အာဆီယံကိုယ်စားလှယ်၏ တွေ့ဆုံဆွေးနွေးရေးမူကို စစ်ကောင်စီက လက်မခံ

ဖေဖော်ဝါရီ ၂၁၊ ၂၀၂၂
M-Media

-ဖြုတ်ချခံလိုက်ရတဲ့ NLD အစိုးရ တာဝန်ရှိသူတွေ၊ လွှတ်တော်အမတ်တွေနဲ့ တွေ့ဆုံမယ့် အာဆီယံအထူးကိုယ်စားလှယ်ရဲ့ အစီအစဉ်ကို လက်မခံဘဲ ဒါဟာ အကြမ်းဖက်တွေကို အားပေး တာသာဖြစ်တယ်လို့ အာဏာသိမ်းစစ်ကောင်စီက ထုတ်ပြန်ပါတယ်။

မြန်မာနိုင်ငံဆိုင်ရာ အာဆီယံအထူးကိုယ်စားလှယ် ကမ္ဘောဒီးယားနိုင်ငံခြားရေးဝန်ကြီး ပရက်ဆိုခွန်က မတ်လအတွင်း မြန်မာနိုင်ငံကို သွားရောက်ပြီး သက်ဆိုင်သူတွေအားလုံးနဲ့ တွေ့ဆုံဆွေးနွေးမယ်လို့ ပြီးခဲ့တဲ့တစ်ပတ် အာဆီယံနိုင်ငံခြားရေးဝန်ကြီးများ အစည်းအဝေးမှာ ပြောကြားခဲ့ပါတယ်။

မလေးရှားနဲ့ အခြားအဖွဲ့ဝင်နိုင်ငံတစ်ခုက တိုက်တွန်းမှုကြောင့် ‘အမျိုးသားညီညွတ်ရေးအစိုးရ’ (NUG) တာဝန်ရှိသူတွေနဲ့ တွေ့ဖို့ရှိတယ်လို့လည်း ဆိုခွန်က ဆိုပါတယ်။ NUG ကို ဖြုတ်ချခံလိုက်ရတဲ့ NLD လွှတ်တော်အမတ်​အများစုနဲ့ ဖွဲ့စည်းထားတာပါ။

တနင်္ဂနွေနေ့က စစ်ကောင်စီ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာတော့ အာဆီယံအထူးကိုယ်စားလှယ်ရဲ့ ဒီအစီအစဉ်ကို လက်မခံဘူးလို့ ဆိုပါတယ်။

အထူးကိုယ်စားလှယ်အပါအဝင် အာဆီယံရဲ့ အပြုသဘောဆောင်တဲ့ ပူးပေါင်းဆောင်ရွက်မှုကို လက်ခံကြိုဆိုသွားမှာဖြစ်ပေမယ့်၊ အကြမ်းဖက်အဖွဲ့၊ တရားမဝင်အဖွဲ့တွေနဲ့ တွေ့ဆုံဖို့ကိစ္စကို သဘောမတူဘူးလို့လည်း စစ်ကောင်စီက ပြောပါတယ်။

CRPH၊ NUG နဲ့ လက်အောက်ခံအဖွဲ့အစည်းအားလုံးကို ၂၀၂၁ ခုနှစ် မေလက အကြမ်းဖက်အဖွဲ့အစည်းအဖြစ် ကြေငြာခဲ့ကြောင်း၊ ဒီအဖွဲ့အစည်းတွေနဲ့ တွေ့ဆုံဖို့ အဖွဲ့ဝင်နှစ်နိုင်ငံက အကြံပြုတာဟာ အာဆီယံမူတွေကို ဆန့်ကျင်ရုံသာမက၊ အာဆီယံရဲ့ အကြမ်းဖက်တိုက်ဖျက်​ရေး ကြိုးပမ်းမှုကို ထိပါးစေကြောင်း၊ အာဆီယံအစည်းအဝေးတွေကို အသုံးချပြီး ဒီလိုပြောဆိုမှုမျိုး မလုပ်ဖို့နဲ့ အကြမ်းဖက်လုပ်ရပ်တွေကို ရှုတ်ချဖို့ အဖွဲ့ဝင်နှစ်နိုင်ငံကို တိုက်တွန်းကြောင်းလည်း စစ်ကောင်စီ နိုင်ငံ​ခြားရေးဝန်ကြီးဌာနရဲ့ ကြေငြာချက်မှာ တိုက်တွန်းထားပါတယ်။

၂၀၂၂ ဖေဖော်ဝါရီ ၁ ရက်နေ့ အာဏာသိမ်းပြီး ဧပြီလမှာပြုလုပ်တဲ့ အာဆီယံထိပ်သီးအစည်းအဝေးကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် တက်ရောက်ပြီး ​မြန်မာပြဿနာဖြေရှင်းရေး အာဆီယံရဲ့ သဘောတူညီချက် ၅ ခုကို လက်ခံခဲ့ပါတယ်။

ဒါပေမယ့် သဘောတူညီချက်ပါအတိုင်း အကောင်အထည်ဖော်မှု မရှိတဲ့အတွက် အာဆီယံက အဖွဲ့ရဲ့ ထိပ်သီးအစည်းအဝေးတွေမှာ စစ်ကောင်စီခေါင်းဆောင်တွေကို တက်ရောက်ခွင့် မပေးပါဘူး။

Ref: South China Morning Post