ရေတွင်းထဲပြုတ်ကျသည့် ၅ နှစ်အရွယ် အာဖဂန်ကလေးငယ် သေဆုံး

ဖေဖော်ဝါရီ ၁၈၊ ၂၀၂၂
M-Media

-အာဖဂန်နစ္စတန်နိုင်ငံမှာ ရေတွင်းထဲပြုတ်ကျသွားတဲ့ အသက် ၅ နှစ်အရွယ် ကလေးငယ်ကို ကယ်တင်ဖို့ ၃ ရက်တာ ကြိုးပမ်းခဲ့ပေမယ့် ကလေးငယ်ဟာ အသက်မရှင်ဘဲ သေဆုံးသွားတယ်လို့ သိရပါတယ်။

နိုင်ငံတောင်ပိုင်း မိုးခေါင်ရေရှားတဲ့ ဇာဘူလ်ပြည်နယ် ရှိုကတ်ရွာမှာ ဖြစ်ပွားခဲ့တာပါ။ အသက် ၅ နှစ်အရွယ် ကလေးငယ် ဟိုက်ဒါဟာ အင်္ဂါနေ့က ရေတွင်းတူးနေတဲ့ လူကြီးတွေကို ကူညီနေရင်းရေတွင်းအဟောင်းထဲကို ချော်ကျခဲ့တာ ဖြစ်ပါတယ်။ မြေအောက် ပေ ၈၀ လောက်အထိ ရောက်သွားခဲ့ပေမယ့် ကြိုးနဲ့ ဆွဲတင်ခဲ့ရာ ပေ ၃၀ လောက်အရောက်မှာ ညပ်သွားခဲ့တာ ဖြစ်ပါတယ်။

ဒေသခံတွေနဲ့ ကယ်ဆယ်ရေးလုပ်သားတွေက မြေတူးကာ ကယ်ဆယ်ဖို့ ကြိုးစားခဲ့ပါတယ်။ ဟိုက်ဒါလေး အသက်ရှင်နေသေးတယ်လို့ သောကြာနေ့မနက်ပိုင်းမှာ တာလီဘန် တာဝန်ရှိသူတွေက ထုတ်ပြန်ခဲ့ပေမယ့် နောက်ပိုင်းမှာတော့ သေဆုံးသွားတယ်လို့ ဆိုပါတယ်။

ကယ်ဆယ်ဖို့ မြေတူးတဲ့အချိန်မှာ ကျောက်တုံးကျောက်ခဲတွေကြောင့် အခက်အခဲတွေရှိခဲ့ပြီး မြေမှုန့်တွေ ရေတွင်းထဲကျတာကြောင့် ဟိုက်ဒါလေး အသက်ရှုရခက်ကာ အသက်ဆုံးရှုံးနိုင်ချေရှိတယ်လို့ ဇာဘူလ်ပြည်နယ် ရဲတပ်ဖွဲ့ ပြောရေးဆိုခွင့်ရှိသူက အစောပိုင်းမှာ ထုတ်ပြန်ခဲ့ပါတယ်။

ပြီးခဲ့တဲ့ ၂ ပတ်အရင်က မော်ရိုကိုနိုင်ငံမှာ အသက် ၅ နှစ်အရွယ် ကလေးငယ် ရိုင်ယန်ဟာ ရေတွင်းထဲပြုတ်ကျခဲ့ပြီး သက်ဆိုင်ရာက တစ်ပတ်ကြာ ကယ်တင်ဖို့ ကြိုးစားခဲ့ပေမယ့် မကယ်နိုင်ခင်မှာပဲ ရိုက်ယန်တစ်ယောက် သေဆုံးသွားခဲ့ပါတယ်။ ဒီအဖြစ်အပျက်ကို ကမ္ဘာတစ်ဝှမ်းက အာရုံစိုက်ခဲ့ကြပါတယ်။

Ref : Aljazeera