ထန်တလန်မြို့တွင် တရားဟောဆရာတစ်ပါး အသတ်ခံရမှုအတွက် ခရစ်ယာန်နှစ်ခြင်းအသင်းတော်က ကန့်ကွက်ရှုတ်ချ

စက်တင်ဘာ ၂၁၊ ၂၀၂၁
M-Media

-ပြီးခဲ့တဲ့တစ်ပတ်က ချင်းပြည်နယ် ထန်တလန်မြို့မှာ ဖြစ်ပွားခဲ့တဲ့ တိုက်ပွဲအတွင်း ခရစ်ယာန်တရားဟောဆရာ တစ်ယောက် သတ်ဖြတ်ခံရမှုကို ခရစ်ယာန် နှစ်ခြင်းအသင်းတော်က ကန့်ကွက်ရှုတ်ချလိုက်ပါတယ်။

အသက် ၃၁ နှစ်အရွယ် တရားဟောဆရာ Cung Biak Hum ဟာ စစ်ကောင်စီတပ်တွေနဲ့ ဒေသခံ ကာကွယ်ရေးတပ်ဖွဲ့တွေအကြား တိုက်ပွဲဖြစ်ချိန်မှာ စစ်ကောင်စီတပ်တွေရဲ့ သတ်ဖြတ်မှုကို ခံလိုက်ရတာပါ။

“တရားဟောဆရာနဲ့ လူငယ် ၄၊ ၅ ဦးဟာ အခင်းဖြစ်တဲ့အနေရာမှာ ကူညီဖို့အတွက် မော်တော်ဆိုင်ကယ်နဲ့ ရောက်လာတဲ့အချိန် စစ်သားတွေက သူတို့ကိုပစ်တယ်။ တရားဟောဆရာ အပစ်ခံရပြီး နေရာမှာတင် သေဆုံးသွားပါတယ်” လို့ အမည်မဖော်လိုသူတစ်ဦးက ပြောပါတယ်။

“ပစ်ခတ်မှုတွေ အဆက်မပြတ်ဖြစ်နေတာ၊ လက်နက်ကြီးတွေနဲ့ ပစ်နေတာကြောင့် ဘယ်သူမှ သူ့ရဲ့အလောင်းကို ချက်ခြင်း သွားမယူနိုင်ကြပါဘူး။ နောက်ပိုင်း စေတနာ့ဝန်ထမ်းတွေက ​သွားယူပြီး သူ့ရဲ့အမေအိမ်မှာ ရေချိုးသန့်စင်ပေးတဲ့အချိန် လက်သူကြွယ်အဖြတ်ခံထားရတာကို တွေ့ရပြီး လက်ထပ်လက်စွပ်လည်း အခိုးခံခဲ့ရပါတယ်”

တရားဟောဆရာ Cung Biak Hum ဟာ ထန်တလန်အခြေစိုက် နှစ်ခြင်းအသင်းတော် Thantlan Century က ဖြစ်ပြီး ကိုယ်ဝန်နဲ့ဇနီးသည်၊ ကလေးနှစ်ဦး ကျန်ရစ်ခဲ့ပါတယ်။

ချင်း ခရစ်ယာန်နှစ်ခြင်းအသင်းတော် Chin Baptist Convention ရဲ့ အတွင်းရေးမှူး Lod Harlinrel က ဒေသခံ ကာကွယ်ရေးတပ်ဖွဲ့တွေနဲ့ တိုက်ခိုက်မှုအတွင်း စစ်ကောင်စီတပ်တွေရဲ့လုပ်ရပ်တွေဟာ ရိုင်းစိုင်းတဲ့၊ လက်မခံနိုင်စရာ လုပ်ရပ်တွေဖြစ်ပြီး အခြေအနေကို ပိုမိုဆိုးရွားစေလိမ့်မယ်လို့ ပြောကြားခဲ့ပါတယ်။

