အမျိုးသမီးများ တစ်ဦးတည်းခရီးသွားမှုကို တာလီဘန် ပိတ်ပင်

ဒီဇင်ဘာ ၂၇၊ ၂၀၂၁
M-Media

-မိသားစုဝင်အမျိုးသားတစ်ဦး မပါဝင်ဘဲ အမျိုးသမီးတွေ ခရီးဝေးသွားတာ၊ ကားမောင်းရင်း သီချင်းဖွင့်တာတွေကို ပိတ်ပင်တဲ့ အမိန့်ကို တာလီဘန်က မနေ့မှာ ထုတ်ပြန်ခဲ့ပြီး အာဖဂန်လူ့အဖွဲ့အစည်းကို ပိုမိုတင်းတင်းကြပ်ကြပ် ချုပ်ကိုင်အုပ်ချုပ်ဖို့ ကြိုးစားမှုတွေထဲက တစ်ခု ဖြစ်ပါတယ်။

ဩဂုတ် ၁၅ ရက်နေ့ အာဖဂန်တစ်နိုင်ငံလုံးကို သိမ်းပိုက်ခဲ့ပြီးနောက်ပိုင်း တာလီဘန်ဟာ ပုဂ္ဂလိက ကဏ္ဍတွေမှာ အမျိုးသမီးတွေကို အလုပ်လုပ်ခွင့် မပေးတော့သလို၊ မိန်းကလေးငယ်တွေကို အလယ်တန်းအဆင့်ကစပြီး ကျောင်းတက်ခွင့်လည်း မပေးတော့ပါဘူး။

တာလီဘန် အကုသိုလ်တားဆီးရေး ဝန်ကြီးဌာနရဲ့ မနေ့က ထုတ်ပြန်ချက်မှာ အမျိုးသမီးတွေ ၄၅ မိုင်ကျော်ပြီး တစ်ယောက်တည်း ခရီးသွားလာခွင့်ကို ​ခွင့်ပြုမှာမဟုတ်တော့ဘူးလို့ ဖော်ပြထားပြီး၊ ပုဝါမဆောင်းတဲ့ အမျိုးသမီးတွေကို ကားစီးခွင့်မပေးဖို့လည်း ကားပိုင်ရှင်တွေကို သတိပေးခဲ့ပါတယ်။

အမျိုးသမီးတွေ ခရီးဝေးသွားချင်ရင် မိသားစုဝင်ထဲက အမျိုးသားတစ်ဦး အဖော်အဖြစ် လိုက်ပါရမယ်လို့ ဝန်ကြီးဌာန ပြောရေးဆိုခွင့်ရှိသူ ဆာဒစ် အကစ်ဖ် မူဟာဂျီရ်က ပြောပါတယ်။

ကားမောင်းတဲ့အခါ သီချင်းမဖွင့်ဖို့လည်း တာလီဘန်က တားမြစ်ခဲ့ပါတယ်။

လူ့အခွင့်အရေးစောင့်ကြည့်အဖွဲ့ Human Rights Watch က တာလီဘန်ရဲ့ အမိန့်အသစ်ဟာ အမျိုးသမီးတွေကို အကျဉ်းသားတွေအဖြစ် လုပ်လိုက်တာဖြစ်ကြောင်း၊ လွတ်လပ်စွာသွားလာခွင့်၊ အလုပ်လုပ်ခွင့်၊ အိမ်တွင်းအကြမ်းဖက်မှုဖြစ်လာရင် လွတ်မြောက်ရာကို ထွက်ပြေးခွင့် စတာတွေကို တားမြစ်ပိတ်ပင်လိုက်တာဖြစ်ကြောင်း ထုတ်ပြန်ခဲ့ပါတယ်။

Ref: Aljazeera