ခရီးသွားမြို့တွင် ခွေးသား၊ ကြောင်သား ကင်းစင်ရမည်ဟု ဗီယက်နမ်ကတိပြု

ဒီဇင်ဘာ ၁၀၊ ၂၀၂၁
M-Media

-ကုလသမဂ္ဂရဲ့ ကမ္ဘာ့အမွေအနှစ်အဖြစ် သတ်မှတ်ခံထားရတဲ့ ခရီးသွားမြို့ Hoi An မှာ ခွေးသား၊ ကြောင်သား စားသုံးမှု ကင်းအောင် လုပ်​​ဆောင်သွားမယ်လို့ ဗီယက်နမ်က ကတိပြုပြောဆိုလိုက်ပါတယ်။

ဗီယက်နမ်မှာ တစ်နှစ်ကို ခွေးအကောင်အရေ ၅ သန်းလောက် စားသုံးကြပြီး တရုတ်ပြီးရင် ကမ္ဘာပေါ်မှာ ခွေသားစားမှု ဒုတိယမြောက်အမြင့်ဆုံး တိုင်းပြည်ပါ။ ခွေးသားစားခြင်းဟာ ကံဆိုးမှုတွေကို ဖယ်ရှားပေးနိုင်တယ်လို့ ဗီယက်နမ်လူမျိုးတွေက ယုံကြည်ကြပါတယ်။

ဆိပ်ကမ်းမြို့ Hoi An အာဏာပိုင်တွေက ခွေးသားနဲ့ ကြောင်သား ရောင်းချမှု၊ စားသုံးမှု ကင်းစင်​အောင် လုပ်ဆောင်မယ်လို့ နိုင်ငံတကာ တိရစ္ဆာန်ကာကွယ်ရေးအဖွဲ့ Four Paws International နဲ့ ဒီကနေ့မှာ လက်မှတ်ရေးထိုး သဘောတူခဲ့ပါတယ်။

“ခွေးရူးပြန်ရောဂါ တိုက်ဖျက်ရေး၊ ခွေးသား၊ ကြောင်သား ရောင်းချမှု တားဆီးရေးတွေကနေတစ်ဆင့် တိရစ္ဆာန်တွေ သာယာ၀ပြောရေး ကျွန်တော်တို့ ကူညီဆောင်ရွက်သွားမှာဖြစ်သလို ဒီမြို့ကို ခရီးသွားကဏ္ဍမှာ အဓိကနေရာတစ်ခု ဖြစ်လာရေး လုပ်ဆောင်သွားမှာဖြစ်ပါတယ်” လို့ ဒုတိယမြို့တော်ဝန် ငုယင်သီဟန်က ပြောပါတယ်။

Four Paws International အဖွဲ့ တာဝန်ရှိသူ ဂျူလီဆန်းဒါက ဒီသဘောတူညီချက်ဟာ အရေးပါတဲ့ ဆောင်ရွက်ချက်တစ်ခုဖြစ်ပြီး၊ ဗီယက်နမ်က အခြားဒေသတွေလည်း အတုယူသင့်တယ်လို့ ပြောကြားခဲ့ပါတယ်။

ဗီယက်နမ်မှာ ခွေးသား၊ ကြောင်သားစားသုံးမှုဟာ အရင်ကတည်းက ရှိလာတဲ့ ဓလေ့ထုံးတမ်းတစ်ခု ဖြစ်ပါတယ်။ အခုနောက်ပိုင်း ကြောင်ကို အိမ်မွေးတိရစ္ဆာန်မွေးလာကြတဲ့အတွက် ကြောင်သားစားသုံးမှု လျော့သွားပေမယ့် မြို့တော်ဟနွိုင်းအပါအဝင် နိုင်ငံအနှံ့အပြားမှာ ခွေးသားကို ကျယ်ကျယ်ပြန့်ပြန့် စားသုံးနေကြဆဲ ဖြစ်ပါတယ်။

Ref: Bangkok Post