“ပစ်တဲ့အခါမှာ ရန်သူလား၊ အရပ်သားလား စစ်တပ်က ဂရုတစ်စိုက် ခွဲခြားသင့်ပါတယ်။ လက်နက်တွေကို တွေ့ကရာလျှောက်မပစ်သင့်ပါဘူး။ စစ်တပ်ရဲ့ နမော်နမဲ့လုပ်ရပ်တွေ၊ ရိုင်းစိုင်းတဲ့လုပ်ရပ်တွေကို တောရော မြို့ပေါ်မှာပါ တွေ့ရပြီး ဒါတွေအားလုံးကို ရှောင်ရှားသင့်ပါတယ်”

“ဒီလိုမျိုးတွေ ဆက်လုပ်နေမယ်ဆိုရင် တိုက်ပွဲတွေဟာ လူမျိုးရေး၊ ဘာသာရေး ပဋိပက္ခအဖြစ် ဦးတည်သွားနိုင်ပါတယ်။ ဒါ့ကြောင့် ဒီလုပ်ရပ်ကို ကျွန်တော်တို့ ပြင်းပြင်းထန်ထန် ရှုတ်ချတာပါ”

ကချင်နှစ်ခြင်းအသင်းတော် Kachin Baptist Convention ရဲ့ ဥက္ကဌ Hkalam Samson ကလည်း စစ်ကောင်စီတပ်တွေ ဘုရားကျောင်းတွေမှာ တပ်စွဲပြီး သမ္မာကျမ်းနဲ့ အခြား ဘာသာရေးစာအုပ်စာတမ်းတွေ ဖျက်ဆီးတာ၊ ဘုရားကျောင်းတွေကို ပစ်မှတ်ထားတိုက်ခိုက်တာတွေကို ရှုတ်ချတဲ့ ချင်းနှစ်ခြင်းအသင်းတော်ရဲ့ ထုတ်ပြန်မှုကို ထောက်ခံတယ်လို့ ပြောပါတယ်။

“ဘုရားရဲ့အစေခံတွေဖြစ်တဲ့အတွက် ပြည်သူတွေနဲ့အတူ ကျွန်တော်တို့ ရပ်တည်ရပါမယ်။ အုပ်ချုပ်သူတွေနဲ့ ဆန့်ကျင်တာမျိုး ဖြစ်သွားနိုင်ပါတယ်။ ဒါပေမယ့် ဘာပဲဖြစ်နေဖြစ်နေ တရားမျှတမှုအတွက် ကျွန်တော်တို့ ရပ်တည်သွားမှာပါ”

တရားဟောဆရာ Cung Biak Hum အသတ်ခံရမှုကြောင့် ဘာသာရေးပဋိပက္ခဆီ ဦးတည်မသွားသင့်ဘဲ စစ်ကောင်စီတပ်တွေဟာ ခရစ်ယာန်၊ ဗုဒ္ဓဘာသာ မခွဲဘဲ အကုန်လုံးကို ဒုက္ခပေးနေတာဖြစ်တယ်လို့ ချင်းပြည်နယ် မင်းတပ်မြို့မှာ သီတင်းသုံးတဲ့ ဗုဒ္ဓဘာသာဘုန်းတော်ကြီး ဆရာတော် အရှင် မာဂါ၀က မိန့်ပါတယ်။

“သူတို့လုပ်ချင်ရင်၊ ရန်သူလို့မြင်လာရင် စစ်ကောင်စီတပ်တွေဟာ ခရစ်ယာန် ဘုရားကျောင်း၊ ဗုဒ္ဓဘာသာဘုန်းကြီးကျောင်းမရွေး ဖျက်ဆီးတာပါ။ ခရစ်ယာန်ညီအစ်ကိုတွေအနေနဲ့ ဒါကို နားလည်စေချင်တယ်။ ဘာသာ၊ လူမျိုးကွဲတာကို အခြေခံပြီး ရန်သူတွေအဖြစ် မရှုမြင်ကြဖို့ ဘုန်းကြီး တိုက်တွန်းချင်ပါတယ်။ စစ်ကောင်စီရဲ့လုပ်ရပ်က တော်တော်ဆိုးရွားပါတယ်”

Ref: RFA