အကြောင်းတစ်ခုပြကာ ရုရှားက ယူကရိန်းကို သိမ်းပိုက်ဖွယ်ရှိနေ

ဖေဖော်ဝါရီ ၁၄၊ ၂၀၂၂
M-Media

-ရုရှားဟာ အကြောင်းတစ်ခုခုပြကာ ယူကရိန်းကို ကျူးကျော်သိမ်းပိုက်တာမျိုး အချိန်မရွေး လုပ်လာနိုင်ပြီး မိမိတို့ကလည်း နေတိုးအဖွဲ့ပိုင်နက်ကို တစ်လက်မမှ အထိမခံဘူးလို့ အမေရိကန်ကတနင်္ဂနွေနေ့မှာ ထုတ်ပြန်ပြောကြားလိုက်ပါတယ်။

ယူကရိန်းနယ်စပ်မှာ ရုရှားက တပ်ဖွဲ့ဝင် တစ်သိန်းကျော်၊ စစ်လက်နက်ပစ္စည်း အပြည့်အစုံ ချထားတာ ပြီးခဲ့တဲ့နှစ် ဒီဇင်ဘာလောက်ကတည်းကဖြစ်ပြီး ယူကရိန်းကို ဝင်သိမ်းတော့မလားဆိုတဲ့ စိုးရိမ်မှုတွေ မြင့်တက်လာနေတာပါ။

အမေရိကန်အပါအဝင် အင်အားကြီးနိုင်ငံတွေက တင်းမာမှုလျှော့ချရေး ကြားဝင်​ဆွေးနွေးတာတွေ လုပ်ဆောင်နေပေမယ့် ပြေလည်မှု မရသေးပါဘူး။

ရုရှားဟာ ယူကရိန်းကို တိုက်ခိုက်သိမ်းပိုက်ဖို့ လိုအပ်တဲ့ စစ်ရေးပြင်ဆင်မှုအားလုံး လုပ်ဆောင်ထားပြီး ဘေဂျင်းအိုလံပစ်ပြိုင်ပွဲ မပြီးဆုံးမီ ကျူးကျော်လာနိုင်တဲ့အတွက် အမေရိကန်နိုင်ငံသားတွေ ယူကရိန်းကနေ ၄၈ နာရီအတွင်း ထွက်ခွာဖို့ အမေရိကန် သမ္မတရဲ့ အမျိုးသားလုံခြုံရေးအကြံပေး ဂျိတ်ဆူလီဗန်က သောကြာနေ့မှာ သတိပေးခဲ့ပါတယ်။

မနေ့က CBS သတင်းဌာနနဲ့ အင်တာဗျူးမှာ နေတိုးအဖွဲ့ရဲ့ပိုင်နက်ကို တစ်လက်မမှ အထိမခံဘဲ ကာကွယ်သွားမယ်လို့ ဆူလီဗန်က ထည့်သွင်းပြောဆိုခဲ့ပါတယ်။

မနေ့က ယူကရိန်းသမ္မတ ဗိုလိုဒီမာ ဇယ်လင်စကီးနဲ့ ဆွေးနွေးမှုအတွင်း အမေရိကန်သမ္မတ ဘိုင်ဒန်က ရုရှားရဲ့ စစ်ရေးပြင်ဆင်မှုကို တားဆီးဖို့ သံတမန်နည်းလမ်းအရရော၊ ကာကွယ်ရေးနည်းလမ်းအရပါ တုန့်ပြန်သွားမယ်လို့ ပြောကြားခဲ့ပါတယ်။ ယူကရိန်းကိုလာလည်ဖို့အတွက်လည်း ဇယ်လင်စကီးက ဘိုင်ဒန်ကို ဖိတ်ကြားခဲ့ပါတယ်။

ရုရှားဟာ ယူကရိန်းကို အချိန်မရွေးကျူးကျော်တိုက်ခိုက်နိုင်တယ်ဆိုတဲ့ အမေရိကန်ရဲ့ပြောကြားမှုကို လက်ခံပြီး ယူကရိန်းထဲ စစ်ရေးနဲ့ စီးပွားရေးအကူအညီပေးမယ့်အစီအစဉ်ကို လာမယ့်ရက်ပိုင်းအတွင်း ထုတ်ပြန်ကြေငြာမယ်လို့ ဗြိတိန်အစိုးရ ပြောရေးဆိုခွင့်ရှိသူက တနင်္ဂနွေနေ့မှာ ပြောကြားခဲ့ပါတယ်။

Ref: Reuters