ကာဘွန်ထုတ်လွှတ်မှုကို ၂၀၂၆၀ တွင် သုညအထိ လျှော့ချရန် ဆော်ဒီ ရည်မှန်းထား

အောက်တိုဘာ ၂၄၊ ၂၀၂၁

M-Media

-သဘာ၀ပတ်ဝန်းကျင်ကို ထိခိုက်စေတဲ့ ကာဘွန်ထုတ်လွှတ်မှုကို ၂၀၆၀ ခုနှစ်ရောက်ရင် လုံး၀မရှိတော့အောင် လုပ်ဆောင်ဖို့ ရည်မှန်းထားကြောင်း ဆော်ဒီအာရေဗျက မနေ့မှာ ထုတ်ပြန်ကြေငြာလိုက်ပါတယ်။

ဆော်ဒီဟာ ကမ္ဘာ့အကြီးဆုံး ရေနံထုတ်လုပ်တဲ့နိုင်ငံပါ။ မနေ့က ဆော်ဒီရဲ့ ပထမဆုံး ပတ်၀န်းကျင်ထိန်းသိမ်းမှုဆိုင်ရာဖိုရမ် Saudi Green Initiative Forum ကို ပေးပို့တဲ့ မိန့်ခွန်းမှာ အိမ်ရှေ့မင်းသား မိုဟာမက် ဘင် ဆလ်မန်က ကာဘွန်ထုတ်လွှတ်မှု လျှော့ချမယ့် သူတို့ရဲ့ ရည်မှန်းချက်ကို ထည့်သွင်း ဖော်ပြထားပါတယ်။

ရေနံထုတ်လုပ်ရောင်းချမှုဟာ ဆော်ဒီစီးပွားရေးရဲ့ အဓိကကျောရိုး ဖြစ်ပါတယ်။ ဒါပေမယ့် ဘုရင် ဆလ်မန်၊ အိမ်ရှေ့မင်းသား မိုဟာမက် ဘင် ဆလ်မန်တို့ ဦးဆောင်တဲ့ ဆော်ဒီအစိုးရဟာ စီးပွားရေး ရေနံအပေါ် အလွန်အမင်း မှီခိုရမှုကို လျော့ချနိုင်ရေး ပြီးခဲ့တဲ့ နှစ်တွေမှာ ကြိုးစားလာခဲ့ပါတယ်။

အိမ်ရှေ့မင်းသားက ဆော်ဒီဟာ ၂၀၃၀ မတိုင်ခင် သစ်ပင် သန်းပေါင်း ၄၅၀ စိုက်ပျိုးဖို့၊ စိုက်ပျိုးလို့မရတဲ့ ဒေသတွေကို ပြုပြင်ဖို့၊ ကုန်းတွင်းပိတ် ရီယာ့ဒ်မြို့ကို ပိုမိုတိုးတက်အောင်လုပ်ဆောင်ဖို့၊ ကာဘွန်ထုတ်လွှတ်မှု တန်ပေါင်း သန်း ၂၀၀ လျှော့ချဖို့ ရည်မှန်းထားကြောင်း မိန့်ခွန်းမှာ ထည့်သွင်းပြောကြားခဲ့ပါတယ်။

၂၀၆၀ ခုနှစ်မှာ ကာဘွန်ထုတ်လွှတ်မှု လုံး၀မရှိဖို့ ရည်မှန်းထားတဲ့ နိုင်ငံတွေထဲမှာ ရုရှားနဲ့ တရုတ်တို့ ပါ၀င်ပြီး အမေရိကန်နဲ့ ဥရောပသမဂ္ဂတို့က ဒီရည်မှန်းချက်ကို ၂၀၅၀ အရောက်မှာ ပြည့်မီအောင် ဆောင်ရွက်မှာပါ။

၂၀၃၀ ခုနှစ်မှာ မီသိန်းဓာတ်ငွေ့ထုတ်လွှတ်မှု ၃၀ ရာခိုင်နှုန်းလျော့ချရေး ကမ္ဘာလုံးဆိုင်ရာ ရည်မှန်းချက် ပြည့်မီအောင် ဆောင်ရွက်မယ်လို့လည်း ဆော်ဒီက ကတိပြုထားပါတယ်။

Ref: Aljazeera