မြန်မာလူငယ်များအပေါ် လွှမ်းမိုးနိုင်ရေး စစ်ကောင်စီကို ဒေါ်လာသန်းချီလှူသည်ဆိုသည့်သတင်းကို တရုတ်ငြင်း

နိုဝင်ဘာ ၂၂၊ ၂၀၂၁

M-Media

-အာဏာသိမ်းစစ်ကောင်စီ ပညာရေးဝန်ကြီးဌာနကို ယွမ် ၁.၁၆ ဘီလီယံ (ဒေါ်လာ သန်း ၁၈၀) တရုတ်သံရုံးက လှူဒါန်းတယ်ဆိုပြီး Twitter မှာ ပြန့်နှံ့နေတဲ့သတင်းဟာ မဟုတ်ဘူးလို့ မြန်မာနိုင်ငံမှာရှိတဲ့ တရုတ်သံရုံးက ငြင်းချက်ထုတ်လိုက်ပါတယ်။ 

“တရုတ်အစိုးရကိုယ်စား မြန်မာနိုင်ငံမှာရှိတဲ့ တရုတ်သံရုံးဟာ မြန်မာပညာရေးဝန်ကြီးဌာနကို နိုဝင်ဘာ ၁၂ ရက်နေ့က ယွမ် ၁.၆ ဘီလီယံ လှူဒါန်းခဲ့ပြီး ၂၀၂၂ ခုနှစ် မြန်မာနိုင်ငံ မူလတန်းနဲ့ အလယ်တန်းကျောင်းတွေက ကျောင်းသားတွေအားလုံးကို အခမဲ့ နေ့လည်စာကျွေးဖို့ ဖြစ်ပါတယ်။ မြန်မာနိုင်ငံရဲ့ အနာဂတ်မျိုးဆက်ဟာ တရုတ်ရဲ့ဖွံ့ဖြိုးတိုးတက်မှုကို ရရှိခံစားနိုင်ဖို့ ဆောင်ရွက်တာဖြစ်တယ်လို့ မြန်မာနိုင်ငံဆိုင်ရာ တရုတ်သံအမတ် ချန်ဟိုင်က ပြောပါတယ်” လို့ တရုတ်လိုရေးထားတဲ့ စခရင်ရှော့တစ်ခု နိုဝင်ဘာ ၁၆ ရက်နေ့ကစပြီး Twitter က တရုတ်နိုင်ငံသားတွေအကြားမှာ ပြန့်နှံ့နေတာဖြစ်ပါတယ်။

တရုတ်အလံ၊ တရုတ်လိုရေးထားတဲ့ ‘မြန်မာနိုင်ငံတရုတ်သံရုံး’ ဆိုတဲ့ နောက်ခံမှာ တရုတ်တာဝန်ရှိသူ နှစ်ဦး ထိုင်နေတဲ့ဓာတ်ပုံလည်း စခရင်ရှော့မှာ ပါဝင်ပါတယ်။

ဒါပေမယ့် ဒီဓာတ်ပုံဟာ နိုဝင်ဘာ ၁၂ ရက်နေ့က ကိုဗစ်ကာကွယ်ဆေးတွေ မြန်မာနိုင်ငံကို ပေးအပ်တုန်းက တရုတ်သံရုံးမှာ လွှင့်တင်ခဲ့တဲ့ ဓာတ်ပုံဖြစ်ပြီး၊ မြန်မာပညာရေးဝန်ကြီးဌာနကို ဒေါ်လာသန်းချီပေးတယ်ဆိုတဲ့သတင်းဟာလည်း ခိုင်လုံမှုမရှိကြောင်း AFP သတင်းဌာနရဲ့ စစ်ဆေးမှုမှာ တွေ့ခဲ့ရပါတယ်။ 

မြန်မာနိုင်ငံက တရုတ်သံရုံးကလည်း ဒီသတင်းက မဟုတ်ဘူးလို့ ငြင်းပါတယ်။ Twitter မှာ ပြန့်နှံ့နေတဲ့ သတင်းဟာ လုပ်ကြံရေးသားထားတာဖြစ်ပြီး ဓာတ်ပုံကလည်း နိုဝင်ဘာ ၁၂ ရက်နေ့ ကိုဗစ်ကာကွယ်ဆေးလှူတဲ့အချိန်က ဓာတ်ပုံဖြစ်ကြောင်း သံရုံးပြောရေးဆိုခွင့်ရှိသူက AFP သတင်းဌာနကို ပြောကြားခဲ့ပါတယ်။

“အခုနှစ်အစကတည်းက တရုတ်နိုင်ငံဟာ မြန်မာနိုင်ငံကို ကိုဗစ်ကာကွယ်ဆေး အလုံးရေ ၈.၉ သန်းနဲ့ ကိုဗစ်တိုက်ဖျက်ရေးပစ္စည်းတွေ အကြိမ်ကြိမ် ပေးအပ်ခဲ့ပါတယ်။ မြန်မာကျောင်းသားတွေ၊ မသန်စွမ်းသူတွေ၊ ဆေးရုံတက်နေရတဲ့ ကလေးငယ်တွေနဲ့ အခြားသူတွေအတွက်လည်း တရုတ်သံရုံးက ထောက်ပံ့လှူဒါန်းမှု တော်တော်များများ လုပ်ပေးခဲ့ပါတယ်”

Ref: AFP