၂၀၂၁ အာရပ်ဖလားပြိုင်ပွဲတွင် အလ်ဂျီးရီးယားအသင်း ဗိုလ်စွဲ

ဒီဇင်ဘာ ၁၉၊ ၂၀၂၁
M-Media

-ကာတာနိုင်ငံမှာ မနေ့က ကျင်းပခဲ့တဲ့ အာရပ်ဖလား ဗိုလ်လုပွဲမှာ အလ်ဂျီးရီးယားအသင်းက တူနီးရှားအသင်းကို ၂ ဂိုးပြတ်နဲ့အနိုင်ရပြီး ဗိုလ်စွဲသွားပါတယ်။

ပွဲချိန်မိနစ် ၉၀ အတွင်း ဂိုးမရှိသရေကျနေတာကြောင့် အချိန်ပိုကစားရာ ၉၉ မိနစ်မှာ အမီရ်ဆာယွဒ်၊ အချိန်ပို နောက်ဆုံးမိနစ်မှာ ယာစီနီ ဘရာဟီမီတို့က အနိုင်ဂိုးတွေ သွင်းယူပေးခဲ့တာဖြစ်ပါတယ်။

အလ်ဂျီးရီးယားဟာ အာရပ်ဖလားပြိုင်ပွဲမှာ လူငယ်ကစားသမားအများစုနဲ့ ဝင်ရောက်ယှဉ်ပြိုင်တာဖြစ်ပါတယ်။ ပထမဆုံးအနိုင်ဂိုးသွင်းခဲ့တဲ့ အမီရ်ဆာယွဒ်ဟာ အသက် ၃၁ နှစ်ရှိပြီဖြစ်ပြီး ပြိုင်ပွဲတစ်ခုလုံးမှာ ဝင်မကစားခဲ့ရပဲ ဗိုလ်လုပွဲမှာလည်း မိနစ် ၆၀ ကျော်မှ လူစားဝင်ကစားရတာပါ။

အလ်ဂျီးရီးယားဟာ ၂၀၁၉ ခုနှစ် အာဖရိကဖလားချန်ပီယံဖြစ်ပြီး လာမယ့်လ ကင်မရွန်းမှာ ကျင်းပမယ့် ၂၀၂၂ အာဖရိကဖလားပြိုင်ပွဲမှာ ချန်ပီယံဘွဲ့ကို ကာကွယ်ရမှာဖြစ်ပါတယ်။

တတိယနေရာလုပွဲမှာ ကာတာက အီဂျစ်ကို ပင်နယ်တီအဆုံးအဖြတ်နဲ့ အနိုင်ရခဲ့ပါတယ်။

အာရပ်ဖလား ဘောလုံးပြိုင်ပွဲ ကျင်းပတာ ၁၀ ကြိမ်ရှိပြီဖြစ်ပြီး အခုအကြိမ်ဟာ ဖီဖာရဲ့ စီမံမှုအောက်မှာ ပထမဆုံး ကျင်းပတဲ့ပြိုင်ပွဲ ဖြစ်ပါတယ်။

တူနီးရှားတိုက်စစ်မှူး ဆိုက်ဖူဒင် ဂျာဇီရီက စုစုပေါင်း သွင်းဂိုး ၄ ဂိုးနဲ့ ဂိုးသွင်းအများဆုံး ကစားသမား ဖြစ်ခဲ့ပြီး၊ ပြိုင်ပွဲတစ်လျှောက် အကောင်းဆုံးကစားသမားဆုကို အလ်ဂျီးရီးယားကစားမသား ယာစီနီ ဘရာဟီမီ၊ အကောင်းဆုံးဂိုးသမားဆုကို အလ်ဂျီးရီးယား ဂိုးသမား ရာအီစ် အလ်ဘိုလ်ဟီတို့က ရရှိခဲ့ပါတယ်။

အခုပြိုင်ပွဲမှာ စုစုပေါင်း ၂၃ သင်း ပါဝင်ယှဉ်ပြိုင်ခဲ့ပြီး နောက်ဆုံးအဆင့်မှာ ၁၆ သင်း အုပ်စု ၄ ခုခွဲကာ ကစားခဲ့တာ ဖြစ်ပါတယ်။

Ref: Aljazeera