အမျိုးသမီးများ စွမ်းဆောင်ရည်မြှင့်တင်ရေး နိုင်ငံလုံးဆိုင်ရာ ညီလာခံတစ်ခု ဆော်ဒီတွင် ကျင်းပမည်

အောက်တိုဘာ ၂၁၊ ၂၀၂၁
M-Media

-အစိုးရရဲ့ ပြောင်းလဲလာတဲ့ မူဝါဒတွေအလိုက် အမျိုးသမီးတွေကို စွမ်းဆောင်ရည်မြှင့်တင်ပေးနိုင်ရေး နိုင်ငံလုံးဆိုင်ရာ ညီလာခံတစ်ခုကို ဆော်ဒီအာရေဗျမှာ အောက်တိုဘာ ၂၂၊ ၂၃ – ၂ ရက်တာ ကျင်းပဖို့ ရှိနေပါတယ်။

ဒီညီလာခံကို Imam Mohammad bin Saud အစ္စလာမ်တက္ကသိုလ်က ကမကထပြု ကျင်းပမှာပါ။ ဒေသတွင်းနဲ့ နိုင်ငံတကာက ပညာရှင် ၆၀ ကျော်၊ ဆော်ဒီအစိုးရဝန်ကြီးတွေနဲ့ နိုင်ငံတစ်ဝှမ်း တက္ကသိုလ်တွေက ကျောင်းသား၊ ကျောင်းသူတွေ တက်ရောက်မှာ ဖြစ်ပြီး ခေါင်းစဉ် ၇ ခု ​ဆွေးနွေးသွားမှာပါ။

ညီလာခံကျင်းပရေး ကော်မတီဝင်ဖြစ်ပြီး၊ ကျောင်းသူရေးရာအသင်းရဲ့ ဒုတိယအကြီးအကဲ ဖြစ်တဲ့ ပရော်ဖက်ဆာ နောဖ် ဘင်သီ အလ် အဂျ်မီက ညီလာခံမှာ ထင်ရှားတဲ့ အမျိုးသမီးပညာရှင်အများအပြား တက်ရောက်လိမ့်မယ်လို့ ပြောပါတယ်။

“အမျိုးသမီးတွေရဲ့ အဆင့်အတန်း မြှင့်တင်ရေး၊ အမျိုးသမီးတွေရဲ့ လူမှုဘ၀နဲ့ ပုဂ္ဂလအခွင့်အရေး ကာကွယ်ပေးရေး၊ မူဝါဒချမှတ်တဲ့အဆင့်မှာ အမျိုးသမီးတွေကို ပါဝင်ခွင့်ပေးတဲ့ ဥပဒေတွေကြောင့် ဆော်ဒီအမျိုးသမီးတွေဟာ စွမ်းဆောင်ရည်မြှင့်တင်ရေးကို တော်တော်လေး အင်နဲ့အားနဲ့ လုပ်ဆောင်လာနိုင်ကြပါတယ်”

လူမှုဘ၀တည်ဆောက်မှုမှာ အရေးပါတဲ့ အခန်းကဏ္ဍကနေ ပါဝင်ရေး အမျိုးသမီးတွေရဲ့ လိုအပ်ချက်၊ တောင်းဆိုချက်တွေ၊ အမျိုးသမီးတွေရဲ့ ပညာရေးနဲ့ အသက်မွေးဝမ်းကြောင်းကဏ္ဍ စတာတွေနဲ့ပတ်သက်ပြီး ဆော်ဒီအစိုးရဥပဒေတွေကို ဘယ်လို ပြုပြင်ပြောင်းလဲမှု လုပ်သင့်လဲဆိုတဲ့ ကိစ္စနဲ့ ပတ်သက်ပြီးတော့လည်း ညီလာခံမှာ ဆွေးနွေးမှာ ဖြစ်ပါတယ်။

ညီလာခံကျင်းပမယ့် Imam Mohammad bin Saud အစ္စလာမ်တက္ကသိုလ်ရဲ့ ပါမောက္ခချုပ် ပရော်ဖက်ဆာ အဟ်မဒ် ဆလင်း အလ်-အေမီရီက ညီလာခံကျင်းပရေး ဆော်ဒီအစိုးရက ခွင့်ပြုခဲ့တာဟာ အမျိုးသမီးတွေကို စွမ်းဆောင်ရည်မြှင့်တင်ရေးနဲ့ပတ်သက်ပြီး ဘယ်လောက် အလေးထားလဲဆိုတာကို ပြသနေတာဖြစ်တယ်လို့ ပြောကြားခဲ့ပါတယ်။

ညီလာခံမှာ ဆော်ဒီအစိုးရနဲ့ အစိုးရမဟုတ်တဲ့ အဖွဲ့အစည်းတွေက ကိုယ်စားလှယ်တွေလည်း တက်ရောက်ဖို့ ရှိနေပါတယ်။

ဘုရင်ဆလ်မန်၊ အိမ်ရှေ့မင်းအသား မိုဟာမက် ဘင် ဆလ်မန်တို့ ဦးဆောင်တဲ့ ​ဆော်ဒီအစိုးရဟာ ပြီးခဲ့တဲ့နှစ်အနည်းငယ်အတွင်း အမျိုးသမီးတွေကို ကား​မောင်းခွင့်ပိတ်ထားတာ၊ အမျိုးသားအုပ်ထိန်းသူပါမှ ခရီးသွားခွင့်ရတာ စတဲ့ ရှေးရိုးစွဲ ကန့်သတ်ချက်တွေကို ပယ်ဖျက်ခဲ့ပြီး နိုင်ငံအတွင်းက တိုင်းပြည် ဖွံ့ဖြိုးတိုးတက်မှု စီမံကိန်းမှာ အမျိုးသမီးတွေ ပါဝင်နိုင်ရေး လမ်းဖွင့်ပေးခဲ့ပါတယ်။

ညီလာခံမှာ အမျိုးသမီးတွေကို စွမ်းဆောင်ရည်မြှင့်တင်ပေးဖို့နဲ့ပတ်သက်ပြီး ဆော်ဒီအစိုးရက ဆောင်ရွက်ထားတဲ့ စီမံကိန်းတွေကိုလည်း သုံးသပ်ဆွေးနွေးသွားမှာ ဖြစ်ပါတယ်။

Ref: Arab News