ဂီနီတွင် အာဏာသိမ်းစစ်ခေါင်းဆောင်က သမ္မတဖြစ်လာ

အောက်တိုဘာ ၂၊ ၂၀၂၁
M-Media

-အာဖရိကအလယ်ပိုင်း ဂီနီနိုင်ငံမှာ စက်တင်ဘာ ၅ ရက်နေ့က အာဏာသိမ်းလိုက်တဲ့ စစ်ခေါင်းဆောင် ဗိုလ်မှူး မမ်မာဒီ ဒွမ်ဘူယာဟာ မနေ့က အသွင်ကူးပြောင်းရေးအစိုးရရဲ့ သမ္မတအဖြစ် ကျမ်းကျိန်ပါတယ်။

မိမိတို့အစိုးရဟာ အသွင်ကူးပြောင်းရေးကာလမှာ အခြေခံဥပဒေ ပြန်လည်ရေးဆွဲတာ၊ ခြစားမှုတိုက်ဖျက်တာ၊ ရွေးကောက်ပွဲစနစ်ကို ပြုပြင်ပြောင်းလဲတာတွေလုပ်ဆောင်ကာ တိုင်းပြည်ကို ပြန်လည်တည်ဆောက်မှာဖြစ်ပြီး အဲဒီနောက်ပိုင်း လွတ်လပ်ပြီး တရားမျှတဲ့ ရွေးကောက်ပွဲကို ကျင်းပပေးသွားမယ်လို့ ဒွမ်ဘူယာက ဆိုပါတယ်။

ရွေးကောက်ပွဲကျင်းပတဲ့အခါ စစ်တပ်က သူအပါအဝင် ဘယ်သူမှ ဝင်ရောက်ယှဉ်ပြိုင်မှာ မဟုတ်ဘူးလို့လည်း ထည့်သွင်းပြောကြားခဲ့ပါတယ်။ ဒါပေမယ့် သူဦးဆောင်တဲ့ အသွင်ကူးပြောင်းရေးအစိုးရ သက်တမ်း ဘယ်လောက်ရှိမလဲဆိုတာ တိတိကျကျ မသိရပါဘူး။

အရင်အစိုးရတွေက ချုပ်ဆိုထားတဲ့ ဒေသတွင်းနဲ့ နိုင်ငံတကာ သဘောတူညီချက်တွေကို ဆက်လက်လိုက်နာ စောင့်ထိန်းသွားမယ်လို့လည်း ဒွမ်ဘူယာက ဆိုပါတယ်။

ဒွမ်ဘူယာဟာ ပြင်သစ်ရဲ့ နိုင်ငံခြားတပ်ဖွဲ့ဟာ အချိန်အတော်ကြာအမှုထမ်းခဲ့ပြီး အစ္စရေး၊ ယူကေနဲ့ အခြားနိုင်ငံတစ်ချို့မှာ စစ်သင်တန်းတွေလည်း တက်ခဲ့ပါတယ်။ ဂီနီသမ္မတ အလ်ဖာကွန်ဒီက ၂၀၁၈ ခုနှစ်မှာ ဒွမ်ဘူယာကို ပြန်ခေါ်ကာ အထူးတပ်ဖွဲ့ကို ဦးဆောင်ဖွဲ့စည်းခိုင်းခဲ့ပြီး အဲဒီအထူးတပ်ဖွဲ့ကပဲ ပြီးခဲ့တဲ့လမှာ ကွန်ဒီကို ဖြုတ်ချ အာဏာသိမ်းခဲ့တာ ဖြစ်ပါတယ်။

Ref: AFP