တရုတ်မြောက်ပိုင်းတွင် ရေကြီးမှုကြောင့် အနည်းဆုံး ၁၅ ဦး သေဆုံး

အောက်တိုဘာ ၁၂၊ ၂၀၂၁

M-Media

-တရုတ်နိုင်ငံမြောက်ပိုင်း ရှန်းကျီပြည်နယ်မှာ အခုလအစောပိုင်းက မိုးသည်းထန်စွာရွာသွန်းပြီး ရေကြီးရေလျှံမှုတွေ ဖြစ်ခဲ့တာကြောင့် အနည်းဆုံး လူ ၁၅ ဦး သေဆုံးခဲ့တယ်လို့ သိရပါတယ်။

ကျောက်မီးသွေးအဓိကထွက်တဲ့ ဒီဒေသဟာ ပုံမှန်အားဖြင့် ခြောက်သွေ့ဒေသဖြစ်ပေမယ့် ပြီးခဲ့တဲ့ သီတင်းပတ်အတွင်း ၃ လစာမိုး ရွာသွန်းခဲ့တာပါ။ တရုတ်နိုင်ငံမှာ ကျောက်မီးသွေးပြတ်လတ်မှုကြောင့် စွမ်းအင်ထုတ်လုပ်မှု ပြဿနာ ရှိနေပြီး အခုရေကြီးမှုက ဒီအခြေအနေကို ပိုဆိုးစေတာ ဖြစ်ပါတယ်။

အခုရေကြီးမှုကြောင့် အဆောက်အဦး ၁၉၀၀၀ လောက် ပျက်ဆီးခဲ့ပြီး အဲဒီ အထဲက ၁၈၀၀၀ လောက်ဟာ ဆိုးဆိုးရွားရွား ပျက်ဆီးခဲ့တာပါ။ သေဆုံးသူ ၁၅ ဦး ရှိသလို ပျောက်ဆုံးနေသူတွေလည်း အများအပြား ရှိနေပါတယ်။

လူဦးရေ ၁.၇ သန်းလောက် ရေကြီးရေလျှံမှုကို ခံစားခဲ့ရပြီး အိုးအိမ်စွန့်ခွာ ထွက်ပြေးရသူအရေအတွက်က ၁၂၀၀၀၀ လောက် ရှိပါတယ်။

ဇူလိုင်လအတွင်းက နိုင်ငံအလယ်ပိုင်း ဟီနန်ပြည်နယ်မှာ စံချိန် ရေကြီးမှု ဖြစ်ပွားခဲ့ပြီး လူ ၃၀၀ ကျော် သေဆုံးခဲ့ပါတယ်။

Ref : CNA