ရာဇဝတ်မှုလုပ်ရပ်များကို အစ္စရေးက ဖုံးကွယ်ဖို့ကြိုးစားနေကြောင်း အီရန်ဝေဖန်

စက်တင်ဘာ ၂၈၊ ၂၀၂၁
M-Media

-အစ္စရေးဝန်ကြီးချုပ် နက်ဖ်တာလီ ဘန်းနက်ဟာ ‘အီရန်ကြောက်ရောဂါ’ ဖြန့်ကာ ဒေသတွင်းက သူတို့ရဲ့ ရာဇဝတ်လုပ်ရပ်တွေကို ဖုံးကွယ်ဖို့ ကြိုးစားနေတယ်လို့ ကုလဆိုင်ရာ အီရန်သံအမတ်က ပြောကြားလိုက်ပါတယ်။

ကုလသမဂ္ဂ အထွေထွေညီလာခံကို ပေးပို့တဲ့ ဘန်းနက်ရဲ့ မိန့်ခွန်းထဲမှာ အီရန်ကို ဝေဖန်ပြစ်တင်ထားမှုအတွက် အီရန်သံအမတ် မာဂျစ် တက် ရာဗန်ချီက Twitter စာမျက်နှာကနေ အခုလို တုန့်ပြန်လိုက်တာပါ။

ဘန်းနက်က အီရန်ရဲ့ လုပ်ရပ်တွေကို ဝေဖန်ခဲ့ပြီး၊ အစ္စရေးကိုဆန့်ကျင်တဲ့ ဒေသတွင်း လှုပ်ရှားမှုတွေကို အီရန်က ပံ့ပိုးကူညီပေးနေကြောင်း၊ အီရန်ရဲ့ နျူကလီးယားစီမံကိန်းဟာ စည်းအားလုံးကို ဖောက်နေပြီး အရေးကြီးတဲ့ အချိန်ကို ရောက်ရှိနေကြောင်း မိန့်ခွန်းမှာ ထည့်သွင်းပြောဆိုခဲ့ပါတယ်။

အစ္စရေးဟာ ဒေသတွင်းမှာ မုန်တိုင်းထန်တဲ့ ပင်လယ်ပြင်က မီးပြတိုက်သဖွယ်ဖြစ်နေတယ်လို့လည်း ဘန်းနက်က ဆိုပါတယ်။

ကုလက အီရန်အမြဲတမ်းကိုယ်စားလှယ် မာဂျစ် တက် ရာဗန်ချီက အစ္စရေးဝန်ကြီးချုပ်ရဲ့ ပြောကြားမှုဟာ မုသာဝါဒတွေလို့ ပြန်လည် တုန့်ပြန်ခဲ့ပါတယ်။

“နျူထိပ်ဖူး ရာနဲ့ချီရှိနေတဲ့ အစ္စရေးအစိုးရက ကျွန်တော်တို့ရဲ့ ငြိမ်းချမ်းတဲ့ နျူစီမံကိန်းကို ဝေဖန်စရာ ဘာအကြောင်းမှ မရှိပါဘူး”

ဘန်းနက်ရဲ့ မိန့်ခွန်းမှာ ပါလက်စတိုင်းကိစ္စ လုံး၀ မပါတာဟာ ပါလက်စတိုင်းတွေရဲ့အခွင့်အရေးကို ဆက်လက်ချိုးဖောက်ဖို့ စိတ်ပိုင်းဖြတ်ထားတယ်ဆိုတာကို ပြသနေကြောင်းလည်း အီရန်သံအမတ်က ဝေဖန်ခဲ့ပါတယ်။

ကုလသမဂ္ဂ အီရန်ကိုယ်စားလှယ်အဖွဲ့က ထုတ်ပြန်တဲ့ ကြေငြာချက်မှာ အစ္စရေးဝန်ကြီးချုပ်ရဲ့ ပြောကြားမှု​တွေဟာ အခြေအမြစ်မရှိကြောင်း၊ အစ္စရေးကပဲ အပြစ်မဲ့သယောင်ယောင် လှည့်စားဝါဒဖြန့်တာသာဖြစ်ကြောင်း ဖော်ပြထားပါတယ်။

“သူ့ရဲ့ ကြီးမားတဲ့ရည်ရွယ်ချက်က ရှင်းပါတယ်။ ပြီးခဲ့တဲ့ နှစ် ၇၀ အတွင်း ဒေသတွင်းမှာ အစ္စရေးရဲ့ ကျူးကျော်ဖျက်ဆီးတဲ့ မူဝါဒတွေ၊ ရာဇဝတ်မှုမြောက်တဲ့လုပ်ရပ်တွေကို ဖုံးကွယ်ဖို့ ဖြစ်ပါတယ်”

အစ္စရေးဟာ နယ်ချဲ့တိုင်းပြည်ဖြစ်ပြီး၊ ဂါဇာကမ်းမြှောင်ကို ကမ္ဘာ့အကြီးဆုံး အမိုးဖွင့်ထောင်အဖြစ် ပြုလုပ်ထားကြောင်း၊ အစ္စရေးခေါင်းဆောင် အဆက်ဆက်ကလည်း ဒေသတွင်းမှာ အကြမ်းဖက်လုပ်ရပ်တွေကို လုပ်ဆောင်ခဲ့ကြောင်း အီရန်ကိုယ်စားလှယ်အဖွဲ့ရဲ့ ကြေငြာချက်မှာ ထည့်သွင်းဖော်ပြထားပါတယ်။

ကမ္ဘာလုံးဆိုင်ရာ နျူကလီးယား ​မပြန့်ပွားရေးစာချုပ်မှာ အစ္စရေးက လက်မှတ်မထိုးတာ၊ နျူလက်နက်တွေ အမြောက်အများ ထုတ်လုပ်နေတာတွေနဲ့ပတ်သက်ပြီးလည်း ကိုယ်စားလှယ်အဖွဲ့က ဝေဖန်ထားပါတယ်။

Ref: Aljazeera