ရုရှားဘောလုံးအသင်းများ နိုင်ငံတကာပြိုင်ပွဲအားလုံးမှ ပိတ်ပင်ခံရ

မတ် ၁၊ ၂၀၂၂
M-Media

-ရုရှားလက်ရွေးစင်အသင်းတွေနဲ့ ကလပ်အသင်းတွေအားလုံးကို နိုင်ငံတကာပြိုင်ပွဲကစားခွင့် ပိတ်ပင်ကြောင်း ကမ္ဘာ့ဘောလုံးအဖွဲ့ချုပ် FIFA နဲ့ ဥရောပဘောလုံးအဖွဲ့ချုပ် UEFA တို့ မနေ့က ပူးတွဲထုတ်ပြန်တဲ့ ကြေငြာချက်မှာ ဖော်ပြထားပါတယ်။

ယူကရိန်းကို ကျူးကျော်တိုက်ခိုက်မှုနဲ့ပတ်သက်ပြီး ရုရှားက ကမ္ဘာ့ဘောလုံးအသိုင်းအ၀ိုင်းက ဒဏ်ခတ်တာ ဖြစ်ပါတယ်။ 

ရုရှား အမျိုးသားလက်ရွေးစင်အသင်းဟာ ၂၀၂၂ ကာတာ ကမ္ဘာ့ဖလားပြိုင်ပွဲ ဝင်ခွင့်အတွက် ရှုံးထွက်ပွဲကို မတ်လအတွင်း ကစားရမှာဖြစ်ပြီး၊ အမျိုးသမီးလက်ရွေးစင်အသင်းက ဇူလိုင်လ အင်္ဂလန်မှာကျင်းပမယ့် ဥရောပ ချန်ပီယံရှစ်ပြိုင်ပွဲကို ကစားဖို့ ရှိနေတာ ဖြစ်ပါတယ်။

“နိုင်ငံကိုယ်စားပြု လက်ရွေးစင်အသင်းပဲဖြစ်ဖြစ်၊ ကလပ်အသင်းပဲဖြစ်ဖြစ် ရုရှားဘောလုံးအသင်းအားလုံး နောက်ထပ် ထုတ်ပြန်ချက် တစ်စုံတစ်ရာ မထွက်ခင်အချိန်အထိ FIFA နဲ့ UEFA ကလုပ်တဲ့ ပြိုင်ပွဲတွေမှာ ဝင်ရောက်ယှဉ်ပြိုင်ခွင့် ရပ်ဆိုင်းထားဖို့ FIFA နဲ့ UEFA တို့က ဆုံးဖြတ်လိုက်ပါတယ်” လို့ ထုတ်ပြန်ချက်မှာ ဖော်ပြထားပါတယ်။

ရုရှားအသင်းနဲ့ ပွဲတွေကို ကြားကွင်းမှာ ကစားပြီး၊ ရုရှားအလံ၊ နိုင်ငံတော်သီချင်း မသုံးရဆိုတဲ့ ကြေငြာချက်တစ်ခုကို FIFA က တနင်္ဂနွေနေ့မှာ ထုတ်ပြန်ခဲ့ပါသေးတယ်။ ဒါပေမယ့် ရုရှားနဲ့ ကစားရမယ့် အသင်းတွေက ဝေဖန်ပြစ်တင်မှုတွေ လုပ်လာတာကြောင့် တနင်္လာနေ့မှာ ရုရှားအသင်းတွေကို ပြိုင်ပွဲအားလုံးကနေ ဖယ်ရှားမယ့် ကြေငြာချက်အသစ်ကို ထုတ်ပြန်ခဲ့တာ ဖြစ်ပါတယ်။

Ref: Aljazeera