အကိုက်အခဲပျောက်၍ အိန္ဒိယရှိ အဖိုးအိုတစ်ဦး ကိုဗစ်ကာကွယ်ဆေး ၁၁ ကြိမ်ထိုး

ဇန်နဝါရီ ၈၊ ၂၀၂၂
M-Media

-ပြီးခဲ့တဲ့နှစ်က အဖိုးအိုတစ်ဦးဟာ ကိုဗစ်ကာကွယ်ဆေး အနည်းဆုံး ၈ ကြိမ်လောက်အထိ ထိုးခဲ့တယ်လို့ အိန္ဒိယ အစိုးရတာဝန်ရှိသူတွေက ပြောပါတယ်။

အသက် ၆၅ နှစ်အရွယ် ဘရမ်ဒီယို မန်ဒဲလ်ဆိုသူဖြစ်ပြီး အရင်က စာပို့သမားအဖြစ် အလုပ်လုပ်ခဲ့သူပါ။ မန်ဒဲလ်က သူနေထိုင်ရာ ဘီဟာရ်ပြည်နယ်အတွင်း ကာကွယ်ဆေး ၁၁ ကြိမ် ထိုးခဲ့ပြီး အရင်က ခံစားခဲ့ရတဲ့ ခန္ဓာကိုယ် ကိုက်ခဲနာကျင်တာတွေ ပျောက်သွားကာ ပိုပြီး ကျန်းမာလာတယ်လို့ ပြောပါတယ်။

ဘာဘေးထွက်ဆိုးကျိုးမှ မခံစားရဘူးလို့လည်း သူက ဆိုပါတယ်။

ပြီးခဲ့တဲ့တစ်ပတ်က ၁၂ ကြိမ်မြောက် ကာကွယ်ဆေးထိုးဖို့ ကြိုးစားတဲ့အချိန်မှာ အာဏာပိုင်တွေက သိရှိပြီး တားဆီးခဲ့တာဖြစ်ပါတယ်။

အိန္ဒိယဟာ ပြီးခဲ့တဲ့နှစ် ဇန်နဝါရီ ၁၆ ရက်နေ့က ကိုဗစ်ကာကွယ်ဆေးထိုးနှံမှုကို နိုင်ငံတစ်ဝှမ်း စတင်ခဲ့ပြီး ပြည်တွင်းဖြစ် ကာကွယ်ဆေးတွေဖြစ်တဲ့ Covishield နဲ့ Covaxin တို့ကို ထိုးပေးခဲ့တာ ဖြစ်ပါတယ်။ အွန်လိုင်းကနေ ကြိုတင် ရက်ချိန်းယူ ထိုးနိုင်သလို၊ အပြင်စင်တာတွေမှာ မှတ်ပုံတင်၊ မဲပေးခွင့်ကဒ်၊ ယာဉ်မောင်းလိုင်စင် စတဲ့ အထောက်အထား ၁၁ မျိုးထဲက တစ်ခုခုပြပြီးလည်း ထိုးနိုင်ပါတယ်။

ထိုးပြီးသူတွေရဲ့ အချက်အလက်တွေကို အွန်လိုင်းပေါ်တယ်တစ်ခုဖြစ်တဲ့ CoWin မှာ သိမ်းဆည်းထားပါတယ်။

အဘိုးအို မန်ဒဲလ်ဟာ ဘီဟာရ်ပြည်နယ်အတွင်း ကာကွယ်ဆေးစင်တာတွေကို အနှံ့သွားရောက်ကာ ထိုးခဲ့တာဖြစ်ပြီး နာရီဝက်လောက်သာခြာကာ ကာကွယ်ဆေး နှစ်ခါထိုးခဲ့တာမျိုးတောင်ရှိပါတယ်။

CoWin ပေါ်တယ်မှာ အချက်အလက်တွေတင်တာ နောက်ကျတဲ့အတွက် ဒီလိုအကြိမ်ကြိမ်ထိုးတာကို မသိရှိတာဖြစ်မယ်လို့ ကျွမ်းကျင်သူတွေက ပြောပါတယ်။

မန်ဒဲလ်က ပြီးခဲ့တဲ့နှစ် ဖေဖော်ဝါရီကနေ ဒီဇင်ဘာအတွင်း ကိုဗစ်ကာကွယ်ဆေး ၁၁ ကြိမ်ထိုးခဲ့တယ်လို့ ပြောပါတယ်။ သူဟာ အရင်က ရွာတွေမှာ ဆေးမှူးအဖြစ် လုပ်ခဲ့ဖူးတဲ့အတွက် ကာကွယ်ဆေးရဲ့ ကောင်းကျိုးတွေကို သိရှိကြောင်းလည်း ဖွင့်ဟခဲ့ပါတယ်။

“ကာကွယ်ဆေးထိုးပြီးတဲ့နောက်ပိုင်း ကျွန်တော့်ခန္ဓာကိုယ်က နာကျင်ကိုက်ခဲမှုတွေ ပျောက်သွားပါတယ်။ အရင်က ဒူးနာလို့ တုတ်ကောက်နဲ့ လမ်းလျှောက်ရတယ်။ အခုဆိုရင် တုတ်ကောက်မလိုတော့ပါဘူး။ သက်သာသွားပါပြီ”

Ref: BBC