နိုင်ငံငယ်များကို ဗိုလ်ကျမည်မဟုတ်ဟု တရုတ်က အာဆီယံမိန့်ခွန်းတွင် ထည့်ပြော

နိုဝင်ဘာ ၂၂၊ ၂၀၂၁
M-Media

-ပတ်ဝန်းကျင်က နိုင်ငံငယ်တွေအပေါ် အနိုင်ကျင့်ဗိုလ်ကျမှာ မဟုတ်ဘူးလို့ တရုတ်သမ္မတ ရှီကျင့်ဖျင်က ဒီနေ့ပြုလုပ်တဲ့ တရုတ်-အာဆီယံ ထိပ်သီးအစည်းအဝေးမှာ ပြောကြားလိုက်ပါတယ်။

အဖွင့်မိန့်ခွန်းမှာ ရှီက အခုအစည်းအဝေးဟာ ဒေသတွင်း ငြိမ်းချမ်းရေး၊ တည်ငြိမ်ရေးနဲ့ ဖွံ့ဖြိုးတိုးတက်ရေးတို့ကို အထောက်အကူဖြစ်စေလိမ့်မယ်လို့ ထည့်သွင်းပြောဆိုခဲ့ပါတယ်။

အာဆီယံအဖွဲ့ဝင်နိုင်ငံတွေဖြစ်ကြတဲ့ ဖိလစ်ပိုင်၊ ဘရူနိုင်း၊ ဗီယက်နမ်၊ မလေးရှားတို့နဲ့ တရုတ်တို့ဟာ တောင်တရုတ်ပင်လယ် ပိုင်နက်အငြင်းပွားမှု ပြဿနာ ရှိနေတာပါ။ တရုတ်က တောင်တရုတ်ပင်လယ်ပြင်တစ်ခုလုံး သူတို့ရဲ့ပိုင်နက်ဖြစ်တယ်လို့ ပြောဆိုထားပြီး အငြင်းပွားနေတဲ့ နယ်နမိတ်တွေမှာ ကျွန်းတုတွေဆောက်တာ၊ စစ်စခန်းဆောက်တာလို နယ်မြေစိုးမိုးဖို့ ကြိုးစားမှုတွေ ရှိနေတဲ့အတွက် အာဆီယံနိုင်ငံတွေနဲ့ မကြာခဏဆိုသလို တင်းမာမှုတွေ ဖြစ်နေတာ ဖြစ်ပါတယ်။

တောင်တရုတ်ပင်လယ်က သူတို့ပိုင်တဲ့ သန္တာကျောက်တန်းကို သွားတဲ့ သင်္ဘောတွေကို တရုတ်ကမ်းခြေစောင့် သင်္ဘောတွေက ရေပိုက်နဲ့ထိုးပြီး ပြန်လှည့်ခိုင်းတဲ့ လတ်တလောကိစ္စအတွက် ဖိလစ်ပိုင်သမ္မတ ရော်ဒရီဂို ဒူတာတေးက ကြာသာပတေးနေ့မှာ တရုတ်ကို ပြင်းပြင်းထန်ထန် ဝေဖန်ပြောဆိုခဲ့ပါတယ်။

ဒီကနေ့ အဖွင့်မိန့်ခွန်းမှာ ရှီက မိမိတို့ဟာ နိုင်ငံငယ်တွေအပေါ် ဗိုလ်ကျစိုးမိုးရေးဝါဒ ကျင့်သုံးမှာမဟုတ်ဘဲ၊ မိမိတို့ရဲ့ အင်းအားကြီးမားမှုကို အားပြုပြီး အနိုင်အထက်ပြုတာမျိုး လုပ်မှာမဟုတ်ကြောင်း၊ ‘ကြားဝင်စွက်ဖက်ရေးဝါဒ’ ပျက်သုဉ်းသွားအောင် အာဆီယံအဖွဲ့နဲ့ ပူးပေါင်းဆောင်ရွက်မှာဖြစ်ကြောင်း ထည့်သွင်းပြောဆိုခဲ့ပါတယ်။

“တရုတ်ဟာ အာဆီယံအတွက် အိမ်နီးချင်းကောင်း၊ မိတ်ကောင်းဆွေကောင်းအဖြစ် အရင်ကရှိခဲ့ပြီး၊ အခုလည်းရှိနေသလို နောင်အမြဲတမ်း ဒီလိုပဲ ရှိသွားမှာပါ”

Ref: Reuters