အာဆီယံမှ လယ်ယာထွက်ကုန် ဒေါ်လာ ဘီလီယံ ၁၅၀ ဖိုး တရုတ်က ဝယ်ယူမည်

နိုဝင်ဘာ ၂၃၊ ၂၀၂၁
M-Media

-လာမယ့် ၅ နှစ်အတွင်း အာဆီယံနိုင်ငံတွေကနေ လယ်ယာထွက်ကုန် ဒေါ်လာ ဘီလီယံချီ ဝယ်ယူသွားမှာဖြစ်ပြီး၊ အကူအညီတွေလည်း ပေးအပ်သွားမယ်လို့ တရုတ်သမ္မတ ရှီကျင့်ဖျင်က မနေ့က တရုတ်-အာဆီယံ ထိပ်သီးအစည်းအဝေးမှာ ပြောကြားလိုက်ပါတယ်။

ဒီအစည်းအဝေးမှာ မြန်မာအဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကို တရုတ်နဲ့ အာဆီယံက တက်ခွင့် မပေးပါဘူး။

အင်အားနည်းတဲ့ အိမ်နီးချင်းနိုင်ငံတွေကို အနိုင်ကျင့်မှာမဟုတ်ဘူးလို့ အဖွင့်မိန့်ခွန်းမှာ သမ္မတရှီက ပြောကြားခဲ့သလို၊ နောက်ထပ် ၅ နှစ်အတွင်း အာဆီယံနိုင်ငံတွေကနေ အဆင့်မီတဲ့ လယ်ယာထွက် ကုန်ပစ္စည်း ကန်ဒေါ်လာ ဘီလီယံ ၁၅၀ ဖိုး ဝယ်ယူတင်သွင်းဖို့ အဆင်သင့်ဖြစ်နေပြီလို့လည်း ဆိုပါတယ်။

ပြီးခဲ့တဲ့နှစ်ကစလို့ တရုတ်ဟာ ဥရောပသမဂ္ဂကို​ ကျော်တက်ပြီး အာဆီယံရဲ့ အကြီးဆုံး ကုန်သွယ်ဖက်နိုင်ငံ ဖြစ်လာခဲ့ပါတယ်။ အာဆီယံနဲ့ တရုတ်တို့အကြား မိတ်ဖက်ဆက်ဆံမှုဟာ နှစ်ပေါင်း ၃၀ ပြည့်ခဲ့ပါပြီ။

အာဆီယံနိုင်ငံတွေ ကိုဗစ်အလွန် စီးပွားရေး ပြန်လည်ထူထောင်ဖို့အတွက် နောက်ထပ် ၃ နှစ်အတွင်း ဒေါ်လာ ၁.၅ ဘီလီယံ တန်ဖိုးရှိတဲ့ အကူအညီတွေ ပေးအပ်သွားမယ်လို့လည်း တရုတ်သမ္မတ ရှီကျင့်ဖျင်က ထည့်သွင်း ပြောဆိုခဲ့ပါတယ်။

Ref: RFA