အာဖဂန်မှထွက်ပြေးလာသည့် ၃ နှစ်အရွယ်ကလေးငယ် က​နေဒါရောက်လာ

စက်တင်ဘာ ၁၅၊ ၂၀၂၁
M-Media

-တာလီဘန်တွေ သိမ်းပိုက်ပြီးတဲ့နောက် အာဖဂနစ္စတန်ကနေ မိတကွဲဖတကွဲ ထွက်ပြေးလာရတဲ့ အသက် ၃ နှစ်အရွယ် ကလေးငယ်လေးဟာ ၂ ပတ်တာ ကြာမြင်ခဲ့ပြီးတဲ့နောက် ကနေဒါကို ရောက်လာပြီလို့ သိရပါတယ်။

အာဖဂန်မှာ ကျန်ခဲ့တဲ့ မိသားစုတွေရဲ့ လုံခြုံရေးကို စိုးရိမ်ရတာကြောင့် ဒီကလေးငယ်ကို အလီလို့သာ သတင်းဌာနတွေက ဖော်ပြပါတယ်။ တာလီဘန်လက်ကနေ လွတ်ရာကျွတ်ရာ ထွက်ပြေးရကြတဲ့ အာဖဂန်ပြည်သူတွေထဲမှာ အဖော်မပါဘဲ တစ်ယောက်တည်းဖြစ်နေတဲ့ အလီလေးရဲ့သတင်းကို နိုင်ငံတကာအသိုင်းအ၀ိုင်းက စိတ်ဝင်စားခဲ့ကြတာပါ။

ပြီးခဲ့တဲ့လက ကာဘူးလ် လေဆိပ်နားမှာဖြစ်ပွားပြီး ၁၇၅ ဦးသေဆုံးခဲ့တဲ့ အလ်ကိုင်းဒါးရဲ့ အသေခံဗုံးခွဲတိုက်ခိုက်မှုကနေ အလီတစ်ယောက် လွတ်မြောက်လာခဲ့ပေမယ့် မိသားစု၊ ညီအစ်ကိုမောင်နှမတွေနဲ့ တကွဲတပြားစီဖြစ်ခဲ့ရပါတယ်။

ကယ်ဆယ်ရေးလေယာဉ်နဲ့ ကာတာနိုင်ငံကို ရောက်သွားခဲ့ပြီးတဲ့နောက် အဲဒီကနေတစ်ဆင့် ဖခင်ရှိရာ ကနေဒါနိုင်ငံကို တနင်္လာနေ့က ရောက်ရှိလာတာ ဖြစ်ပါတယ်။ သူ့ဖခင်ဟာ ကနေဒါနိုင်ငံမှာ နေထိုင်အလုပ်လုပ်နေတာ ၂ နှစ်ရှိနေပါပြီ။ တစ်ကိုယ်တည်းဖြစ်နေတဲ့ အလီရဲ့ ခရီးစဉ်တစ်ခုလုံးကို နိုင်ငံတကာ ပြောင်းရွှေ့အခြေချသူများ အကူအညီပေးရေးအဖွဲ့ (IOM) က ကူညီဆောင်ရွက်ပေးတာ ဖြစ်ပါတယ်။

၂၀၀၁ ခုနှစ် အာဖဂန်ကို ကျူးကျော်တိုက်ခိုက်မှုမှာ အမေရိကန်နဲ့အတူ ပါဝင်ခဲ့တဲ့ ကနေဒါက တာလီဘန်လက်ကနေလွတ်အောင် ထွက်ပြေးလာတဲ့ အာဖဂန်ပြည်သူ ၂ သောင်းကို လက်ခံအခြေချခွင့်ပေးမယ်လို့ ထုတ်ပြန်ထားပါတယ်။

“ပြီးခဲ့တဲ့နှစ် ၂၀ အတွင်း ဒီမိုကရေစီအရေး၊ လူ့အခွင့်အရေး၊ ပညာရေး၊ ကျန်းမာရေး၊ လုံခြုံရေး တိုးတက်ကောင်းမွန်အောင် ကနေဒါရဲ့ ကြိုးပမ်းမှုမှာ အာဖဂန်ပြည်သူတွေက အသက်နဲ့ရင်းပြီး ကူညီပေးခဲ့ကြတာပါ။ ကျွန်တော်တို့အပေါ်မှာ ဒီကျေးဇူးတွေရှိပါတယ်။ သူတို့တွေ ဘေးအန္တရာယ်ကင်းရေး ကျွန်တော်တို့ ဆက်လက်ပြီး ကြိုးပမ်းအားထုတ်သွားမှာပါ” လို့ ကနေဒါနိုင်ငံခြားရေးဝန်ကြီး မာ့ခ် ဂါနူရဲ့ ​ပြီးခဲ့တဲ့လ ကြေငြာချက်မှာ ဖော်ပြထားပါတယ်။

