အစ္စရေးကို မဟာမိတ်အဖြစ် ရှုမြင်သည်ဟု ဆော်ဒီအိမ်ရှေ့မင်းသားပြော

မတ် ၄၊ ၂၀၂၂
M-Media

-အစ္စရေးကို ရန်သူအဖြစ်ထက် အလားအလာရှိတဲ့ မဟာမိတ်လို့မြင်ပြီး ပါလက်စတိုင်းအရေးကိစ္စကိုတော့ အရင်ဖြေရှင်းဖို့လိုတယ်လို့ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က ပြောကြားလိုက်ပါတယ်။

The Atlantic သတင်းဌာနနဲ့ အင်တာဗျူးမှာ ဘင်ဆလ်မန်က အခုလို ဒီလို မှတ်ချက်ပေးလိုက်တာပါ။ ​

ဆော်ဒီအာရေဗျနဲ့ အစ္စရေးတို့ဟာ တရားဝင် သံတမန်ဆက်ဆံရေးမရှိပါဘူး။ အရင် ဆော်ဒီအာဏာပိုင် အဆက်ဆက်က ပါလက်စတိုင်းကိစ္စ ဖြေရှင်းပြီးတဲ့နောက် အစ္စရေးနဲ့ သံအဆက်အသွယ် ရှိကောင်း ရှိလာနိုင်ပေမယ့် မဟာမိတ်တော့ ဖြစ်မှာမဟုတ်ဘူးလို့ ပြောကြားထားတာပါ။

ဘင်ဆလ်မန်ရဲ့ အခုမှတ်ချက်ဟာ ဆော်ဒီအာရေဗျရဲ့ အရင်နိုင်ငံခြားရေးမူဝါဒနဲ့ သိသိသာသာ ကွဲပြားလာတာ ဖြစ်ပါတယ်။

“အစ္စရေးကို ရန်သူလို့ ကျွန်တော်တို့ မရှုမြင်ဘူး။ မဟာမိတ်ဖြစ်နိုင်တယ်လို့ပဲမြင်တယ်။ နှစ်နိုင်ငံပေါင်းပြီး ဖော်ဆောင်လို့ရတဲ့ အကျိုးစီးပွားတွေ အများအပြားရှိပါတယ်။ ဒါပေမယ့် ဒီဆက်ဆံရေးမတည်ဆောက်ခင် တစ်ချို့ပြဿနာတွေကိုတော့ ဖြေရှင်းဖို့ လိုပါတယ်”

အစ္စရေးနဲ့ပတ်သက်ရင် သိသာတဲ့ မူဝါဒပြောင်းလဲမှုအဖြစ် ဆော်ဒီအာရေဗျဟာ ၂၀၂၀ ခုနှစ်မှာ အစ္စရေးလေယာဉ်တွေ ဆော်ဒီလေပိုင်နက်ကိုဖြတ်ကာ ယူအေအီးကိုသွားဖို့ ခွင့်ပြုခဲ့ပါတယ်။ ပြီးခဲ့တဲ့ ဒီဇင်ဘာကလည်း အစ္စရေးဝန်ကြီးချုပ် နက်ဖ်တာလီ ဘန်းနက်ရဲ့ လေယာဉ်ဟာ ဆော်ဒီလေပိုင်နက်ကိုဖြတ်ပြီး ယူအေအီးကို သွားရောက်ခဲ့ပါတယ်။

ဆော်ဒီရဲ့ ပင်လယ်ကွေ့ မိတ်ဖက်နိုင်ငံတွေဖြစ်တဲ့ ဘာရိန်းနဲ့ ယူအေအီးတို့ဟာ ၂၀၂၀ ခုနှစ်မှာ အစ္စရေးနဲ့ ဆက်ဆံရေး တည်ဆောက်ခဲ့ပြီး ဘင် ဆလ်မန်က အကျိုးဖြစ်ထွန်းမယ်လို့ ယူဆရင် ဒီလိုဆုံးဖြတ်ချက်မျိုး ချမှတ်ဖို့အတွက် အဲဒီနိုင်ငံတွေမှာ အခွင့်အရေးရှိတယ်လို့ မှတ်ချက်ပေးခဲ့ပါတယ်။

Ref: Middle East Eye