စီးပွားရေးပြန်လာလုပ်ရပ် ဂျပန်ကို စစ်ကောင်စီက မေတ္တာရပ်ခံ

ဒီဖင်ဘာ ၈၊ ၂၀၂၁
M-Media

-မြန်မာနိုင်ငံမှာ ရင်းနှီးမြှုပ်နှံမှုတွေ ပြန်လာလုပ်ဖို့နဲ့ ရပ်ဆိုင်းထားတဲ့ အကူအညီပေးရေး စီမံကိန်းတွေ ပြန်လည်ပတ်ဖို့အတွက် စစ်ကောင်စီက ဂျပန်အစိုးရကို မေတ္တာရပ်ခံခဲ့ပါတယ်။

စစ်ကောင်စီမှာ ရင်းနှီးမြှုပ်နှံမှုနဲ့ နိုင်ငံခြားဆက်ဆံရေးဝန်ကြီးအဖြစ် တာဝန်ယူထားတဲ့ ဦးအောင်နိုင်ဦး ဂျပန်သတင်းဌာနတွေနဲ့ မနေ့က အင်တာဗျူးမှာ ဒီလိုပြောကြားလိုက်တာပါ။

“မြန်မာနိုင်ငံမှာ စီးပွားရေး ပြန်စဖို့၊ ဖြစ်နိုင်ရင် ထပ်မံချဲ့ထွင်ပေးဖို့ ဂျပန်စီးပွားရေးအသိုင်းအ၀ိုင်းကို တိုက်တွန်းပေးပါလို့ ကျွန်တော် သတင်းစကားပါးချင်ပါတယ်။ အရင်ကထက်မတူဘဲ ပိုကောင်းတဲ့ စီးပွားရေး အသိုက်အဝန်းဖြစ်အောင် ကျွန်တော်တို့ လုပ်ဆောင်နေပါတယ်”

ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက်ပိုင်း နိုင်ငံရေး မတည်မငြိမ်ဖြစ်လာရာကနေ လက်ရှိမှာတော့ အခြေအနေတွေ ပုံမှန်ပြန်ဖြစ်သွားပြီလို့လည်း ဦးအောင်နိုင်ဦးက ပြောပါတယ်။

ရွေးကောက်ခံအစိုးရကို ဖြုတ်ချအာဏာသိမ်းမှု၊ လူထုအပေါ် အကြမ်းဖက်သတ်ဖြတ်မှုတွေလုပ်တဲ့ မြန်မာစစ်တပ်ရဲ့ လုပ်ရပ်တွေကြောင့် ဂျပန်အစိုးရဟာ မြန်မာနိုင်ငံမှာ လုပ်ဆောင်နေတဲ့ အကူအညီပေးရေး စီမံကိန်းတွေကို ရပ်ဆိုင်းလိုက်သလို၊ ဂျပန်စီးပွားရေးလုပ်ငန်းတွေကိုလည်း မြန်မာနိုင်ငံကထွက်ဖို့ ညွှန်ကြားထားတာ ဖြစ်ပါတယ်။

ဦးအောင်နိုင်ဦးက လက်ရှိ စစ်ကောင်စီဟာ နိုင်ငံတကာစီးပွားရေးလုပ်ငန်းတွေကို ပြန်လည်ကြိုဆိုဖို့ လုပ်ဆောင်နေကြောင်း၊ မြန်မာနိုင်ငံက အခြေအနေတွေကို နိုင်ငံတကာမီဒီယာတွေက ချဲ့ကားပြောဆိုနေသလို၊ ဝန်ထမ်းတွေအလုပ်မဆင်းတဲ့ CDM လှုပ်ရှားမှုကလည်း မရှိတော့သလောက်ဖြစ်နေကြောင်း ထည့်သွင်းပြောဆိုခဲ့ပါတယ်။

စစ်အာဏာသိမ်းမှုနောက်ပိုင်း မြန်မာနိုင်ငံရဲ့ စီးပွားရေးဟာ အကြီးအကျယ် ကျဆင်းသွားပြီး အလုပ်လက်မဲ့နှုန်း များလာကာ၊ ကုန်စျေးနှုန်းတွေလည်း အလွန်အမင်း မြင့်တက်လာပါတယ်။ ဘဏ်လုပ်ငန်း ရပ်ဆိုင်းလုနီးပါးဖြစ်နေသလို၊ ငွေကြေးတန်ဖိုးလည်း ကျဆင်းနေပါတယ်။ စစ်ကောင်စီရဲ့ လူထုအပေါ် ဖိနှိပ်အကြမ်းဖက်မှုတွေကြောင့် နိုင်ငံတကာရင်းနှီးမြှုပ်နှံမှုလုပ်ငန်းတွေလည်း တိုင်းပြည်ကနေ ထွက်ခွာနေပါတယ်။

ကမ္ဘာ့ဘဏ်၊ ကုလသမဂ္ဂနဲ့ နိုင်ငံတကာအဖွဲ့အစည်းတွေက လာမယ့်နှစ် မြန်မာ့စီးပွားရေးဟာ ဒေသတွင်း အများဆုံးအဖြစ် ၁၈ ရာခိုင်နှုန်း ကျဆင်းမှာဖြစ်ပြီး သန်းနဲ့ချီတဲ့လူတွေ ငတ်မွတ်ခေါင်းပါးမှု၊ အစာရေစာပြတ်လပ်မှုနဲ့ ကြုံတွေ့ရနိုင်တယ်လို့ သတိပေးထားပါတယ်။

Ref: Japan Today