တရုတ်ဓာတ်ငွေ့ပိုက်လိုင်း ပတ်ဝန်းကျင်တွင် စစ်ကောင်စီက မိုင်းများထောင်ထား

ဇန်နဝါရီ ၂၀၊ ၂၀၂၂
M-Media

-ရှမ်းပြည်နယ်မြောက်ပိုင်း သီပေါမြို့နယ်က တရုတ်ဓာတ်ငွေ့ပိုက်လိုင်းနားမှာ စစ်ကောင်စီ တပ်တွေက မြေမြှုပ်မိုင်းတွေ ထောင်ထားပြီး ဒေသခံတွေ စိုးရိမ်မှု ရှိနေတယ်လို့ ရှမ်းလူ့အခွင့်အရေး စောင့်ကြည့်အဖွဲ့ (SHRF) က ထုတ်ပြန်ပါတယ်။

နောင်အန်းကျေးရွာအနီးက ပိုက်လိုင်းထိန်းချုပ်ရေးစက်ရုံရဲ့ ပတ်ဝန်းကျင်တစ်၀ိုက်က တောတွေထဲမှာ မိုင်းတွေထောင်ထားတာ ဖြစ်ပါတယ်။ အဲဒီစက်ရုံမှာ အရင်က လုံခြုံရေးမရှိပေမယ့် နိုဝင်ဘာလကစပြီး စစ်သား အယောက် ၂၀ လောက်က စောင့်ကြပ်နေတယ်လို့လည်း SHRF က ဆိုပါတယ်။

ရခိုင်ကမ်းရိုးတန်းကနေ တရုတ်နိုင်ငံအထိသွယ်တန်းကာ ရေနံနဲ့ သဘာ၀ဓာတ်ငွေ့ပို့တဲ့ ပိုက်လိုင်းရဲ့ ၃ ပုံ ၁ ပုံဟာ ရှမ်းပြည်နယ်မြောက်ပိုင်းမှာ တည်ရှိတာဖြစ်ပါတယ်။ ပိုက်လိုင်း စတင်တည်ဆောက်ကတည်းက ဒေသခံတွေ ကန့်ကွက်ခဲ့ကြတာ ဖြစ်ပါတယ်။

‘မိုင်းတွေဟာ စစ်ကောင်စီရဲ့ လုံခြုံရေးအတွက်ပဲဖြစ်ပါတယ်။ ဒေသခံတွေရဲ့ လုံခြုံရေးအတွက် မဟုတ်ပါဘူး’ လို့ SHRF အဖွဲ့ဝင် Sai Hor Hseng က ပြောပါတယ်။

နိုဝင်ဘာလကလည်း သီပေါမြို့နယ် ချောင်းခြောက်ကျွေးရာအုပ်စု အုပ်ချုပ်ရေးမှူးကို စစ်ကောင်စီတပ်တွေက ခေါ်ယူပြီး ဒေသတစ်၀ိုက် မိုင်းထောင်ထားတာကြောင့် အဲဒီနေရာတွေကို ရွာသားတွေ မသွားဖို့ သတိပေးခဲ့ပါတယ်။

ကျေးရွာတွေက ရွာသားတွေဟာ အနီးအနားပတ်ဝန်းကျင်က တောတွေထဲမှာ ထင်းခုတ်၊ မှိုရှာတာ၊ အမဲလိုက်တာတွေ လုပ်ဆောင်လေ့ရှိပြီး အခုလို မိုင်းထောင်ထားတာကြောင့် အသက်မွေးဝမ်းကြောင်း လုပ်ငန်းတွေကို ထိခိုက်ကြောင်း၊ ရွာသားတွေက မိုင်းဖယ်ရှားပေးဖို့ ပြောပေမယ့် စစ်ကောင်စီတပ်တွေက မဖယ်ပေးကြောင်း SHRF ရဲ့ အင်္ဂါနေ့ ထုတ်ပြန်ချက်မှာ ဖော်ပြထားပါတယ်။

Ref : SHRF