ရုရှားတက္ကသိုလ်တစ်ခုတွင် ပစ်ခတ်မှုဖြစ်ပွားပြီး ၆ ဦးသေဆုံး

စက်တင်ဘာ ၂၀၊ ၂၀၂၁
M-Media

-ရုရှားနိုင်ငံအနောက်ပိုင်းက တက္ကသိုလ်တစ်ခုမှာ သေနတ်သမားတစ်ဦးက ဝင်ရောက်ပစ်ခတ်ခဲ့တဲ့အတွက် အနည်းဆုံး ၆ ဦး သေဆုံးခဲ့တယ်လို့ သိရပါတယ်။

တနင်္လာနေ့မနက်ပိုင်းမှာဖြစ်ပွားခဲ့တဲ့ ဒီပစ်ခတ်မှုကို ကျောင်းသားတစ်ဦးက ကျူးလွန်တာဖြစ်ပြီး အဲဒီကျောင်းသားကို ဖမ်းဆီးနိုင်ခဲ့ကာ လူသတ်မှုနဲ့ အမှုဖွင့်ထားတယ်လို့ ရုရှားအစိုးရက ထုတ်ပြန်ပါတယ်။

ကျောင်းသား ၆၀ လောက်ရှိတဲ့ စာသင်ခန်းမှာ ပစ်ခတ်မှုဖြစ်ပွားခဲ့​ကာ ကျောင်းသားတွေက ခုံတွေ၊ ဗီဒိုတွေနဲ့ အကာကွယ်လုပ်ပြီး သေနတ်သမားကို​ ရှောင်တိမ်းနိုင်ခဲ့ပါတယ်။ ပစ်ခတ်မှုဖြစ်ပွားစဉ် တက္ကသိုလ်ထဲမှာ ကျောင်းသား ၃ ထောင်လောက် ရှိနေတာပါ။

ပစ်ခတ်မှုအတွင် ဒဏ်ရာရသူ အနည်းဆုံး ၆ ဦး ရှိခဲ့ပါတယ်။

ရုရှားဟာ သေနတ်ကိုင်ဆောင်ခွင့်ကို တင်းတင်းကြပ်ကြပ် ကန့်သတ်ထားတဲ့နိုင်ငံဖြစ်ပြီး ကျောင်းတွေ၊ တက္ကသိုလ်တွေမှာ ပစ်ခတ်မှုလည်း သိပ်မရှိပါဘူး။

မေလ ၁၁ ရက်နေ့ ကာဇန်မြို့မှာက ကျောင်းတစ်ကျောင်းမှာ ဆယ်ကျော်သက်တစ်ဦးက သေနတ်နဲ့ ပစ်ခတ်ခဲ့တာကြောင့် ကလေးငယ် ၇ ဦးနဲ့ ဆရာ ၂ ဦးသေဆုံးခဲ့ပါတယ်။ အဲဒီအဖြစ်အပျက်နောက်ပိုင်း ရုရှားအစိုးရဟာ သေနတ်ကိုင်ဆောင်ခွင့်ကို ပိုမိုတင်းကြပ်ခဲ့ပါတယ်။

Ref : Reuters