အာဆီယံနိုင်ငံခြားရေးဝန်ကြီးများအစည်းအဝေး ဖေဖော်ဝါရီတွင် ကျင်းပမည်

ဇန်နဝါရီ ၂၉၊ ၂၀၂၂
M-Media

-အာဆီယံ နိုင်ငံခြားရေးဝန်ကြီးများအစည်းအဝေးကို လာမယ့် ဖေဖော်ဝါရီ ၁၆ ရက်နေ့မှာ ကျင်းပမှာဖြစ်ပြီး မြန်မာနိုင်ငံမှာ လူသားချင်းစာနာထောက်ထားမှုဆိုင်ရာ အကူအညီပေးရေးကိစ္စ ဆွေးနွေးသွားမယ်လို့ ကမ္ဘောဒီးယားက ဒီကနေ့မှာ ထုတ်ပြန်ပါတယ်။

ကမ္ဘောဒီးယားဟာ ၂၀၂၂ ခုနှစ် အာဆီယံ ဥက္ကဌအဖြစ် တာဝန်ယူမှာပါ။ အစည်းအဝေးမကျင်းပခင် ကမ္ဘောဒီးယား နိုင်ငံခြားရေးဝန်ကြီး ပရက်ဆိုခွန် မြန်မာနိုင်ငံကို သွားရောက်မှာ ဖြစ်ပါတယ်။ ဆိုခွန်ဟာ မြန်မာနိုင်ငံဆိုင်ရာ အာဆီယံ အထူးကိုယ်စားလှယ်အဖြစ်လည်း တာဝန်ယူထားပါတယ်။

ကမ္ဘောဒီးယား နိုင်ငံခြားရေးဝန်ကြီးဌာနက ထုတ်ပြန်ချက်မှာတော့ ဆိုခွန်ရဲ့ခရီးစဉ်မှာ ပြီးခဲ့တဲ့နှစ်က ရရှိတဲ့ အာဆီယံသဘောတူညီချက် ၅ ချက် အကောင်အထည်ဖော်ရေးကို စစ်ကောင်စီနဲ့ ဆွေးနွေးမှာဖြစ်ပြီး အာဆီယံနိုင်ငံခြားရေးဝန်ကြီးများအစည်းအဝေးမှာ ပြန်လည်တင်ပြလိမ့်မယ်လို့ ဖော်ပြထားပါတယ်။

ဇန်နဝါရီလ အစပိုင်းမှာ ကမ္ဘောဒီးယားဝန်ကြီးချုပ် ဟွန်ဆန် မြန်မာနိုင်ငံကိုသွားရောက်ကာ အာဏာသိမ်းစစ်ကောင်စီ ခေါင်းဆောင်တွေနဲ့ တွေ့ဆုံမှုကို အာဆီယံအဖွဲ့ဝင်နိုင်ငံတွေက မကျေနပ်တဲ့အတွက် ဇန်နဝါရီ နှောင်းပိုင်းမှာလုပ်ဖို့ စီစဉ်ထားတဲ့ အာဆီယံနိုင်ငံခြားရေးဝန်ကြီးများအစည်းအဝေးကို ဖျက်သိမ်းခဲ့ရပါတယ်။

Ref: Reuters