သေဆုံးပြီဆိုသည့် အလ်ကိုင်းဒါးခေါင်းဆောင်၏ ဗီဒီယိုထွက်လာ၊ မိမိတို့နှင့်မဆိုင်ဟု တာလီဘန်ငြင်းချက်ထုတ်

စက်တင်ဘာ ၁၄၊ ၂၀၂၁
M-Media

-သေဆုံးသွားခဲ့ပြီလို့ သတင်းထွက်နေတဲ့ အလ်ကိုင်းဒါးအဖွဲ့ရဲ့ ခေါင်းဆောင် အလ် ဇာဝါဟီရီ မိန့်ခွန်းပြောတဲ့ ဗီဒီယိုတစ်ခု ပြီးခဲ့တဲ့တစ်ပတ်မှာ ပေါ်ထွက်လာပါတယ်။

၉/၁၁ တိုက်ခိုက်မှု နှစ် ၂၀ ပြည့်တဲ့အချိန် တိုက်တိုက်ဆိုင်ဆိုင်ထွက်လာတဲ့ မိနစ် ၆၀ ကြာ အဲဒီဗီဒီယိုမှာ ၉/၁၁ တိုက်ခိုက်မှုပြုလုပ်တဲ့ လေယာဉ်ပြန်ပေးသမား ၁၉ ဦးကို ချီးကျူးခဲ့ပြီး အမေရိကန်ဟာ အရင်တုန်းက မခံစားခဲ့ရဖူးတဲ့ ထိခိုက်နာကျင်မှုမျိုးကို ခံစားခဲ့ရတယ်လို့ ဇာဝါဟီရီက ဆိုပါတယ်။

ဒါ့အပြင် ဂျေရုစလင်ကို ဂျူးဇာတ်သွင်းဖို့လုပ်နေတဲ့ အစ္စရေးရဲ့ဆောင်ရွက်မှုကို တားဆီးဟန့်တားနေကြတဲ့ မွတ်စလင်လူ့အဖွဲ့အစည်းကို ချီးကျူးချင်ကြောင်း၊ အာဖဂန်နစ္စတန်မှာလည်း အမေရိကန်တွေရှုံးနိမ့်နေပြီဖြစ်ကြောင်း သူက ပြောပါတယ်။

အခုနှစ်ဖေဖော်ဝါရီလက ဆီးရီးယားမှာရှိတဲ့ ရုရှားတပ်ဖွဲ့ကို အလ်ကိုင်းဒါးတွေက တိုက်ခိုက်ခဲ့မှုကိုလည်း ဒီဗီဒီယိုမှာ ဇာဝါဟီရီက ထည့်သွင်းပြောဆိုသွားပါတယ်။ ဒါပေမယ့် တာလီဘန်အဖွဲ့က အာဖဂန်နစ္စတန်ကို ပြန်လည်သိမ်းပိုက်နိုင်မှုကို မပြောခဲ့ပါဘူး။

အာဖဂန်နစ္စတန်မှာ ရှိမယ်လို့ယူဆရတဲ့ အသက် ၇၀ အရွယ် ဇာဝါဟီရီတစ်ယောက် သေဆုံးသွားပြီလို့ ၂၀၂၀ ခုနှစ် နိုဝင်ဘာလမှာ သတင်းထွက်ခဲ့ပေမယ့် အမေရိကန်နဲ့ အင်အားကြီးနိုင်ငံတွေရဲ့ ထောက်လှမ်းရေးတွေက အတည်မပြုနိုင်ခဲ့ပါဘူး။

အခုထွက်လာတဲ့ ဗီဒီယိုဟာ လတ်တလောရိုက်ထားတဲ့ ဗီဒီယိုလား၊ သေဆုံးတယ်လို့ သတင်းမထွက်ခင် ရိုက်ထားတဲ့ဗီဒီယိုလားဆိုတာကို အတည်မပြုနိုင်သေးပါဘူး။

၁၉၉၆ ခုနှစ်ကနေ ၂၀၀၁ ခုနှစ်အထိ အာဖဂန်နစ္စတန်ကို အုပ်စိုးခဲ့တဲ့ တာလီဘန်အဖွဲ့ဟာ အလ်ကိုင်းဒါးခေါင်းဆောင် အိုစမာ ဘင်လာဒင်နဲ့ အဖွဲ့တစ်ခုလုံးကို လက်ခံ​နေရာပေးခဲ့ဖူးပါတယ်။ ဒါပေမယ့် ၂၀၂၀ ခုနှစ်အစောပိုင်း အမေရိကန်နဲ့ ရရှိခဲ့တဲ့ သဘောတူညီချက်မှာ အလ်ကိုင်းဒါးအပါအဝင် ဘယ်အကြမ်းဖက်အဖွဲ့အစည်းကိုမှ အာဖဂန်ပိုင်နက်မှာ လက်ခံမှာမဟုတ်ဘူးလို့ တာလီဘန် ကတိပေးထားပါတယ်။

အလ်ကိုင်းဒါးခေါင်းဆောင် အလ်ဇာဝါဟီရီ အာဖဂန်မှာရှိနေတယ်ဆိုတဲ့ သတင်းတွေကို တာလီဘန်ပြောရေးဆိုခွင့်ရှိသူ မိုဟာမက် နအင်းက ရုရှားသတင်းဌာန Sputnik နဲ့ အင်တာဗျူးမှာ ငြင်းဆိုခဲ့ပါတယ်။

“ဒီပြောကြားမှုက အလိမ်အညာပါ။ အမှန်တရားနဲ့ တခြားစီပါပဲ”

Ref: RT, Republic World