ရိုဟင်ဂျာခေါင်းဆောင် အသတ်ခံရမှုအတွက် လူ ၁၇၀ ကျော်ကို ဘင်္ဂလားဒေ့ရှ် ဖမ်းဆီးထား

နိုဝင်ဘာ ၁၊ ၂၀၂၁
M-Media

-ထင်ရှားတဲ့ ရိုဟင်ဂျာခေါင်းဆောင် မိုဟီဘူလာ အသတ်ခံရမှုအတွက် လူပေါင်း ၁၇၂ ဦးကို ဖမ်းဆီးထားတယ်လို့ ဘင်္ဂလားဒေ့ရှ် ရဲတပ်ဖွဲ့က ထုတ်ပြန်ပါတယ်။

အသက် ၄၈ နှစ်အရွယ် ကျောင်းဆရာ မိုဟီဘူလာဟာ ကော့ဆက်ဘဇားမှာရှိတဲ့ ရိုဟင်ဂျာ ဒုက္ခသည်စခန်းက သူ့ရုံးခန်းရှေ့မှာ စက်တင်ဘာလနှောင်းပိုင်းက သေနတ်နဲ့ ပစ်ခတ်သတ်ဖြတ်ခြင်း ခံခဲ့ရတာပါ။

ဒီကိစ္စနဲ့ပတ်သက်လို့ ပြီးခဲ့တဲ့သီတင်းပတ်တွေအတွင်း ဘင်္ဂလားဒေ့ရှ် ရဲတပ်ဖွဲ့ဟာ ဒုက္ခသည်စခန်းက လူပေါင်း ၁၇၀ ကျော်ကို ဖမ်းဆီးခဲ့ပါတယ်။ အဲဒီအထဲက ၁၀ ဦးဟာ မိုဟီဘူလာကို သတ်ဖြတ်မှုမှာ ပါဝင်ခဲ့တယ်လို့ သံသယရှိခံရသူတွေဖြစ်ကြောင်း ဘင်္ဂလားလားဒေ့ရှ် အထူးရဲတပ်ဖွဲ့ APB အကြီးအကဲ နိုင်မူလ် ဟက်က ပြောပါတယ်။

ဒီကိစ္စနဲ့ပတ်သက်ပြီး သက်ဆိုင်သူတွေကို ဆက်လက် ဖမ်းဆီးသွားမယ်လို့လည်း ဟက်က ပြောပါတယ်။ ရိုဟင်ဂျာလက်နက်ကိုင်အဖွဲ့တစ်ခုဖြစ်တဲ့ ARSA ဟာ မိုဟီဘူလာရဲ့ အသက်အန္တရာယ်ကို ခြိမ်းခြောက်တယ်ဆိုတဲ့ သတင်းတွေ အရင်က ထွက်ခဲ့ဖူးပါတယ်။

မိုဟီဘူလာရဲ့ မိသားစုတွေကိုတော့ ဘင်္ဂလားဒေ့ရှ်ရဲတပ်ဖွဲ့က ဘေးလွတ်ရာကို ပြောင်းရွှေ့ထားပါတယ်။ ဖမ်းဆီးထားသူတွေထဲမှာ ၁၁၄ ဦးက သူတို့ကိုယ်သူတို့ ARSA အဖွဲ့ဝင်တွေလို့ ပြောကြားကြောင်း APB ရဲ့ ထုတ်ပြန်ချက်မှာ ဖော်ပြထားပါတယ်။

မိုဟီဘူလာဟာ ‘ငြိမ်းချမ်းရေးနဲ့ လူ့အခွင့်အရေးဆိုင်ရာ အာရကန်ရိုဟင်ဂျာအဖွဲ့အစည်း’ (ARPSH) ကို တည်ထောင်ကာ ရိုဟင်ဂျာအရေးကို ဆောင်ရွက်နေသူဖြစ်ပါတယ်။ အမေရိကန်သမ္မတ ဒေါ်နယ်ထရမ့်လက်ထက် နိုင်ငံတကာက အဖိနှိပ်ခံလူမျိုးစု ကိုယ်စားလှယ်တွေကို အိမ်ဖြူတော်မှာ ခေါ်ယူတွေ့ဆုံစဉ်အတွင်း မိုဟီဘူလာတစ်ယောက် ရိုဟင်ဂျာတွေကို ကိုယ်စားပြုပြီး တက်ရောက်ခွင့်ရခဲ့ပါတယ်။

၂၀၁၇ ခုနှစ် မြန်မာစစ်တပ်က ရိုဟင်ဂျာတွေကို သတ်ဖြတ်မောင်းထုတ်မှုအပြီး ဖွဲ့စည်းခဲ့တဲ့ ARPSH ဟာ ရိုဟင်ဂျာတွေ ဖိနှိပ်ညှင်းပမ်းခံရမှု၊ စစ်တပ်ရဲ့ သတ်ဖြတ်မှု၊ အဓမ္မကျင့်မှုတွေအကြောင်း မိသားစုတစ်ခုချင်းစီကနေ စနစ်တကျ မှတ်တမ်းယူတာမျိုး လုပ်ဆောင်ခဲ့တဲ့ အဖွဲ့အစည်းလည်း ဖြစ်ပါတယ်။

ARSA အဖွဲ့ဝင်တွေ ဒုက္ခသည်စခန်းတွေမှာ မရှိဘူးလို့ ဘင်္ဂလားဒေ့ရှ်က အရင်တုန်းက ငြင်းဆိုထားပြီး စခန်းအတွင်း သတ်ဖြတ်မှုတွေဟာ ရာဇဝတ်ဂိုဏ်းတွေ၊ မူးယစ်ဂိုဏ်းတွေကြောင့်ဖြစ်တယ်လို့ ပြောကြားထားတာ ဖြစ်ပါတယ်။

Ref: Arab News