လက်ရွေးစင်ဘောလုံးသမားများ ဆေးမင်ကြောင်မထိုးရန် တရုတ်အစိုးရက အမိန့်ထုတ်

ဒီဇင်ဘာ ၃၁၊ ၂၀၂၁
M-Media

-နိုင်ငံကိုယ်စားပြု လက်ရွေးစင်ဘောလုံးအသင်းနဲ့ ယူ-၂၃ အသင်းတွေက ကစားသမားတွေ ခန္ဓာကိုယ်မှာ ဆေးမင်ကြောင်မထိုးဖို့၊ ထိုးထားတာကို ပြန်ဖျက်တာ ဒါမှမဟုတ် ဖုံးကွယ်တာတွေလုပ်ဖို့ တရုတ်အစိုးရက အမိန့်ထုတ်လိုက်ပါတယ်။

‘ဘောလုံးသမားများကို ပိုမိုကြပ်မတ်နိုင်ရေး အကြံပြုချက်များ’ ဆိုတဲ့ ခေါင်းစဉ်နဲ့ ညွှန်ကြားချက်ကို အခုတစ်ပတ် အင်္ဂါနေ့မှာ တရုတ်အစိုးရက ထုတ်ပြန်ခဲ့တာပါ။ ဘောလုံးသမားတွေ ဆေးမင်ကြောင်ထိုးထားတာဟာ လူ့အဖွဲ့အစည်းကို အတုယူမှားစေတဲ့အတွက် ဒါတွေကိုမလုပ်ဖို့ ပြင်းပြင်းထန်ထန်ထားမြစ်တယ်လို့ ညွှန်ကြားချက်မှာ ဖော်ပြထားပါတယ်။

“ထိုးထားတဲ့သူတွေ ကိုယ့်ဟာကိုယ် ပြန်ဖျက်ဖို့ အကြံပြုပါတယ်။ အထူးအခြေအနေမျိုးတွေမှာတော့ အသင်းရဲ့ ခွင့်ပြုချက်နဲ့ ဆေးမင်ကြောင်တွေကို လေ့ကျင့်ချိန်မှာရော၊ ပွဲကစားချိန်မှာပါ ဖုံးအုပ်ထားရပါမယ်”

ယူ-၂၀ အသင်းအတွက် ဆေးမင်ကြောင်ထိုးထားတဲ့ ကစားသမားတွေကို မခေါ်ဖို့လည်း ညွှန်ကြားချက်မှာ ထည့်သွင်း တားမြစ်ခဲ့ပါတယ်။

ဒီလိုတားမြစ်မှုဟာ ဘောလုံးကစားသမားတွေမှာ အပြုသဘောဆောင်တဲ့ စိတ်ဓာတ်မျိုး ထွန်းကားလာဖို့၊ လူ့အဖွဲ့အစည်း အတုယူမှန်စေဖို့ ဆောင်ရွက်ရတာဖြစ်ပြီး၊ လူ့အဖွဲ့အစည်းမှာ နိုင်ငံကို ချစ်မြတ်နိုးစိတ် ဖြစ်လာစေတဲ့ ဆောင်ရွက်မှုမျိုး၊ ကစားသမားတွေရဲ့ စိတ်နေစိတ်ထား၊ တာဝန်ယူမှု၊ ဂုဏ်သိက္ခာပိုင်း တိုးတက်စေတဲ့ ဆောင်ရွက်မှုမျိုးတွေကို နိုင်ငံကိုယ်စားပြု ဘောလုံးအသင်းတွေက လုပ်ဆောင်သင့်တယ်လို့လည်း ညွှန်ကြားချက်မှာ တိုက်တွန်းခဲ့ပါတယ်။

တရုတ်အစိုးရက ဆေးမင်ကြောင်တွေကို ပိတ်ပင်တာဟာ ဒါ ပထမဆုံးမဟုတ်ပါဘူး။

၂၀၁၈ ခုနှစ် ဟစ်ဟော့နဲ့ အခြား ခေတ်ပေါ်ယဉ်ကျေးမှုတွေကို နှိပ်ကွပ်မှုအတွင်း နိုင်ငံအတွင်းက ရုပ်သံတွေအနေနဲ့ ဆေးမင်ကြောင်ထိုးထားတဲ့ သရုပ်ဆောင်တွေကို မပြသဖို့ တရုတ်အစိုးရက ပိတ်ပင်ဖူးပါတယ်။ အဲဒီနောက်ပိုင်း ဆေးမင်ကြောင်ပါတဲ့ အခန်းတွေကို ဝါးထားပြီးမှ ​ရုပ်သံဌာနတွေက လွှင့်ခွင့်ရပါတယ်။

Ref: CNN