သံတမန်ဆက်ဆံရေးထူထောင်နိုင်ရန် တူရကီနှင့် အာမေးနီးယားတို့ ဆွေးနွေးမည်

ဇန်နဝါရီ ၁၄၊ ၂၀၂၂
M-Media

-ဆယ်စုနှစ်ချီရှိခဲ့တဲ့ မကျေလည်မှုတွေကို ဖြေရှင်းကာ သံတမန်ဆက်ဆံရေး ထူထောင်နိုင်ဖို့ ရည်ရွယ်ပြီး တူရကီနဲ့ အာမေးနီးယားတို့ဟာ ဒီကနေ့ မော်စကိုမှာ ပထမဆုံးအကြိမ် ဆွေးနွေးမှု ပြုလုပ်ဖို့ ရှိနေပါတယ်။

တူရကီနဲ့ အာမေးနီးယားတို့ သံတမန်ဆက်ဆံရေးမရှိတာ နှစ်ပေါင်း ၃၀ လောက် ရှိနေပါပြီ။ ၂၀၀၉ ခုနှစ်မှာ ငြိမ်းချမ်းရေးသဘောတူညီချက်ကို လက်မှတ်ရေးထိုးခဲ့ပေမယ့် အကောင်အထည်မဖော်နိုင်ခဲ့ဘဲ ဆက်ဆံရေးက တင်းမာနေဆဲဖြစ်ပါတယ်။

ပထမကမ္ဘာစစ်ဖြစ်နေတဲ့ ၁၉၁၅ ခုနှစ်မှာ အော်တိုမန်အင်ပါယာအောက် ရှိနေတဲ့ အာမေးနီးယန်းလူမျိုး ၁.၅ သန်း အသတ်ခံရမှု၊ ၂၀၂၀ ခုနှစ် အဇာဘိုင်ဂျန်နဲ့ အာမေးနီးယားတို့ စစ်ပွဲမှာ တူရကီက အဇာဘိုင်ဂျန်ကို ထောက်ခံမှု စတဲ့ ကိစ္စတွေအတွက် တူရကီနဲ့ အာမေးနီးယားတို့အကြား တင်းမာမှုတွေ ရှိနေတာ ဖြစ်ပါတယ်။

၁၉၁၅ ခုနှစ် ကိစ္စဟာ လူမျိုးတုန်းသတ်ဖြတ်မှုဖြစ်တယ်လို့ အာမေးနီးယားက ပြောထားပြီး တူရကီက ဒါကို ငြင်းပါတယ်။

အာမေးနီးယား နိုင်ငံခြားရေးဝန်ကြီးဌာနက အခုနောက်ဆုံးဆွေးနွေးပွဲဟာ သံတမန်ဆက်ဆံရေး တည်ထောင်ဖို့နဲ့ ၁၉၉၃ ခုနှစ်က ပိတ်ခဲ့တဲ့ နယ်စပ်လမ်းကြောင်းတွေ ပြန်ဖွင့်ရေးအထိ ဖြစ်လာဖို့ ရည်မှန်းထားကြောင်း ရုရှားသတင်းဌာနကို မနေ့က ပြောကြားခဲ့ပါတယ်။

တူရကီနဲ့ အာမေးနီးယားတို့ဟာ တိုက်ရိုက်ကုန်သွယ်မှု မရှိပေမယ့် တစ်ဆင့်ခံ ကုန်သွယ်မှု ရှိနေပါတယ်။

Ref: Aljazeera