စစ်ကောင်စီကိုစားလှယ်ကို လက်မခံရန် လူ့အခွင့်အရေးအဖွဲ့များက ICJ ကို စာပို့တောင်းဆို

ဖေဖော်ဝါရီ ၄၊ ၂၀၂၂
M-Media

-မြန်မာစ်တပ်က ရိုဟင်ဂျာတွေအပေါ် အကြမ်းဖက်သတ်ဖြတ်မှုကိစ္စအတွက် ဖေဖော်ဝါရီ ၂၁ ရက်နေ့ ကြားနာမှုမှာ အာဏာသိမ်းစစ်ကောင်စီကိုယ်စားလှယ်ကို တက်ရောက်ဖြေရှင်းခွင့် မပေးသင့်ဘူးလို့ လူ့အခွင့်အရေးအဖွဲ့တွေက နိုင်ငံတကာ ခုံသမာဓိရုံး (ICJ) ကို ကြာသာပတေးနေ့က စာရေးသားပေးပို့ တောင်းဆိုလိုက်ပါတယ်။

Legal Action Worldwide(LAW)၊ Fortify Rights နဲ့ Myanmar Accountability Project တို့က စစ်ကောင်စီ ကိုယ်စားလှယ်အဖွဲ့ကို မြန်မာနိုင်ကိုယ်စား ချေပခွင့် ပေးလိုက်တာဟာ စစ်တပ်ရဲ့ တရားမဝင် အာဏာသိမ်းမှုကို အသိအမှတ်ပြုလိုက်သလို ဖြစ်သွားနိုင်တဲ့အန္တရာယ် ရှိတယ်ဆိုပြီး ICJ ဥက္ကဌကို လိပ်မူပေးပို့တဲ့ အဲဒီစာမှာ ဖော်ပြထားပါတယ်။

အာဏာသိမ်းစစ်ကောင်စီကို ဒီလို အသိအမှတ်ပြုတဲ့ ပုံစံမျိုးဟာ ကုလသမဂ္ဂ လက်အောက်ခံ အဖွဲ့အစည်းတွေရဲ့ မူ၀ါဒနဲ့ ဆန့်ကျင်နေကြောင်း၊ ဖြုတ်ချခံ အမတ်တွေနဲ့ ဖွဲ့စည်းထားတဲ့ NUG အစိုးရကိုသာ မြန်မာနိုင်ငံကိုယ်စားပြုခွင့်ပေးသင့်ကြောင်းလည်း စာထဲမှာ ထောက်ပြထားပါတယ်။

LAW အဖွဲ့က စစ်တမ်းကောက်ယူခဲ့တဲ့ ရိုဟင်ဂျာ ၈၀၀ ကျော်ကလည်း လူ့အခွင့်အရေးအဖွဲ့အစည်းတွေ ပေးပို့တဲ့စာကို အပြည့်အ၀ ထောက်ခံတယ်လို့ ပြောကြားခဲ့ပါတယ်။

“၂၀၁၉ ခုနှစ် ဒီဇင်ဘာက ကြားနာမှုမှာ မြန်မာဖက်ကပြောခဲ့တဲ့ မုသားတွေအတွက် ကျွန်မ တော်တော်လေး ဒေါသထွက်ခဲ့ရပါတယ်။ ICJ တရားသူကြီးတွေက ဒီမုသားတွေကို လက်မခံခဲ့ပါဘူး။ အခု စစ်တပ်က အာဏာသိမ်းမှု တရားဝင်အောင်လို့ ICJ ကို အသုံးချနေပါပြီ။ တရားရုံးကသာ ဒါကို လက်ခံလိုက်ရင် ကျွန်မတို့ ဘယ်တော့မှ မြန်မာနိုင်ငံ မပြန်နိုင်တော့မှာကို စိုးရိမ်မိပါတယ်” လို့ ၂၀၁၉ ကြားနာမှုကို တက်ရောက်နား​ထောင်ခဲ့တဲ့ အသက် ၂၃ နှစ်အရွယ် ရိုဟင်ဂျာအမျိုးသမီး ဟာဆီနာ ဘေဂွန်က ပြောပါတယ်။

ပထမအကြိမ် ကြားနာမှုအပြီး ၂၀၂၀ ခုနှစ် ဇန်နဝါရီ ၂၃ ရက်နေ့မှာ ICJ က မြန်မာနိုင်ငံက လိုက်နာရမယ့် ကြားဖြတ် အမိန့်တစ်ခု ထုတ်ပြန်ခဲ့ပြီး လူမျိုးတုန်းသတ်ဖြတ်မှု အထောက်အထားတွေ မပျောက်ပျက်အောင် ထိန်းသိမ်းထားဖို့၊ ရိုဟင်ဂျာတွေရဲ့ အခြေအနေ တိုးတက်အောင် ဆောင်ရွက်နေကြောင်း ၆ လတစ်ကြိမ် သတင်းပို့ဖို့ စတာတွေ ပါဝင်ပါတယ်။

Ref: Scoop NZ