ရိုဟင်ဂျာများကို အကြမ်းဖက်ရန်လှုံ့ဆော်ခဲ့သည့် အကောင့်များကို လွှဲပေးရန် Facebook ကို အမေရိကန်တရားရုံးတစ်ခု ညွှန်ကြား

စက်တင်ဘာ ၂၄၊ ၂၀၂၁
M-Media

-မြန်မာနိုင်ငံမှာ ရိုဟင်ဂျာတွေအပေါ် အကြမ်းဖက်မှုနဲ့ ပတ်သက်ဆက်နွယ်ပြီး ဖယ်ရှားခဲ့တဲ့ အကောင့်တွေမှာ ရေးသားခဲ့တဲ့ မှတ်တမ်းတွေကို ပေးအပ်ဖို့ ဆိုရှယ်မီဒီယာကုမ္ပဏီ Facebook ကို အမေရိကန်တရားရုံးတစ်ခုက ညွှန်ကြားလိုက်ပါတယ်။

အရင်က ဒီလိုတောင်းဆိုမှုမျိုး ရှိပေမယ့် အသုံးပြုသူတွေရဲ့ အချက်အလက်တွေကို ထုတ်ပေးတာဟာ အမေရိကန်ရဲ့ ဆက်သွယ်ရေးဥပဒေကို ချိုးဖောက်ရာရောက်တယ်ဆိုပြီး Facebook က တုန့်ပြန်ထားတာပါ။

ဗုဒ္ဓဟူးနေ့ ဝါရှင်တန်တရားရုံးတစ်ခုရဲ့ ညွှန်ကြားမှုမှာ ရိုဟင်ဂျာတွေအပေါ် ကျူးလွန်ခဲ့တဲ့ ရာဇဝတ်မှုတွေအတွက် စုံစမ်းဆေးဖို့ ဆောင်ရွက်မှုအတွင်း Facebook က ပူးပေါင်းဆောင်ရွက်မှု မရှိတာကို ဝေဖန်ခဲ့ပါတယ်။ ဒါ့အပြင် ဆက်သွယ်ရေးဥပဒေရဲ့ တားမြစ်ထားချက်ဟာ ရိုဟင်ဂျာတွေအပေါ် အမုန်းစကားပြောတာ၊ အကြမ်းဖက်ဖို့ လှုံဆော်တာတွေအတွက် အကြုံးမဝင်ဘဲ၊ ဒီအချက်အလက်တွေကို ထုတ်မပေးတာက ‘ရိုဟင်ဂျာတွေ ခံစားခံရတဲ့ ဖြစ်ရပ်ဆိုးမှာ ပူးပေါင်းပါဝင်သလို’ ဖြစ်သွားစေတယ်လို့ တရားရုံးက ဆိုပါတယ်။

Facebook ရဲ့ ပြောရေးဆိုခွင့်ရှိသူက ရိုဟင်ဂျာတွေအပေါ် အကြမ်းဖက်မှုနဲ့ပတ်သက်ပြီး ကုလရဲ့ စုံစမ်းစစ်ဆေးရေးအဖွဲ့ကို အချက်အလက်တွေပေးကာ ပူးပေါင်းဆောင်ရွက်နေပြီး ဝါရှင်တန်တရားရုံးက အခုညွှန်ကြားမှုအတွက် သုံးသပ်နေတယ်လို့ ပြောပါတယ်။

မြန်မာနိုင်ငံမှာ ရိုဟင်ဂျာတွေဟာ ၁၉၆၀ ပြည့်နှစ်တွေကတည်းက စစ်အာဏာရှင်တွေရဲ့ ဖိနှိပ်ညှင်းပမ်း​ မောင်းထုတ်မှုကို ခံခဲ့ရတာပါ။ ၂၀၁၇ ခုနှစ် ဩဂုတ်လ စစ်တပ်က ရခိုင်ပြည်နယ်မြောက်ပိုင်းမှာ ပြုလုပ်တဲ့ နယ်မြေရှင်းလင်းရေးအတွင်း ရိုဟင်ဂျာ ထောင်ချီ အသတ်ခံခဲ့ရပြီး ၇ သိန်းလောက် ဘင်္ဂလားဒေ့ရှ်ဖက်ကို ထပ်မံ ထွက်ပြေးခဲ့ရပါတယ်။

