အီရန်နှင့် လေးကြိမ်မြောက် ဆွေးနွေးခဲ့ကြောင်း ဆော်ဒီအတည်ပြု

အောက်တိုဘာ ၄၊ ၂၀၂၁
M-Media

-ပြီးခဲ့တဲ့လအတွင်း အီရန်နဲ့ ဆွေးနွေးမှုတွေ လုပ်ဆောင်ခဲ့ကြောင်း ဆော်ဒီနိုင်ငံခြားရေး၀န်ကြီး ဖိုင်ဆဲလ် ဘင် ဖာရ်ဟန် အလ် ဆာအွဒ်က အတည်ပြုပြောကြားလိုက်ပါတယ်။

ဒေသတွင်းရန်ဖက်တွေဖြစ်တဲ့ ဆော်ဒီနဲ့ အီရန်တို့ဟာ နှစ်နိုင်အကြားရှိနေတဲ့ တင်းမာမှုတွေ လျှော့ချနိုင်ရေးအတွက် အခုနှစ် အစောပိုင်းကစလို့ ညှိနှိုင်းမှုတွေ လုပ်ဆောင်ခဲ့ကြောင်း သတင်းတွေ ထွက်ပေါ်နေတာပါ။

ဥရောပသမဂ္ဂ နိုင်ငံခြားရေးအကြီးအကဲ ဂျိူးဆက်ပ် ဘော်ရဲလ်နဲ့ မနေ့က မြို့တော်ရီယာ့ဒ်မှာ ပြုလုပ်တဲ့ သတင်းစာရှင်းလင်းပွဲမှာ ဆော်ဒီနိုင်ငံခြားရေး၀န်ကြီး မင်းသး ဖာရ်ဟန် အလ် ဆာအွဒ်က အီရန်နဲ့ စတုတ္ထအကြိမ် ဆွေးနွေးမှုကို စက်တင်ဘာ ၂၁ ရက်နေ့က ပြုလုပ်ခဲ့တယ်လို့ ဖွင့်ဟခဲ့ပါတယ်။

“ဒီဆွေးနွေးမှုတွေဟာ အကြိုအဆင့်သာ ရှိပါသေးတယ်။ နှစ်ဖက်အကြားမှာ ရှိနေတဲ့ ကိစ္စတွေကိုဖြေရှင်းရေး သူတို့ ဖောင်ဒေးရှင်းတစ်ခုချဖို့ ကျွန်တော် မျှော်လင့်ပါတယ်”

ဆွေးနွးမှုကို ဘယ်နေရာမှာလုပ်ခဲ့လဲ၊ ဘယ်အဆင့်တွေ တက်ရောက်ခဲ့သလဲဆိုတာ မင်းသား ဖိုက်ဆဲလ်က ထည့်မပြောသွားပါဘူး။ ဥရောပသမဂ္ဂ နိုင်ငံခြားရေးအကြီးအကဲ ဂျိုးဆက်ပ်ဘော်ရဲလ်က ဒီဆွေးနွေးမှုကို ကြိုဆိုတယ်လို့ ပြောကြားခဲ့ပါတယ်။

ဒေသတွင်း ပြဿနာတွေမှာ ဆန့်ကျင်ဖက်အဖွဲ့အစည်းတွေကို ထောက်ခံအားပေးနေတဲ့ အီရန်နဲ့ ဆော်ဒီတို့ဟာ ၂၀၁၆ ခုနှစ်ကတည်းက သံတမန်အဆက်အသွယ် ပြတ်တောက်နေတာ ဖြစ်ပါတယ်။

အခုနှစ် ဧပြီလကစလို့ နှစ်ဖက်အစိုးရ အဆင့်မြင့်အရာရှိ အစည်းအ၀ေး အနည်းဆုံး ၃ ကြိမ်လောက် လုပ်ထားပါတယ်။ အီရန်နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ စအီးဒ် ခါတစ်ဘ်ဇာဒါက ဆွေးနွေးမှုတွေမှာ အရှေ့အလယ်ပိုင်း လုံခြုံရေးနဲ့ပတ်သက်ပြီး သိသာတဲ့ တိုးတက်မှုတွေ ရရှိထားတယ်လို့ စက်တင်ဘာ ၂၃ ရက်နေ့မှာ ပြောကြားခဲ့ပါတယ်။

Ref: Aljazeera