ဩဂုတ်လ ၁၅ ရက်နေ့ တာလီဘန်က အာဖဂန်နစ္စတန် တစ်နိုင်ငံလုံးကို သိမ်းပိုက်ခဲ့ပြီးတဲ့နောက် ထောင်သောင်းချီတဲ့ အာဖဂန်ပြည်သူတွေဟာ ဘေးလွတ်ရာကို ထွက်ပြေးခိုလှုံခဲ့ကြပါတယ်။ အမေရိကန်နဲ့ မဟာမိတ်တွေက ကာဘူးလ်မြို့လေဆိပ်မှာ ဩဂုတ်လ ၃၀ ရက်နေ့အထိ ကယ်ဆယ်ရေးလေယာဉ်တွေ ပျံသန်းပေးခဲ့သလို၊ အာဖဂန်နဲ့ နယ်စပ်ချင်းထိနေတဲ့ ပါကစ္စတန်၊ ဥစဘက်ကစ္စတန် စတဲ့နိုင်ငံတွေကလည်း ခိုလှုံလာတဲ့ အာဖဂန်ပြည်သူတွေကို လက်ခံပေးခဲ့ပါတယ်။

ကုလသမဂ္ဂ ကလေးသူငယ်များအဖွဲ့ UNICEF က ဩဂုတ်လအတွင်း ကဘူးလ်လေဆိပ်ကနေ မိဘအုပ်ထိန်းသူ မပါတဲ့ ကလေးငယ် ၃၀၀ လောက်ကို ကယ်တင်ပေးခဲ့ရပြီး ကာတာ၊ ဂျာမနီနဲ့ အခြားနိုင်ငံတွေကို ပို့ဆောင်ပေးခဲ့ရတယ်လို့ ထုတ်ပြန်ပါတယ်။

ဒီကလေးငယ်တွေဟာ ကမ္ဘာပေါ်က အချို့တဲ့ဆုံးကလေးငယ်တွေဖြစ်ကာ မိသားစုနဲ့ ပြန်လည်ဆုံစည်းနိုင်အောင် ဆောင်ရွက်ပေးကြဖို့ UNICEF အကြီးအကဲ ဟန်ရီယက်တာ ဖိုးက တိုက်တွန်းခဲ့ပါတယ်။

“လေဆိပ်မှာ ၀ရုန်းသုန်းကားဖြစ်တဲ့အချိန်၊ ကယ်ဆယ်ရေးလေယာဉ်နဲ့ ရုတ်တရက် ပါသွားတဲ့အချိန်မှာ မိတကွဲ ဖတကွဲဖြစ်သွားတာကြောင့် ဒီကလေးတွေ ဘယ်လောက်အထိ စိုးရိမ်ထိတ်လန့်နေမလဲဆိုတာ ကျွန်မ စဉ်းစားလို့တောင် မရပါဘူး”

အခုလအစောပိုင်း ဂျာမနီက Ramstein လေတပ်စခန်းကို သွားရောက်စဉ် အမေရိကန်နိုင်ငံခြားရေးဝန်ကြီး အန်သိုနီဘလင်ကန်က မိတကွဲ ဖတကွဲဖြစ်နေတဲ့ အာဖဂန်ကလေးငယ်တွေကို တွေ့ဆုံအားပေးခဲ့ပါတယ်။

“သားတို့သမီးတို့ အမေရိကန်ကို လာဖို့အတွက် အမေရိကန်ပြည်သူတွေက လက်ကမ်းကြိုဆိုနေကြပါတယ်”

အမေရိကန်က အာဖဂန်ပြည်သူ ၅ သောင်းကို လက်ခံနေရာချပေးသွားမယ်လို့ ထုတ်ပြန်ထားပါတယ်။

Ref: Aljazeera