ရာသီဥတုဖောက်ပြန်မှုကုစားရေး စီမံကိန်းနှစ်ခုအတွက် အာရပ်နိုင်ငံများ ဒေါ်လာ ၁၀ ဘီလီယံ အသုံးပြုမည်

အောက်တိုဘာ ၂၆၊ ၂၀၂၁

M-Media

-အရှေ့အလယ်ပိုင်း စိမ်းလန်းရေးစီမံကိန်း(MGI) အတွက် ထိပ်သီးအစည်းအ၀ေးကို တနင်္လာနေ့က ဆော်ဒီအာရေဗျနိုင်ငံမှာ စတင်ကျင်းပခဲ့ပြီး အမေရိကန်ဒေါ်လာ ၁၀.၃၉ ဘီလီယံ ကုန်ကျမယ့် ရာသီဥတုဖောက်ပြန်မှု ကုစားရေး စီမံကိန်းနှစ်ခုကို ချပြခဲ့ပါတယ်။

ဒီစီမံကိန်းနှစ်ခုမှာ ကာဘွန်ထုတ်လွှတ်မှု လျှော့ချရေး၊ ရာသီဥတုဖောက်ပြန်မှု ကုစားရေးအစီအစဥ် အများအပြား ပါ၀င်မှာပါ။ စီမံကိန်းမှာ ပါ၀င်မယ့် အရှေ့အလယ်ပိုင်းဒေသမှာ သစ်ပင်ပေါင်း ဘီလီယံ ၅၀ စိုက်ပျိုးရေး စီမံချက်ဟာ ကမ္ဘာ့အကြီးဆုံး သစ်ပင်စိုက်တဲ့လှုပ်ရှားမှု ဖြစ်လာမှာဖြစ်ပြီး၊ ကမ္ဘာသစ်တောပမာဏကို ၅ ရာခိုင်နှုန်း တိုးတက်စေမှာ ဖြစ်ပါတယ်။

စီမံကိန်းကုန်ကျငွေရဲ့ ၁၅ ရာခိုင်နှုန်းကို ဆော်ဒီအာရေဗျက ကျခံကာ၊ ကျန်ပမာဏကို အရှေ့အလယ်ပိုင်းနိုင်ငံတွေ ထည့်၀င်မှာ ဖြစ်ပါတယ်။

ဒေသတွင်း ကာဘွန်ထုတ်လွှတ်မှုမရှိတဲ့ စီးပွားရေးဖော်ဆောင်နိုင်ဖို့၊ ကမ္ဘာလူဦးရေ သန်းပေါင်း ၇၅၀ ကျော် အသုံးပြုနိုင်မယ့် သန့်ရှင်းလောင်စာ ထုတ်လုပ်နိုင်ရေး ကမ္ဘာလုံးဆိုင်ရာ စီမံကိန်းတစ်ခု အကောင်အထည်ဖော်ဖို့အတွက် ဆော်ဒီအာရေဗျက ရန်ပုံငွေတစ်ရပ် မတည်သွားမယ်လို့လည်း ထိပ်သီးအစည်းအ၀ေး အဖွင့်မိန့်ခွန်းမှာ ဆော်ဒီ အိမ်ရှေ့မင်းသား မိုဟာမက် ဘင် ဆလ်မန်က ပြောကြားခဲ့ပါတယ်။

MGI ထိပ်သီးအစည်းအ၀ေးကို အမေရိကန်ရဲ့ ပထမဆုံး ရာသီဥတုဆိုင်ရာ အထူးကိုယ်စားလှယ် ဂျွန်ကယ်ရီအပါအ၀င် ကမ္ဘာတစ်၀ှမ်းက ခေါင်းဆောင်တွေ တက်ရောက်ခဲ့ပြီး တစ်ပတ်တာ ကျင်းပသွားမှာ ဖြစ်ပါတယ်။

Ref : Arab News