ဘီလီယံနာအေလွန်မက်စ်က Starlink အင်တာနက်စနစ်ကို ယူကရိန်းပြည်သူများသုံးနိုင်အောင် စီစဉ်ပေး

ဖေဖော်ဝါရီ ၂၇၊ ၂၀၂၂

M-Media 

-အင်တာနက်ပြတ်တောက်မှုတွေရှိနေတဲ့ ယူကရိန်းနိုင်ငံမှာ ဂြိုဟ်တုအခြေပြု အင်တာနက် ဆက်သွယ်ရေးစနစ် Starlink အသုံးပြုနိုင်အောင် စီစဥ်ပေးထားတယ်လို့ SpaceX ပိုင်ရှင် အေလွန်မက်စ်က ထုတ်ပြန်ပါတယ်။

ရုရှားရဲ့ ကျူးကျော်တိုက်ခိုက်မှုကြောင့် ယူကရိန်းနိုင်ငံအတွင်း အထူးသဖြင့် နိုင်ငံအရှေ့ပိုင်းနဲ့ တောင်ပိုင်းတွေမှာ အင်တာနက်ပြတ်တောက်မှုတွေကို ကြုံတွေ့နေရတာပါ။ 

ဒီအခက်အခဲကို ပြေလည်အောင် ဖြေရှင်းပေးဖို့ ယူကရိန်းသမ္မတ ဇယ်လင်စကီးက အေလွန်မက်စ်ကို Twitter စာမျက်နှာကတစ်ဆင့် တောင်းဆိုခဲ့ပြီးတဲ့နောက် Starlink အသုံးပြုနိုင်အောင် လုပ်ဆောင်ပေးလိုက်တယ်လို့ အေလွန်မက််စ်က ထုတ်ပြန်ခဲ့ပါတယ်။

 “Starlink ကို အခု ယူကရိန်းမှာ စသုံးလို့ ရပါပြီ။ နောက်ထပ် ဂြိုဟ်တုတွေလည်း လာတော့မှာပါ” လို့ Twitter စာမျက်နှာမှာ ရေးသားခဲ့ပါတယ်။ 

ဂြိုဟ်တုကို အခြေပြုတဲ့ အင်တာနက် ဆက်သွယ်ရေးစနစ်ဟာ ကုန်ကျစားရိတ် ကြီးပေမယ့် တာ၀ါတိုင်ခြေပြုစနစ်၊ ဖိုက်ဘာကေဘယ်ကြိုးအခြေပြု ဆက်သွယ်ရေးစနစ်ထက် ပိုမိုကောင်းမွန်ပါတယ်။

တာ၀ါတိုင်၊ ကေဘယ်ကြိုးမရောက်နိုင်တဲ့ ၀ေးလံခေါင်းဖျားဒေသတွေမှာ အင်တာနက်၀န်ဆောင်မှု ပေးနိုင်သလို၊ သဘာ၀ဘေးအန္တရာယ်နဲ့ ရင်ဆိုင်ရတဲ့အခါမှာလည်း ဂြိုဟ်တုအခြေပြု အင်တာနက်စနစ်က ဆက်သွယ်မှု ပြတ်တောက်မှာ မစိုးရိမ်ရတော့ပါဘူး။

ဘီလီယံနာ အေလွန်မက်စ်တဲ့ Starlink အင်တာနက်ဆက်သွယ်ရေးစနစ်အတွက် ဂြိုဟ်တု ၁၄၆၉ လုံး လည်ပတ်အလုပ်လုပ်နေပြီး နောက်ထပ်၂၇၂ လုံး လွှတ်တင်ဖို့ ရှိပါတယ်။

Ref: Reuters