒ်ဟာရ်တို့ကို ဘေယိုနီ ကူညီပေးခဲ့တာတွေက ဘာသာပြန်ကိစ္စ၊ ခရီးသွားလာမှု၊ တည်းခိုမှု၊ ငွေကြေးထောက်ပံ့မှုတွေ ဖြစ်ပါတယ်။ အလ်ဘေယိုနီဟာ တစ်ခါတစ်ရံမှာ ‘ဂျီဟတ်’ ကိစ္စအကြောင်း ပြောတတ်တယ်လို့ FBI ရင်းမြစ်က ဆိုပါတယ်။

၉/၁၁ တိုက်ခိုက်မှုမဖြစ်ခင်ကာလ လော့စ်အိန်ဂျလိစ်မြို့ ဆော်ဒီကောင်စစ်ဝန်ရုံးမှာ အရေးပါအရာရောက်ခဲ့တဲ့ ဖာဟဒ် အလ် သူမိုင်ရီဟာ သဘောထားတင်းမာသူတစ်ဦးဖြစ်တယ်လို့ ဆိုပါတယ်။

နောက်ပိုင်း ဂွါတာနာမိုအကျဉ်းထောင်မှာ ဖမ်းဆီးထိန်းသိမ်းခံခဲ့ရတဲ့ ဆော်ဒီညီအစ်ကိုနှစ်ဦးရဲ့ ဆော်ဒီက အိမ်ဖုန်းကို ၁၉၉၉ ခုနှစ်က အလ် သူမိုင်ရီ ဖုန်းဆက်ပြီး ၇ မိနစ် ပြောကြားမှုကို FBI ရဲ့ စုံစမ်းစစ်ဆေးမှုမှာ ဖော်ထုတ်နိုင်ခဲ့ပါတယ်။

အလ် ဘေယိုမီရော အလ် သူမိုင်ရီပါ ၉/၁၁ တိုက်ခိုက်မှုမဖြစ်ခင် သီတင်းပတ်အနည်းငယ်အရင် အမေရိကန်ကနေ ထွက်ခွာသွားကြတာပါ။

ဆော်ဒီကငြင်းထား

၉/၁၁ တိုက်ခိုက်မှုမှာ ပူးပေါင်းပါဝင်ခဲ့တယ်ဆိုတဲ့ စွပ်စွဲချက်တွေကို ဆော်ဒီအစိုးရက တစ်စိုက်မတ်မတ် ငြင်းဆိုထားပါတယ်။

ဝါရှင်တန်က ဆော်ဒီသံရုံးကလည်း ၉/၁၁ တိုက်ခိုက်မှုနဲ့ပတ်သက်တဲ့ စုံစမ်းစစ်ဆေးမှု အချက်အလက်တွေ အများပြည်သူထံချပြမယ့် ဂျိုးဘိုင်ဒန်အစိုးရရဲ့ အစီအစဉ်ကို အပြည့်အ၀ ထောက်ခံတယ်လို့ ပြီးခဲ့တဲ့တစ်ပတ်မှာ ထုတ်ပြန်ထားပါတယ်။

တိုက်ခိုက်မှုမှာ ဆော်ဒီအစိုးရ ပါဝင်တယ်ဆိုတဲ့ ပြောဆိုချက်တွေဟာ လုံး၀မှားယွင်းတယ်လို့ ဆော်ဒီသံရုံးက ထပ်မံပြောကြားခဲ့ပါတယ်။

“၉/၁၁ ကော်မရှင်က ထုတ်ပြန်မှု၊ စာမျက်နှာ ၂၈ မျက်နှာပါ ထုတ်ပြန်မှုတွေလို အရင်က စုံစမ်းစစ်​ဆေးမှု ထုတ်ပြန်ချက်တွေမှာ ဆော်ဒီအစိုးရ ဒါမှမဟုတ် အရင်အကြမ်းဖက်တိုက်ခိုက်မှုတွေနဲ့ ဆက်နွယ်တဲ့ ဆော်ဒီအာဏာပိုင်တွေ ပါဝင်ခဲ့တယ်ဆိုတဲ့ သက်သေအထောက်အထားမျိုး လုံး၀ မတွေ့ရပါဘူး” လို့ သံရုံးရဲ့ ထုတ်ပြန်ချက်မှာ ဖော်ပြထားပါတယ်။

ကျန်ရစ်သူတွေ ချီးကျူး

၉/၁၁ တိုက်ခိုက်မှုနဲ့ပတ်သက်တဲ့ လျှို့ဝှက်ချက်တွေ အခုလို ပထမဆုံး ထုတ်ပြန်မှုအတွက် ကျန်ရစ်သူ မိသားစုတွေက အမေရိကန်အစိုးရကို ချီးကျူးခဲ့ကြပါတယ်။

ဒီလိုထုတ်ပြန်မှုဟာ အမှန်တရားနဲ့ တရားမျှတမှုကို ဖော်ထုတ်ဖို့ မိမိတို့ရဲ့ ကြိုးစားမှုကို တွန်းအားပေးလိုက်တာဖြစ်ပြီး ဆော်ဒီအစိုးရရဲ့ ပံ့ပိုးမှုနဲ့ အလ်ကိုင်းဒါးအဖွဲ့ အမေရိကန်နိုင်ငံအတွင်း ဘယ်လို လှုပ်ရှားခဲ့လဲဆိုတာ ရေးရေးပေါ်လာတာဖြစ်တယ်လို့ ကျန်ရစ်သူမိသားစုတွေက ပြောပါတယ်။

လေယာဉ်ပြန်ပေးဆွဲတိုက်ခိုက်သူတွေ အမေရိကန်ရောက်ပြီးနောက်ပိုင်း အဆက်အသွယ်ရှိတဲ့ ဆော်ဒီ သံရုံး တာဝန်ရှိသူတွေ၊ ဆော်ဒီအစိုးရ တာဝန်ရှိသူတွေအကြောင်းကို FBI က စုံစမ်းစစ်ဆေးမှုတွေ ရှိခဲ့ပေမယ့် ၉/၁၁ ကော်မရှင်ရဲ့ အရင်က ထုတ်ပြန်ချက်မှာတော့ တိုက်ခိုက်မှုမှာ ဆော်ဒီအာဏာပိုင်တွေ ပါဝင်ပတ်သက်တယ်ဆိုတဲ့ အထောက်အထားမျိုး မတွေ့ရဘူးလို့ ဖော်ပြထားပါတယ်။

Ref: Aljazeera