မြန်မာစစ်တပ်ဟာ ရိုဟင်ရွာပေါင်းများစွာကို မီးရှို့ဖျက်ဆီးခဲ့ပြီး အမျိုးသမီးတွေကို အဓမ္မကျင့်တာ၊ အစုလိုက်အပြုံလိုက် သတ်ဖြတ်တာ၊ ခိုးဆိုးလုယက်တာတွေလို ရာဇဝတ်မှုပေါင်းများစွာကို ကျူးလွန်ခဲ့တယ်လို့ မျက်မြင်သက်သေတွေက ပြောပါတယ်။

စစ်တပ်နဲ့ အဲဒီအချိန်က မြန်မာအစိုးရက ဒီသတင်းတွေကို ငြင်းဆိုပြီး ရိုဟင်ဂျာလက်နက်ကိုင်အဖွဲ့ အာဆာရဲ့ တိုက်ခိုက်မှုကို တုန့်ပြန်တာသာဖြစ်တယ်လို့ ပြောကြားခဲ့ပါတယ်။

ရခိုင်ပြည်နယ်မြောက်ပိုင်းမှာ ၂၀၁၂ ခုနှစ်ကလည်း မဘသအစွန်းရောက်တွေဟာ အဓမ္မကျင့်သတ်ဖြတ်မှုတစ်ခုကို အသုံးချပြီး ဆူပူအောင်လှုံဆော်ခဲ့တာကြောင့် ရိုဟင်ဂျာ၊ ကမန်နဲ့ အခြားအစ္စလာမ်ဘာသာဝင်တွေကို ပစ်မှတ်ထားတဲ့ တိုက်ခိုက်သတ်ဖြတ်မှုတွေ ပြည်နယ်အတွင်း ဖြစ်ပေါ်ခဲ့ပြီး၊ ဒီမီးပွားဟာ ပြည်မကိုပါ ကူးစက်ကာ အစ္စလာမ်ဘာသာဝင်တွေ တိုက်ခိုက်သတ်ဖြတ်ခံခဲ့ရပါတယ်။

လူ့အခွင့်အရေးအဖွဲ့တွေက မြန်မာနိုင်ငံမှာပြန့်နှံ့ခဲ့တဲ့ ရိုဟင်ဂျာနဲ့ မွတ်စလင်ဆန့်ကျင်ရေး လှုပ်ရှားမှုတွေမှာ Facebook ဟာ အဓိကကျခဲ့တယ်လို့ ၂၀၁၈ ခုနှစ်မှာ ထုတ်ပြန်ပါတယ်။

ရိုက်တာသတင်းဌာနရဲ့ စုံစမ်းဖော်ထုတ်မှုတစ်ခုမှာလည်း ရိုဟင်ဂျာနဲ့ မွတ်စလင်တွေကို ခွေးတွေ၊ မုဒိမ်းကောင်တွေ၊ လောက်တွေနဲ့ နှိုင်းကာ အမုန်းစကားပြောဆိုတဲ့၊ သတ်ဖြတ်ဖို့လှုံ့ဆော်တဲ့ Facebook က ပို့စ်ပေါင်း တစ်ထောင်ကျော်ကို ကိုးကားခဲ့ပါတယ်။

မြန်မာနိုင်ငံက မွတ်စလင်မုန်းတီးရေးလှုပ်ရှားမှုမှာ Facebook က အရေးယူဆောင်ရွက်မှု အလွန်နှေးကွေးတယ်လို့ ဝေဖန်ခံခဲ့ရပြီးတဲ့နောက် Facebook ဟာ ရိုဟင်ဂျာဆန့်ကျင်ရေး၊ မွတ်စလင်ဆန့်ကျင်ရေး အကောင့်တွေ၊ Group တွေကို ၂၀၁၈ ခုနှစ်နောက်ပိုင်းမှာ ဖယ်ရှားခဲ့ပါတယ်။

Ref : Reuters