ယူကရိန်းကို ကျူးကျော်သိမ်းပိုက်ရန် ရုရှားက အကြောင်းရှာနေ

ဇန်နဝါရီ ၁၅၊ ၂၀၂၂
M-Media

-ယူကရိန်းကို ကျူးကျော်သိမ်းပိုက်ဖို့အတွက် ရုရှားက အကြောင်းရှာနေပြီး၊ ဒီလိုအကြောင်းပြနိုင်တဲ့ တိုက်ခိုက်မှုမျိုး စီစဉ်နေတယ်လို့ အမေရိကန်က သတိပေးလိုက်ပါတယ်။

မော်ဒိုလ်ဗာနိုင်ငံကနေ ခွဲထွက်သွားတဲ့ ထရန်နီစထရီးယားဒေသက ရုရှားတပ်ဖွဲ့ဝင်တွေကို ယူကရိန်းတပ်ဖွဲ့တွေက တိုက်ခိုက်တဲ့ပုံစံမျိုး ဖန်တီးဖို့ ရုရှားအထူးတပ်ဖွဲ့က ပြင်ဆင်နေတယ်ဆိုပြီး ယူကရိန်း စစ်ထောက်လှမ်းက ထုတ်ပြန်ပြီးတဲ့နောက် အမေရိကန်ရဲ့ ဒီသတိပေးမှု ထွက်လာတာ ဖြစ်ပါတယ်။

မနေ့က အမေရိကန်အစိုးရ တာဝန်ရှိသူတစ်ဦး ရိုက်တာသတင်းဌာကို ဖြေကြားရာမှာ ရုရှားက ယူကရိန်းကို ကျူးကျော်တဲ့အခါ အကြောင်းပြနိုင်အောင်နဲ့ ယူကရိန်းမှာ သဘောထားကွဲလွဲမှုတွေဖြစ်အောင် ယူကရိန်းက စတင်ရန်စတဲ့ပုံစံမျိုး ရုရှားဩဇာ လွှမ်းမိုးတဲ့အဖွဲ့တွေက မြေပြင်နဲ့ ဆိုရှယ်မီဒီယာမှာ ဖန်တီးနေတယ်လို့ ဆိုပါတယ်။

ဒါ့အပြင် မြို့ပြတိုက်ခိုက်ရေးအတွက် လေ့ကျင့်ပေးထားတဲ့သူတွေကို ရုရှားက ယူကရိန်းအရှေ့ပိုင်းမှာ တပ်ဖြန့်ချထားပြီး သမ္မတပူတင်က ယူကရိန်းကို သိမ်းပိုက်လိုတဲ့အချိန်မှာ ဒီလူတွေက ရုရှားသစ္စာခံတဲ့ တပ်ဖွဲ့တွေကို တိုက်ခိုက်ဖို့ ရှိနေတယ်လို့ အခြား တာဝန်ရှိသူတစ်ဦးက AP သတင်းဌာနကို ပြောကြားခဲ့ပါတယ်။

၂၀၁၄ ခုနှစ် ယူကရိန်းပြည်တွင်းရေး အကွဲအပြဲမှာ ရုရှားတပ်တွေဟာ ယူကရိန်းပိုင် ခရိုင်းမီးယားကျွန်းဆွယ်ကို ဝင်သိမ်းပြီး နောက်ပိုင်းမှာ ရုရှားနယ်နမိတ်ထဲ သွတ်သွင်းခဲ့တာ ဖြစ်ပါတယ်။

အမေရိကန်ရဲ့ မနေ့က ပြောကြားမှုတွေကို ရုရှားသမ္မတရုံး ပြောရေးဆိုခွင့်ရှိသူ ဒီမီထရီ ပက်စ်ကော့ဗ်က ငြင်းဆိုခဲ့ပြီး အခြေအမြစ်မရှိတဲ့ ပြောကြားမှုတွေလို့ ဆိုပါတယ်။

ရုရှားနဲ့ ယူကရိန်းတို့အကြား တင်းမာမှုတွေဟာ ပြီးခဲ့တဲ့နှစ် နှောင်းပိုင်းကတည်းက စတင်ခဲ့တာပါ။ ရုရှားဟာ ယူကရိန်းနယ်စပ်မှာ တပ်ဖွဲ့ဝင် ၁ သိန်းလောက် ချထားပြီး အမေရိကန်နဲ့ ဥရောပနိုင်ငံတွေက ဒီတင်းမာမှုကို ဖြေရှင်းနိုင်ရေး ကြားဝင်​ဆောင်ရွက်နေတာ ဖြစ်ပါတယ်။

Ref: Reuters