အီရတ်ဝန်ကြီးချုပ်ကို ဗုံးတပ်ဒရုန်းဖြင့် လုပ်ကြံမှုဖြစ်ပွား

နိုဝင်ဘာ ၇၊ ၂၀၂၁
M-Media

-အီရတ်ဝန်ကြီးချုပ် မွတ်စ်တာဖာ အလ်-ကဒ်ဟီမီရဲ့ နေအိမ်ကို မနေ့က ဒရုန်းနဲ့ တိုက်ခိုက်မှု ဖြစ်ပွားခဲ့ပြီး ဝန်ကြီးချုပ်က အထိအခိုက်မရှိဘဲ လွတ်မြောက်ခဲ့ပါတယ်။

ဖောက်ခွဲရေးပစ္စည်း တပ်ဆင်ထားတဲ့ ဒရုန်း ၃ စင်းဟာ ဝန်ကြီးချုပ်နေအိမ်ကို ချဉ်းကပ်လာရာမှာ ၂ စင်းကို အစောင့်တွေက ဖျက်ဆီးနိုင်ခဲ့ပြီး တစ်စင်းက အိမ်တော်ကို ထိခိုက်ကာ ပေါက်ကွဲခဲ့ပါတယ်။ ဒီအဖြစ်အပျက်အတွင်း လုံခြုံရေးအစောင့် ၆ ဦး ဒဏ်ရာ ရရှိခဲ့ပါတယ်။

တိုက်ခိုက်မှုကို ဘယ်အဖွဲ့အစည်းက လုပ်ဆောင်လဲဆိုတာ မသိရပါဘူး။ ဝန်ကြီးချုပ် အိမ်တော်ဟာ အစိုးရရုံးတွေ နိုင်ငံခြားသံရုံးတွေရှိရာ ဘဂ္ဂဒတ်မြို့ရဲ့ လုံခြုံရေးထူထပ်တဲ့ အစိမ်းရောင်ဇုန်အတွင်း ရှိနေတာ ဖြစ်ပါတယ်။ အီရတ်စစ်တပ်အကြီးအကဲရဲ့ ပြောရေးဆိုခွင့်ရှိသူက အစိမ်းရောင်ဇုန်ရဲ့လုံခြုံရေး တည်ငြိမ်တယ်လို့ ထုတ်ပြန်ခဲ့ပါတယ်။

အောက်တိုဘာ ၁၀ ရက်နေ့ ရွေးကောက်ပွဲမှာ အကြီးအကျယ်ရှုံးနိမ့်ခဲ့တဲ့ အီရန်ကျောထောက်နောက်ခံပြု နိုင်ငံရေးပါတီတွေကို ထောက်ခံသူတွေနဲ့ လုံခြုံရေးတပ်ဖွဲ့တွေအကြား တင်းမာမှုဖြစ်ပွားပြီး ၂ ရက်အကြာမှာ ဒီတိုက်ခိုက်မှု ပေါ်ပေါက်လာတာပါ။

ဝန်ကြီးချုပ် ကဒ်ဟီမီနဲ့ ထိပ်တန်းဗိုလ်ချုပ်တွေ ဒီကနေ့ အစည်းအဝေးလုပ်နေတဲ့ ဗီဒီယိုကို ဝန်ကြီးချုပ်ရုံးက ထုတ်ပြန်ခဲ့ပါတယ်။ ဝန်ကြီးချုပ်ရုံးရဲ့ ကြေငြာချက်မှာ ဝန်ကြီးချုပ်ကို လုပ်ကြံဖို့ ရည်ရွယ်တဲ့ ဒီတိုက်ခိုက်မှုဟာ သူရဲဘောကြောင်တဲ့ အကြမ်းဖက်တိုက်ခိုက်မှုဖြစ်တယ်လို့ ဖော်ပြထားပါတယ်။

သမ္မတ ဘာဟမ် ဆာလီကလည်း ဒီတိုက်ခိုက်မှုကို ရှုတ်ချခဲ့ပါတယ်။

Ref: Reuters