ရန်ဘက်အီရန်နှင့် ဆော်ဒီက ၅ ကြိမ်မြောက် ဆွေးနွေးမည်

ဖေဖော်ဝါရီ ၂၀၊ ၂၀၂၂
M-Media

-အီရန်နဲ့ အရင် ၄ ကြိမ်ဆွေးနွေးမှုမှာ ခိုင်မာတဲ့ တိုးတက်မှုမျိုး မရခဲ့ပေမယ့် ၅ ကြိမ်မြောက် တိုက်ရိုက်ဆွေးနွေးမှု လုပ်ဆောင်မယ်လို့ ဆော်ဒီအာရေဗျ နိုင်ငံခြားရေးဝန်ကြီး မင်းသား ဖိုက်ဆဲလ် ဘင် ဖာရ်ဟန် အလ် ဆာအွဒ်က ပြောကြားလိုက်ပါတယ်။

ဆော်ဒီအစိုးရက ရှီအာဘာသာရေးခေါင်းဆောင်တစ်ဦးကို ကွပ်မျက်မှုနောက်ဆက်တွဲ ၂၀၁၆ ခုနှစ် အီရန်က ဆော်ဒီသံရုံးကို ဆန္ဒပြသူတွေ ဝင်ရောက်စီးနင်းခဲ့​ပြီးတဲ့နောက် နှစ်နိုင်ငံ သံတမန်အဆက်အသွယ် ပြတ်တောက်သွားခဲ့တာပါ။

ဒါပေမယ့် အီရတ်ရဲ့ ကြားဝင်မှုနဲ့အတူ ၂၀၂၁ ခုနှစ်ကစလို့ နှစ်ဖက် တိုက်ရိုက်ဆွေးနွေးပွဲတွေ လုပ်ဆောင်လာပါတယ်။

မနေ့က မြူးနစ်လုံခြုံရေးဆိုင်ရာ ညီလာခံမှာ ဆော်ဒီနိုင်ငံခြားရေးဝန်ကြီးက အီရန်နဲ့ အနောက်နိုင်ငံတို့ရဲ့ နျူသဘောတူညီချက်ဟာ အရှေ့အလယ်ပိုင်းအတွက် ပြဿနာတွေ ပြေလည်သွားမယ်လို့​ အဆုံးသတ်မဟုတ်ဘဲ၊ ပြေလည်အောင် ဘယ်လိုဆောင်ရွက်မလဲဆိုတာ စတင်စဉ်းစားရမယ့် အခြေအနေ ဖြစ်တယ်လို့ ပြောကြားခဲ့ပါတယ်။

၂၀၁၈ ခုနှစ်က အမေရိကန်နှုတ်ထွက်သွားပြီးတဲ့နောက် ပျက်ပြယ်လုနီးနီးဖြစ်နေတဲ့ ၂၀၁၅ နျူသဘောတူညီချက် ပြန်ရအောင် အီရန်နဲ့ အနောက်နိုင်ငံတွေက ဆွေးနွေးနေကြတာ ဖြစ်ပါတယ်။

မင်းသား ဖိုက်ဆဲလ်က ရှိနေတဲ့ပြဿနာတွေ ဖြေရှင်းရေး အမှန်တကယ်ဆန္ဒရှိကြောင်း အီရန်က ပြသဖို့ လိုအပ်သလို၊ အဲဒီလိုဆန္ဒမျိုး ရှိမယ်လို့ မျှော်လင့်ကြောင်း ထည့်သွင်းပြောကြားခဲ့ပါတယ်။

Ref: Aljazeera