သမိုင်းတစ်လျှောက် ပထမဆုံးအကြိမ်အဖြစ် အာဖရိကဖလားတွင် ဆီနီဂေါ ဗိုလ်စွဲ

ဖေဖော်ဝါရီ ၇၊ ၂၀၂၂
M-Media

-မနေ့က ကစားခဲ့တဲ့ အာဖရိကဖလား ဘောလုံးပြိုင်ပွဲ နောက်ဆုံးဗိုလ်လုပွဲမှာ ဆီနီဂေါအသင်းက အီဂျစ်ကို ပင်နယ်တီအဆုံးအဖြတ်နဲ့ အနိုင်ရပြီး ဗိုလ်စွဲသွားခဲ့ပါတယ်။

ဒါဟာ သမိုင်းတစ်လျှောက် အာဖရိကဖလားကို ပထမဆုံးအကြိမ် ရရှိမှုပါ။ ဒီအောင်မြင်မှုအတွက် ဆီနီဂေါတစ်နိုင်လုံးက အကြီးအကျယ် အောင်ပွဲခံခဲ့ကြပါတယ်။

ပွဲကစားချိန်အတွင်း ဆီနီဂေါဟာ အီဂျစ်ကို အသာစီးနဲ့ ကစားနိုင်ခဲ့ပြီး အခွင့်အရေးတွေ ရခဲ့ပေမယ့် ဂိုးအဖြစ် မပြောင်းလဲနိုင်ခဲ့ပါဘူး။ ပွဲအစ ၇ မိနစ်မှာရတဲ့ ပင်နယ်တီကိုလည်း တိုက်စစ်မှူး ဆာဒီယိုမာနေး လွဲလျော်ခဲ့ပါတယ်။

ဒါပေမယ့် ပင်နယ်တီမှာ မာနေးက အဆုံးအဖြတ် ဂိုးကို ကန်သွင်းယူကာ အီဂျစ်ကို ၄ ဂိုး ၂ ဂိုးနဲ့ အနိုင်ရခဲ့တာ ဖြစ်ပါတယ်။ ၂၀၁၉ ခုနှစ် နောက်ဆုံးဗိုလ်လုပွဲမှာ အလ်ဂျီးရီးယားကို ရှုံးနိမ့်ပြီး ဒုတိယနဲ့သာ ကျေနပ်ခဲ့ရတဲ့ ကြမ္မာဆိုးကို ဆီနီဂေါတို့ ဒီတစ်ကြိမ်မှာ ချိုးဖျက်နိုင်ခဲ့ပါတယ်။

“ဆီနီဂေါဟာ ဗိုလ်လုပွဲမှာရှုံးပြီး ဖလားလက်လွှတ်ရတာတွေ များနေပါပြီ။ အခု အလုံးကြီး ကျသွားပြီ။ နောက်ဆုံးတော့ ချန်ပီယံဖြစ်ပြီပေါ့ဗျာ” လို့ ဆီနီဂေါမြို့တော် ဒါကာမှာ သူငယ်ချင်းတွေနဲ့အတူ အောင်ပွဲခံနေတဲ့ အသက် ၃၁ နှစ်အရွယ် ပါပီ မာလစ် ဒီဘာက ပြောပါတယ်။

အီဂျစ်က ၂၀၁၇ ခုနှစ် ဖိုင်နယ်မှာ ကင်မရွန်းကို ရှုံးပြီး ဒုတိယသာ ရခဲ့သလို အဲဒီနောက်ပိုင်း ပထမဆုံး ဖိုင်နယ်တက်လာတဲ့ အခုနှစ်မှာလည်း ဒုတိယနဲ့သာ ထပ်မံကျေနပ်ခဲ့ရပါတယ်။ နာမည်ကြီး တိုက်စစ်မှူး မိုဟာမက် ဆာလာဟ်က ပွဲအပြီးမှာ ဝမ်းနည်းကြေကွဲစွာ ငိုကြွေးခဲ့ပါတယ်။

Ref: Reuters