အာရပ်ရိုးရာ ဂီတပညာရှင်များ မွေးထုတ်ပေးနိုင်ရန် ဆော်ဒီအာရေဗျ ပြင်ဆင်

ဇန်နဝါရီ ၉၊ ၂၀၂၂
M-Media

-ဂီတဖက်မှာ ထူးချွန်တဲ့ လူငယ်တွေကို ရှာဖွေကာ မြေတောင်မြှောက်ပေးနိုင်ဖို့အတွက် ဆော်ဒီဂီတကော်မရှင်က Bait Al-Oud လို့ခေါ်တဲ့ အဖွဲ့တစ်ခုကို ဖွဲ့စည်းလိုက်ပါတယ်။

ကမ္ဘာ့ဂီတလောကမှာ Bait Al-Oud စင်တာကို အသိအမှတ်ပြုမှုတစ်ခုရအောင် လုပ်ဆောင်သွားဖို့ ဆော်ဒီ အာဏာပိုင်တွေက စီစဉ်ထားသလို ၁၁ ကြိုးတပ် အာရပ်ဗျပ်စောင်း (Oud) အပါအဝင် အာရပ်ရိုးရာ တူရိယာတွေနဲ့ ဂီတ သမိုင်းအမွေအနှစ်တွေအကြောင်း ကမ္ဘာကို ချပြသွားဖို့လည်း ရည်ရွယ်ပါတယ်။

Bait Al-Oud စင်တာဟာ ဂီတပါရမီရှိတဲ့ ဆော်ဒီလူငယ်တွေကို အာရပ်ရိုးရာ တူရိယာတွေ ကျွမ်းကျင်ပိုင်ဆိုင်စွာ တီးခတ်လာနိုင်အောင် လေ့ကျင့်သင်ကြားပေးမှာဖြစ်ပြီး ဒေသတွင်း ဂီတကဏ္ဍ ဖွံ့ဖြိုးတိုးတက်မှုမှာ အရေးပါပုံကိုလည်း သင်ကြားပေးမှာ ဖြစ်ပါတယ်။

“Oud ဗျပ်စောင်း ဟာ အထင်ရှားဆုံး ကြိုးတပ်တူရိယာတွေထဲကတစ်ခု ဖြစ်ပါတယ်။ ‘တူရိယာတွေရဲ့ဘုရင်’ လို့ ခေါ်ဆိုပြီး သီချင်းရေးဆရာတွေဟာ ဒီဗျပ်စောင်းနဲ့ မယ်လိုဒီတွေကို ပုံဖော်ကြတာပါ” လို့ Oud ဗျပ်စောင်းပညာရှင် ဟာဆန် အစ္စကန်ဒါရာနီက ပြောပါတယ်။

အာရပ်ရိုးရာတူရီယာတွေထဲမှာ ဗျပ်စောင်း (Oud)၊ ဗုံ (Duf)၊ တယော(Rebab)၊ နှံ (Mizmar) စတာတွေ ပါဝင်ပါတယ်။ ဒီတူရိယာတွေကို အာရပ်ဒေသ​တွေမှာသာမက အာဖရိကနဲ့ အရှေ့အာရှ၊ အလယ်အာရှ ဒေသတွေမှာပါ တွေ့မြင်နိုင်ပါတယ်။

ဆော်ဒီအာရေဗျမှာ ဒေသတွင်း နာမည်ကျော်တဲ့ ရိုးရာ ဂီတပညာရှင်တွေ ရှိနေပြီး ဗျပ်စောင်းပညာရှင် အာဘာဒီ အလ်ဂျိုဟာရ်က အထူးထင်ရှားပါတယ်။ ဂျိုဟာရ်ဟာ ‘ဗျပ်စောင်းရေဘ၀ဲ’ လို့လည်း နာမည်ကျော်ပါတယ်။

Ref: Arab News