တရုတ်က သည်းခံနိုင်စွမ်းကုန်အောင် လုပ်နေသည်ဟု ထိုင်ဝမ်ကာကွယ်ရေးဝန်ကြီးပြော

နိုဝင်ဘာ ၂၉၊ ၂၀၂၁
M-Media

-တရုတ်ဟာ မိမိတို့စစ်တပ် သည်းခံနိုင်စွမ်းကုန်အောင် လုပ်ဆောင်နေပြီး မိမိတို့မှာလည်း ပြန်လည်တုန့်ပြန်နိုင်စွမ်း ရှိနေတယ်လို့ ထိုင်ဝမ် ကာကွယ်ရေးဝန်ကြီးက ဒီကနေ့မှာ ပြောကြားလိုက်ပါတယ်။

တရုတ်လေတပ်က တိုက်လေယာဉ်၊ နျူဗုံးသယ်နိုင်တဲ့ ဗုံးကြဲလေယာဥ် စုစုပေါင်း ၂၇ စီးဟာ မနေ့က ထိုင်ဝမ်ရဲ့ လေကြောင်းရန် ကာကွယ်ရေးဇုန်ထဲကို ထပ်မံဝင်ရောက်လာတဲ့အတွက် ထိုင်ဝမ်တိုက်လေယာဉ်တွေ ပျံတက်ပြီး သတိပေးခဲ့ရပါတယ်။

ထိုင်ဝမ်ကာကွယ်ရေးဝန်ကြီး ချူကိုချန်းက တရုတ်မှာ ကျူးကျော်နိုင်တဲ့စွမ်းအားရှိရင် မိမိတို့မှာလည်း တန်ပြန်တုန့်ပြန်နိုင်တဲ့စွမ်းအား ရှိတယ်လို့ မနေ့က လွှတ်တော်အစည်းအဝေးအပြီးမှာ သတင်းထောက်တွေကို ပြောကြားခဲ့ပါတယ်။

တရုတ်လေတပ်ဟာ ထိုင်ဝမ်လေပိုင်နက်ထဲကို လွန်ခဲ့တဲ့ တစ်နှစ်ကျော်လောက်ကစတင်ပြီး အကြိမ်ကြိမ် ကျူးကျော်ဝင်ရောက်နေတာဖြစ်ပါတယ်။ ထိုမ်ဝင်ကို သူတို့ပိုင်နက်လို့ တရုတ်က သတ်မှတ်ထားပြီး လိုအပ်ရင် စစ်အင်အားသုံး သိမ်းပိုက်သွားမယ်လို့လည်း ပြောထားပါတယ်။

ထိုင်ဝမ်ကတော့ သူတို့ဟာ လွတ်လပ်တဲ့ ဒီမိုကရက်တစ်နိုင်ငံလို့ ခံယူထားတာပါ။

ကာကွယ်ရေးဝန်ကြီး ချူကိုချန်းက တရုတ်ရဲ့ မနေ့က ကျူးကျော်ဝင်ရောက်မှုဟာ အလွန်ဆိုးရွားတဲ့ အခြေအနေမျိုးဖြစ်ပြီး အနာဂတ်စီမံကိန်းအတွက် တရုတ်ကအသုံးပြုတဲ့ လေယာဉ်တွေကို စောင့်ကြည့်လေ့လာသွားမယ်လို့ ထည့်သွင်းပြောဆိုခဲ့ပါတယ်။

ထိုင်ဝမ်ကာကွယ်ရေးဝန်ကြီးဌာနရဲ့ ထုတ်ပြန်ချက်မှာတော့ တရုတ်ရဲ့ လေယာဉ်အုပ်ကို သတိပေးဖို့ တိုက်လေယာဉ်တွေ စေလွှတ်ခဲ့ပြီး ဒုံးကျည်ကာကွယ်ရေးစနစ်ကိုလည်း အသင့်ပြင်ခဲ့တယ်လို့ ဖော်ပြထားပါတယ်။

တရုတ်ဖက်က ဒီလိုပျံသန်းမှုတွေဟာ မိမိတို့ရဲ့ အချုပ်အခြာအာဏာကို ကာကွယ်ဖို့ဖြစ်တယ်လို့ အရင်က ထုတ်ပြန်ဖူးပါတယ်။

Ref: Reuters