အာဆီယံပွဲများကို မြန်မာစစ်အာဏာရှင် တက်ခွင့်ရှိသည်ဟု ကမ္ဘောဒီးယားဝန်ကြီးချုပ် ပြော

ဒီဇင်ဘာ ၆၊ ၂၀၂၁
M-Media

-မြန်မာနိုင်ငံကိုလာပြီး စစ်ကောင်စီနဲ့စကားပြောဖို့ စီစဉ်ထားတယ်လို့ ကမ္ဘောဒီးယားဝန်ကြီးချုပ်က ဒီကနေ့မှာ ပြောကြားလိုက်ပြီး၊ အာဆီယံအစည်းအဝေးတွေမှာ စစ်ကောင်စီကို ဖိတ်သင့်တယ်လို့ ဆိုပါတယ်။

ကမ္ဘောဒီးယားဟာ လာမယ့်နှစ်မှာ အာဆီယံအဖွဲ့ဥက္ကဌအဖြစ် တာဝန်ယူမှာပါ။

တရုတ်ကငွေကြေးထောက်ပံ့ထားတဲ့ ဆောက်လုပ်ရေးစီမံကိန်းဖွင့်ပွဲအခမ်းအနားမှာ ကမ္ဘောဒီးယား ဝန်ကြီးချုပ် ဟွန်ဆန်က အာဆီယံအစည်းအဝေးတွေမှာ ၁၀ နိုင်ငံစလုံး ပါဝင်ရမယ်လို့ ပြောကြားခဲ့ပါတယ်။

“မြန်မာဟာ အာဆီယံမိသားစုဝင်နိုင်ငံပါ။ အစည်းအဝေးတွေကိုတက်ပိုင်ခွင့် သူတို့မှာ ရှိပါတယ်”

ဟွန်ဆန်ဟာ ပြီးခဲ့တစ်ပတ်က စစ်ကောင်စီခန့် နိုင်ငံခြားရေးဝန်ကြီး ဦး၀ဏ္ဏမောင်လွင်ကို ကမ္ဘောဒီးယားလာဖို့ ဖိတ်ခေါ်ထားပြီး ဒီဇင်ဘာ ၇ ရက်နေ့ လာရောက်မှာ ဖြစ်ပါတယ်။ မြန်မာနိုင်ငံကို မကြာခင် သွားရောက်ဖို့ရှိတယ်လို့လည်း ဒီကနေ့မိန့်ခွန်းမှာ ဟွန်ဆန်က ထည့်သွင်းပြောဆိုခဲ့ပါတယ်။

“ဗိုလ်ချုပ်မှူးကြီးမင်းအောင်လှိုင်နဲ့ အလုပ်တွဲလုပ်နိုင်ရေး ကျွန်တော် နေပြည်တော်ကိုသွားရောက်ဖို့ အလားအလာ တော်တော်လေးကောင်းပါတယ်။ ခေါင်းဆောင်ပိုင်းနဲ့အလုပ်မလုပ်ရင် ကျွန်တော် ဘယ်သူနဲ့ တွဲလုပ်ရမလဲ”

အဖွဲ့ဝင်နိုင်ငံတွေရဲ့ ပြည်တွင်းရေးကို ဝင်ရောက်မစွက်ရဆိုတဲ့ အာဆီယံပဋိဉာဏ်ကို ဟွန်ဆန်က ထောက်ပြခဲ့ပြီး ဒီပဋိဉာဏ်အရ ဘယ်အဖွဲ့ဝင်နိုင်ငံကိုမှ မောင်းထုတ်ခွင့်မရှိဘူးလို့လည်း ဆိုပါတယ်။

ကမ္ဘောဒီးယားဝန်ကြီးချုပ် ဟွန်ဆန်ဟာ အာဏာကို နှစ်ပေါင်း ၄၀ နီးပါး ရယူထားပြီး အတိုက်အခံတွေကို ပြင်းပြင်းထန်ထန်နှိပ်ကွပ်တဲ့အတွက် နိုင်ငံတကာအသိုင်းအ၀ိုင်းရဲ့ ဝေဖန်မှုကို ခံနေရသူပါ။ သူ့နေရာကို စစ်တပ်အကြီးအကဲအဖြစ် တာဝန်ထမ်းဆောင်နေတဲ့ သားဖြစ်သူက ဆက်ခံလိမ့်မယ်လို့ ဟွန်ဆန်က ပြီးခဲ့တဲ့တစ်ပတ်မှာ လူသိရှင်ကြား ပြောကြားခဲ့ပါတယ်။

Ref: Reuters