ဧပြီ ၁ ရက်နေ့မှစ၍ နိုင်ငံခြားခရီးသွားများကို မလေးရှားက ၀င်ခွင်ပေးတော့မည်

မတ် ၉၊ ၂၀၂၂

M-Media 

-ဧပြီလ ၁ ရက်နေ့ကစတင်ပြီး နိုင်ငံတကာခရီးသွားတွေကို ၀င်ခွင့်ပေးတော့မယ်လို့ မလေးရှား၀န်ကြီးချုပ် ဒါတွတ်ဆရီ အစ္စမာအီလ် ဆာဘရီ ယာကွဘ်က အင်္ဂါနေ့မှာ ကြေငြာပါတယ်။

ကိုဗစ်ကာကွယ်ဆေး အနည်ဆုံး ၂ ကြိမ်ထိုးထားတဲ့ ခရီးသွားတွေဟာ မလာခင် ၂ ရက်အရင် ကိုဗစ် PCR Test စစ်ရမှာဖြစ်ပြီး မလေးရှားလေဆိပ်ကို ရောက်တဲ့အချိန်မှာ RTK Test စစ်ကာ ၀င်ခွင့်ရမှာ ဖြစ်ပါတယ်။ အရင်ကလို ကွာရန်တင်း၀င်စရာ မလိုတော့ပါဘူး။ 

RTK Test ကို လေဆိပ်က ဆေးခန်းမှာဖြစ်စေ၊ ဒါမှမဟုတ် အပြင်ဆေးခန်းမှာဖြစ်စေ ၂၄ နာရီအတွင်း စစ်ပေးရမှာ ဖြစ်ပါတယ်။

“နယ်စပ်တွေကို ဖွင့်တော့မယ်ဆိုတဲ့ ဒီကြေငြာမှုကို တစ်တိုင်းပြည်လုံးက စောင့်နေကြတာ တော်တော်ကြာနေပါပြီ။ ဧပြီ ၁ ရက်နေ့ကစပြီး နယ်စပ်တွေ ပြန်လည်ဖွင့်လှစ်လိုက်ခြင်းဟာ နိုင်ငံသားတွေ ပြည်ပကို လွတ်လွတ်လပ်လပ် သွားနိုင်ရုံသာမက နိုင်ငံခြားသားတွေ မလေးရှားကို လာရောက်လည်ပတ်ခွင့်လည်း ရရှိစေမှာ ဖြစ်ပါတယ်”  လို့ ၀န်ကြီးချုပ် ဆာဘရီက ဒီကနေ့မိန့်ခွန်းမှာ ထည့်သွင်းပြောဆိုခဲ့ပါတယ်။ 

ကိုဗစ်ကာကွယ်ဆေး မထိုးရသူတွေကို ဘယ်လို၀င်ရောက်ခွင့်ပေးမလဲ ဆိုတာနဲ့ပတ်သက်ပြီး ကျန်းမာရေး၀န်ကြီး ခိုင်ရီ ဂျမာလွတ်ဒင်က ဗုဒ္ဓဟူးနေ့မှာ ထုတ်ပြန်ကြေငြာဖို့ ရှိပါတယ်။ 

မလေးရှားနိုင်ငံသားတွေဟာ နယ်စပ်ဖွင့်ထားတဲ့ ဘယ်နိုင်ငံကိုမဆို လွတ်လပ်စွာ သွားရောက်နိုင်တယ်လို့လည်း ၀န်ကြီးချုပ်က ထည့်သွင်းပြောဆိုခဲ့ပါတယ်။ 

ဧပြီလ ၁ ရက်နေ့ကစပြီး စီးပွားရေးလုပ်ငန်းတွေ အပြည့်အ၀ လည်ပတ်လုပ်ကိုင်ခွင့် ရရှိမှာဖြစ်ကြောင်း၊ ခပ်ခွာခွာနေထိုင်ရေးစည်းမျဥ်းကို လုံး၀ ပယ်ဖျက်မှာဖြစ်ပြီး နှာခေါင်းစည်းက မဖြစ်မနေ တပ်ဆင်ရမှာ ဖြစ်ကြောင်း ဆာဘရီက ထည့်သွင်းကြေငြာခဲ့ပါတယ်။

မလေးရှားဟာ ၂၀၂၀ ခုနှစ် မတ်လကတည်းက ပြည်ပခရီးသွားတွေကို ၀င်ခွင့်ပိတ်ထားတာ ဖြစ်ပါတယ်။

Ref: The Star