မြန်မာနယ်စပ်အနီးရှိ စာသင်ကျောင်းများတွင် ထိုင်းအာဏာပိုင်များ ကယ်ဆယ်ရေးသင်တန်းပေးနေ

ဒီဇင်ဘာ ၂၅၊ ၂၀၂၁
M-Media

-မြန်မာစစ်တပ်က နယ်စပ်မှာ လက်နက်ကြီးတွေ၊ လေကြောင်းတိုက်ခိုက်မှုတွေ တိုးမြှင့် လုပ်ဆောင်လာတာကြောင့် ထိုင်းဘက်က စာသင်ကျောင်းတွေမှာ ကလေးတွေကို အရေးပေါ် ကယ်ဆယ်ရေးသင်တန်းတွေ ပေးနေပါတယ်။

မယ်ဟွန်ဆွန်ပြည်နယ် မယ်ဆာရီယန်ခရိုင်က ကျောင်းတွေမှာ ကျောင်းသားတွေနဲ့ ဆရာဆရာမတွေကို အမှတ် ၃၆ နယ်ခြားစောင့်တပ်က မ​နေ့ကစတင်ပြီး ကယ်ဆယ်ရေးသင်တန်းတွေပေးကာ အစမ်းလေ့ကျင့်မှုတွေ လုပ်ဆောင်ပေးနေတာ ဖြစ်ပါတယ်။

ကရင်အမျိုးသားအစည်းအရုံး ထိန်းချုပ်ရာ ​ထိုင်းနယ်စပ်က လေကေးကော်ဒေသမှာ စစ်တပ်က ပြီးခဲ့တဲ့တစ်ပတ်ကစလို့ ထိုးစစ်ဆင် တိုက်ခိုက်မှုတွေ လုပ်နေတာပါ။ လက်နက်ကြီးတွေနဲ့ ပစ်တာ၊ လေကြောင်းက တိုက်ခိုက်တာတွေလည်း လုပ်ဆောင်နေပြီး ကျည်တွေ ထိုင်းဖက်ခြမ်းကိုကျတဲ့ သတင်းတွေလည်း တက်လာပါတယ်။

မနက်က လက်နက်ကြီးနဲ့ ပစ်ခတ်မှုမှာ ထိုင်းဖက်ခြမ်းက ​လူနေအိမ်တစ်လုံးပေါ် ကျသွားခဲ့ပြီး ထိုင်းရဲနဲ့ စစ်တပ်တို့က လာရောက်စစ်ဆေးမှုတွေ လုပ်ဆောင်ခဲ့ပါတယ်။

“နယ်ခြားစောင့်တပ်ဖွဲ့ဟာ ကျောင်းမှာ ဗုံးခိုနေရာတွေ ဆောက်ပေးခဲ့ပြီး ဒီနေ့မှာတော့ ဒီနေရာကို လျင်လျင်မြန်မြန်နဲ့ အန္တရာယ်ကင်းကင်း ဘယ်လိုသွားရလဲဆိုတာကို သင်ပေးတာပါ။ ဗုံးခိုနေရာက ၈ မီတာရှည်ပြီး၊ ၅ မီတာကျယ်ကာ ၁.၅ မီတာမြင့်ပါတယ်။ အဲဒီအထဲမှာ ကျောင်းသားနဲ့ ဆရာအားလုံး ၃ ရက် စားလို့ရမယ့် အစားအစာတွေလည်း သိမ်းထားပါတယ်” လို နယ်ခြားစောင့်အဖွဲ့ တာဝန်ရှိသူ ဗိုလ်မှူးကြီး Somphop Jaiboon က ပြောပါတယ်။

မြန်မာတိုက်ပွဲကြောင့် အန္တရာယ်ရှိနိုင်တဲ့ရွာတွေက ရွာသားတွေကိုလည်း နယ်ခြားစောင့်တပ်ဖွဲ့က ဘေးအန္တရာယ်ကင်းရေး အရေးပေါ်သင်တန်းတွေ ပေးနေတယ်လို့ ဗိုလ်မှူးကြီးက ဆိုပါတယ်။

Ref: Nationthailand