ကိုဗစ်ကို သောက်ဆေးဖြင့် ကု၍ ရပြီ

နိုဝင်ဘာ ၅၊ ၂၀၂၁
M-Media

-ကိုဗစ်ရောဂါကုသရာမှာ အသုံးပြုနိုင်မယ့် သောက်ဆေးတစ်မျိုးကို ယူကေ ကျန်းမာရေးဝန်ကြီးဌာနက အသိအမှတ်ပြုကာ အသုံးပြုခွင့်ပေးလိုက်ပါတယ်။

Molnupiravir လို့ အမည်ပေးထားတဲ့ အဲဒီသောက်ဆေးကို Merck နဲ့ Ridgeback Biotherapeutics ကုမ္ပဏီတို့ ပူးပေါင်းထုတ်လုပ်တာဖြစ်ပြီး ကိုဗစ်ဖြစ်ကြောင်း တွေ့ရှိပြီး၊ ဒါမှမဟုတ် ကိုဗစ်လက္ခဏာပေါ်ပြီး ချက်ခြင်းသောက်ရမယ်လို့ ယူကေအစိုးရရဲ့ ကျန်းမာရေးနဲ့ ဆေးဝါးအဖွဲ့ (MHRA) က မနေ့မှာ ထုတ်ပြန်ပါတယ်။

ဒါဟာ ကိုဗစ်ကုသရေးမှာ သောက်ဆေးတစ်မျိုးကို အစိုးရကျန်းမာရေးအဖွဲ့အစည်းက ပထမဆုံး ခွင့်ပြုချက် ပေးလိုက်တာ ဖြစ်ပါတယ်။ အမေရိကန်အစိုးရ ကျန်းမာရေး တာဝန်ရှိသူတွေကလည်း ဒီဆေးကို အသုံးပြုခွင့် ပေးမလားဆိုတာ ဒီလအတွင်း ဆုံးဖြတ်သွားမှာ ဖြစ်ပါတယ်။

ကိုဗစ်ကြောင့် ကမ္ဘာတစ်ဝှမ်း သေဆုံးသူအရေအတွက်ဟာ ၅.၂ သန်းကျော် ရှိနေပြီး တိုက်ဖျက်ဖို့အတွက် လက်ရှိအချိန်အထိ ကာကွယ်ဆေးကိုသာ အဓိက အားထားနေရတာဖြစ်ပါတယ်။ ပိုးသတ်ဆေး Remdesivir နဲ့ စတီယိုရွိုက်ဆေး Dexamethasone လို ကုသဆေးတွေ ရှိပေမယ့် ဆေးရုံတက်ရတဲ့ လူနာတွေမှာသာ အသုံးပြုနိုင်တာ ဖြစ်ပါတယ်။

ကိုဗစ်လက္ခဏာ ပြင်းထန်တဲ့သူတွေကို ရောဂါစဖြစ်ဖြစ်ခြင်း Molnupiravir ဆေး တိုက်မယ်ဆိုရင် ဆေးရုံတက် ကုသမှု ခံယူရတာ ဒါမှမဟုတ် အသက်ဆုံးရှုံးတာတွေကို ၅၀ ရာခိုင်နှုန်းလောက် ကာကွယ်နိုင်ကြောင်း ပြီးခဲ့တဲ့လမှာ ထုတ်ပြန်ခဲ့တဲ့ စမ်းသပ်မှုရလဒ်မှာ တွေ့ခဲ့ရပါတယ်။ အဲဒီကတည်းက ဒီဆေးကို ကမ္ဘာတစ်ဝှမ်းက အာရုံစိုက်ခဲ့ကြတာပါ။

ယူကေမှာ ဒီဆေးကို Lagevrio လို့ အမည်ပေးကာ ဖြန့်ချီမှာဖြစ်ပြီး ကိုဗစ်သမားတွေဟာ တစ်ရက် ၂ ကြိမ်နဲ့ ၅ ရက် သောက်ရာမှာ ဖြစ်ပါတယ်။ Molnupiravir ကို ကိုဗစ်ကာကွယ်ဆေးအဖြစ် အသုံးပြုနိုင်မလားဆိုတာကို စမ်းသပ်နေပြီး နောက်ဆုံးအဆင့်ကို ရောက်ရှိနေပြီ ဖြစ်ပါတယ်။

လက်ရှိလေ့လာမှုတွေအရ ဒီဆေးဟာ ကူးစက်မြန် ပုံပြောင်းကိုဗစ် Delta အပါအဝင် ကိုဗစ်မျိုးကွဲအားလုံးအတွက် ထိရောက်မှုရှိတယ်ဆိုတာ ​ တွေ့ရပါတယ်။

Ref: Reuters